Өнөөдөр Засгийн газрын ээлжит хуралдаан Төрийн ордонд болж Эрүүгийн хууль болон Эрүүгийн хэрэг хянан шийдвэрлэх тухай хуульд нэмэлт өөрчлөлт оруулах тухай хэлэлцлээ. Уг хуралдаанаас гарсан шийдвэрүүдийг ХЗДХЯ-ны Төрийн нарийн бичгийн дарга П.Сайнзориг олон нийтэд мэдээллээ.

Тэрбээр "Засгийн газрын ээлжит хуралдаанаар ялын бодлогыг чангатгах асуудлыг хэлэлцсэн. УИХ-ын гишүүн гэмт хэрэгт холбогдсон үед хөөн хэлэлцэх хугацаагаар халхавч хийдэг гэх иргэдийн санал, гомдол бий. Энэ тухайд хэрэг нээснээс эхлээд бүрэн эрхийг нь түтгэлзүүлэх хүсэлт тавьж болно. Хэрвээ тухайн институт түтгэлзүүлсэн шийдвэр гаргахгүй бол хөөн хэлэлцэх хугацааг шууд зогсоож байгаа. Улмаар бүрэн эрхийн хугацаа дууссанаас эхлээд хөөн хэлэлцэх хугацааг тоолж, эрүүгийн хариуцлагад татах тухай хуулийн төсөлд тусгасан. Ингэснээр УИХ-ын гишүүд халдашгүй бүрэн эрхээр халхавч хийх боломжгүй болж байна.  Мөн эрүүгийн тухай хуулийн 22.1-т торгох ял оногдуулдаг байсан. Тэгвэл эрх мэдлээ урвуулан ашигласан тохиолдолд торгох ял хүлээлгэлгүйгээр уг заалтыг бүхэлд нь байхгүй болгосон гэж ойлгож болно.  Эрх мэдлээ урвуулан ашигласан, авлига авсан төрийн удирдах албан тушаалтныг төрийн албанд бүх насаар нь дахин ажиллуулахгүй байхыг хуулийн төсөлд тусгалаа. Мөн авлига, албан тушаалын гэмт хэргийг хялбаршуулахгүй байх өөрчлөлтийг тусгаж, УИХ-д өргөн мэдүүлэхээр тогтсон. Иргэдийн дунд шүүмжлэл дагуулдаг нэг зүйл бол албан тушаалтан их хэмжээний авлига авсан ч 40 сая төгрөгөөр торгуулаад суллагдчихдаг гэх асуудал юм. Шударга байх үүднээс тайлбар өгөхөд авлигад авсан, гэмт хэргийн замаар олсон бүх хөрөнгийг хурааж, 40 саяаар торгодог байсан. Тэгвэл бид 40 саяаар торгодог тогтолцоог бүр мөсөн халчихлаа. Мөн гэмт хэргийг хөөн хэлэлцэх хугацаа дууссан үндэслэлээр хэргийг хэрэгсэхгүй болгодог байсан. Энэ тохиодолд хөрөнгийг нь хураах албадлагын эрх зүйн үндэслэлийг тусгалаа. Манай улсад ямар ч тохиодолд гэмт хэргийн замаар олсон хөрөнгийг хураах хуультай. Үүнийг илүү тодорхой болгох үүднээс тодруулж тусгасан. Бас Авлигатай тэмцэх тухай хуулинд өөрчлөлт оруулсан. Өмнө нь УИХ-ын хөрөнгө оруулгын мэдүүлгийг УИХ-ын ёс зүйн дэд хороо шалгадаг байсныг өөрчилж, Авлигатай тэмцэх газарт шалгуулна. Мөн Засгийн газраас хэн нэг албан тушаалтан, хамаатан садан нь өөрийн орлогоос давсан автомашин унаж, хөрөнгө эзэмшиж байвал шалгах чиглэлийг өгсөн" гэв.