Шударга өрсөлдөөн хэрэглэгчдийн төлөөх газраас мэдээлэл хийлээ. Энэ үеэр ШӨХТГ-ын дарга С.Мөнхчулуун мэдээлэл өглөө.

Тэрбээр "Сүүлийн үед манай байгууллагад "Юнивишн" ХХК-ийн үнэ тарифтай холбоотой маш олон гомдол, санал иргэдээс ирж байна. Энэ асуудал цахим орчинд ч шүүмжлэл дагуулж байгаа. Тус компани нь хэрэглэгчдэдээ мэдэгдэлгүйгээр үнэ тарифаа өсгөлөө гэдэг гомдлын дагуу ШӨХТГ-аас тодорхой хяналт, шалгалтыг зохион байгууллаа.

Энэ талаар "Зууны мэдээ" сонин дээр үнээ нэмж буй асуудлаар мэдэгдэл гаргасан байна. Тодруулбал, арванхоёрдугаар сарын 1-нээс эхлээд үнэ нэмэх талаарх мэдээлэл сонин дээр гарсан байна. "Юнивишн" ХХК-ийн хэрэглэгчидтэй байгуулж байгаа гэрээнд зааснаар, гэрээний өөрчлөлтийн талаар олон нийтийн хэвлэл мэдээллийн хэрэгслээр мэдээлж, мөн өөрийн боломжит сувгуудыг ашиглана хэмээн тусгасан байна. Гэтэл энэ талаарх мэдээллийг зөвхөн нэг сонин дээр л гаргажээ. Энэ сонин нь өдөрт 1,800 орчим хувь хэвлэгддэг. 

Өөрөөр хэлбэл, 1,800 хүнд очих сониноор дамжуулж мэдэгдлээ зарлаад, зар мэдээ түгээсэн гэж үзэх нь зохисгүй асуудал.  Нийтэд мэдээлэл хүргэе гэвэл хангалттай боломжууд байгаа. Тус компанийн гэрээнд зааснаар өөрийн боломжит сувгуудыг ашиглана гэсэн.

Бидний харж байгаагаар хамгийн боломжит суваг нь "Юнивишн"-тэй хэрэглэгчид зурагтаа асаахад дэлгэц дээр нь гардаг "log in" хэсэг гарч ирдэг. Үүгээр дамжуулан гэрээгээ шинэчилнэ гэж мэдэгдсэн бол дээрх үүрэг нь хангагдсан гэж үзэхээр байгаа юм. 

Үнэ нэмсэнтэй холбоотой асуудлыг хуулиар харилцаа холбооны салбар зохицуулдаг. Энэ асуудлыг шалгаж шийдвэрлэх талаар шаардлага хүргүүлсэн" гэв.