Авлигатай тэмцэх газраас Байгалийн нөөц ашигласны төлбөрийн тухай хуулийн хэрэгжилт, “Байгаль орчныг хамгаалах нөхөн сэргээх арга хэмжээнд зарцуулах төлбөрийн орлогын хэсгийг бүрдүүлэх, зарцуулах, тайлагнах журам”-ыг хэрэгжүүлэх чиглэлээр 21 аймгийн ИТХ-ын дарга, Засаг дарга нарт хүргүүлсэн Зөвлөмжийн биелэлтэд дүн шинжилгээ хийв.
Төсвийн хөрөнгийн захиран зарцуулалт, болзошгүй эрсдэлээс урьдчилан сэргийлэх чиглэлээр хүргүүлсэн Зөвлөмжид авлига, ашиг сонирхлын зөрчил үүсч болзошгүй нөхцөл байдал тогтоогдсон, анхаарах шаардлагатай эрсдэл бүхий асуудлуудыг дурдсаар байтал хэрэгжилтийг дутуу, ерөнхий байдлаар тайлагнасан, нотломж хангалтгүй байгаа нь удирдлагын манлайлалгүй, авлигатай тэмцэх хүсэл эрмэлзэлгүй, дотоод хяналт шалгалт явуулаагүйтэй холбоотой байна.
Авлигатай тэмцэх газраас 21 аймгийн удирдлагуудад хүргүүлсэн Зөвлөмжийг үр дүнтэй хэрэгжүүлснээр 2025 онд байгаль орчныг хамгаалах, нөхөн сэргээх арга хэмжээг зохих журмын дагуу судалгаанд суурилж зөв төлөвлөх, зориулалтын дагуу зарцуулах, авлига, ашиг сонирхлын зөрчил үүсэхээс урьдчилан сэргийлэх, үүсч буй шалтгаан нөхцөлийг арилгах бүрэн боломжтой юм.
Байгалийн нөөц ашигласны төлбөрийн тухай хууль, холбогдох журамд өөрчлөлт оруулах, ил тод байдлыг сайжруулах чиглэлээр Авлигатай тэмцэх газраас байгаль орчны асуудал эрхэлсэн төрийн захиргааны төв байгууллагатай хамтран ажилласны үр дүнд байгалийн нөөц ашигласны төлбөрийн орлого төвлөрүүлэлт 2021 онд 26, 2022 онд 43, 2023 онд 62 хувьтай үнэлэгдсэн буюу жил бүр өссөн үзүүлэлттэй байна гэж АТГ-аас мэдээллээ.
