Иргэн Д.Монголхүүг цагдан хорих болсон шийдвэрийн талаар БЗД-ийн Эрүүгийн хэргийн шүүхээс өнөөдөр мэдээлэл өглөө. Энэ үеэр Баянзүрх, Сүхбаатар, Чингэлтэй дүүргийн Эрүүгийн хэргийн анхан шатны шүүхийн олон нийттэй харилцах хэлтсийн мэргэжилтэн Ө.Уртнасан мэдээлэл өглөө.
Тэрбээр "Д.Монголхүү хууль сахиулагчийг эсэргүүцэх гэмт хэрэг үйлдсэн гэм буруутайд тооцож, нэг жилийн хугацаагаар зорчих эрхийг хязгаарлах ялыг өгсөн байгаа.
Ялтан Д.Монголхүү шүүхийн шийдвэрийн дагуу зорчих эрхийг хязгаарлах ялыг эдэлж байх хугацаандаа буюу 2023 оны нэгдүгээр сарын 11-ний өдөр тогтоогдсон маршрутаас гарсан.
2023 оны хоёрдугаар сарын 25-ны өдөр цахим хяналтын төхөөрөмжийг унтрааж ял эдлүүлэх ажиллагаанд санаатайгаар саад учруулсан болох нь тогтоогдсон учраас Д.Монголхүүгийн үлдсэн 6 сар, 8 хоногийн зорчих эрхийг хязгаарлах ялыг хорих ялаар сольж шийдвэрлэсэн байгаа" гэв.