АНУ-ын Холбооны мөрдөх товчоо Ираны талд тагнуул хийсэн хэрэгт буруутгагдаж буй АНУ-ын Агаарын цэргийн хүчний тагнуулын хуучин ажилтан Моника Витийн талаар мэдээлэл өгсөн хүнд 200 мянган ам.долларын шагнал амлаж байгаагаа мэдэгдлээ.

Моника Вит нь 1997-2008 оны хооронд АНУ-ын Агаарын цэргийн хүчинд ажиллаж байсан бөгөөд дараа нь засгийн газрын гэрээт ажилтнаар үргэлжлүүлэн ажилласан. Түүний албан тушаал нь маш нууц зэрэглэлийн мэдээлэл, тэр дундаа АНУ-ын нууц ажиллагаанд оролцдог ажилтнуудын мэдээлэлд хандах давуу талтай байв.

АНУ-ын эрх баригчдын мэдээлснээр, тэрбээр 2013 онд Иран руу оргон гарч, Ираны засгийн газарт нууц мэдээлэл дамжуулсан гэж үзэж байгаа аж. Мөн өөрийн хуучин хамтран ажиллагчид болон АНУ-ын тагнуулын ажилтнуудыг онилох ажиллагаанд тусалсан байж болзошгүй байгаа юм.

FBI-ийн мэдээлснээр, Моника Вит нь Ираны Исламын хувьсгалт гвардийн корпусын ажиллагаанд дэмжлэг үзүүлсэн байж болзошгүй бөгөөд одоогоор Иранд амьдарч байгаа сураг бий. Тэрбээр “Fatemah Zahra” болон “Narges Witt” гэх нэрээр амьдарч байгаа байж болзошгүй гэнэ. 

FBI-ийн Вашингтон дахь салбарын төлөөлөгч Дэниел Виежбицки “Тэр АНУ-ын Үндсэн хуульд өргөсөн тангарагаасаа урваж, Иранд нууц мэдээлэл дамжуулсан” хэмээн мэдэгдэж, түүнийг баривчлах ажиллагаа үргэлжилж байгааг онцолсон байна.

Л.Баяр