ГЕРМАНЫ ХАМГИЙН ТОМ ЭМЧ НАРЫН СЭТГҮҮЛ БОЛОХ DEUTSCHES ÄRZTEBLATT ШИНЭ ТОЙМ СУДАЛГААГ ОНЦОЛЖ, НИКОТИН АГУУЛСАН ЦАХИЛГААН ТАМХИ НЬ ТАМХИНААС ГАРАХАД ХАМГИЙН ҮР ДҮНТЭЙ АРГУУДЫН НЭГ БОЛОХЫГ МЭДЭЭЛЛЭЭ.
Цахилгаан тамхи утаат тамхинаас гарахад үнэхээр тусалдаг уу гэдэг асуулт олон жилийн турш маргааны төвд байсаар ирсэн. Нэг хэсэг нь үүнийг никотины шинэ “урхи” гэж хардаг бол нөгөө хэсэг нь олон сая хүнийг янжуур тамхинаас холдуулж буй хор хөнөөл бууруулах хэрэгсэл гэж үздэг. Харин одоо дэлхийн хамгийн том хэмжээний нотолгоонуудыг нэгтгэн дүгнэсэн шинэ судалгаа энэ маргаанд маш хүчтэй хариулт өгч байна.
Оксфордын их сургууль, АНУ, Австралийн судлаачдын хамтарсан шинэ тойм судалгаагаар никотин агуулсан цахилгаан тамхи нь никотин орлуулах уламжлалт эмчилгээнүүдээс — жишээлбэл наалт, бохь, бусам эмэн бүтээгдэхүүнээс илүү өндөр үр дүнтэйгээр хүмүүсийг тамхинаас гаргаж байгааг тогтоожээ. Энэхүү судалгаа нь Addiction сэтгүүлд нийтлэгдсэн бөгөөд 2014-2023 оны хооронд хийгдсэн 109 судалгааг хамруулсан 14 системчилсэн тоймыг шинжилсэн байна.
Судлаачид 21 өөр мета анализийн үр дүнг нэгтгэж үзэхэд бүх үр дүн нэг чиглэл заасан байжээ. Өөрөөр хэлбэл никотинтай вэйп хэрэглэсэн хүмүүс бусад аргууд хэрэглэсэн хүмүүсээс илүү өндөр магадлалаар тамхинаас гарсан байна. Зарим судалгаанд цахилгаан тамхи хэрэглэсэн хүмүүсийн утаат тамхинаас татгалзах никотин орлуулах эмчилгээ хэрэглэсэн хүмүүсээс 17-67 хувиар өндөр гарсан бол никотингүй вэйпээс бүр 46-109 хувиар өндөр байсан аж.
Хамгийн сонирхолтой нь энэ үр дүн ганц нэг жижиг судалгаанаас биш, олон мянган оролцогчтой томоохон судалгаануудаас гарсан байна. Жишээлбэл нэг тоймд 2,544 хүн хамрагдсан 7 судалгааг нэгтгэхэд никотинтай цахилгаан тамхи хэрэглэсэн хүмүүсийн тамхинаас гарах магадлал никотин орлуулах эмчилгээ хэрэглэсэн хүмүүсээс 59 хувиар өндөр байсан гэж гарчээ.
Мөн зөвхөн “зөвлөгөө өгөх” буюу зан үйл дэмжлэгээс ч хавьгүй өндөр үр дүн үзүүлжээ. 5,000 гаруй хүнийг хамарсан судалгаанд цахилгаан тамхи хэрэглэсэн хүмүүсийн татгалзах түвшин бараг хоёр дахин өндөр байсан байна.
Энэ нь санамсаргүй зүйл биш юм. Учир нь ихэнх тамхичид никотиноос бус утаанаас болж үхэлд хүрдэг. Янжуур тамхи шатах үед хэдэн мянган химийн бодис, давирхай, нүүрстөрөгчийн дутуу исэл зэрэг хорт бодисууд үүсдэг. Харин цахилгаан тамхи никотиныг шатаахгүйгээр ууршуулж хэрэглэдэг тул хорт бодисын хэмжээ эрс бага байдаг гэж олон улсын эрүүл мэндийн байгууллагууд үздэг.
Тийм ч учраас Их Британийн “Эрүүл мэнд болон эмчилгээний чанарын үндэсний хүрээлэн” (NICE), Их Британийн Эзэн Хааны Эмч нарын Коллеж (Royal College of Physicians), Их Британийн Засгийн Газрын харьяа Эрүүл мэндийг сайжруулах болон эрүүл мэндийн тэгш бус байдлыг бууруулах газар (Office for Health Improvement and Disparities) зэрэг байгууллагууд цахилгаан тамхийг тамхинаас гарах хэрэгсэл болгон ашиглахыг зөвлөдөг.
Сүүлийн жилүүдэд Их Британид хэрэгжүүлсэн “Swap to Stop” гэх үндэсний хөтөлбөр бүр илүү анхаарал татаж байна. Энэхүү хөтөлбөрийн хүрээнд тамхи татдаг хүмүүст үнэгүй эхлэлийн багц вэйп тарааж, зан үйлийн зөвлөгөө хавсарган өгсөн бөгөөд эхний үр дүнгээр 1000 хүн тутмын 343 нь 4 долоо хоногийн дараа тамхинаас гарсан байжээ. Судлаачид үүнийг бодит орчин дахь маш боломжийн үр дүн гэж үнэлсэн байна.
Мэдээж цахилгаан тамхи эрсдэлгүй гэсэн үг биш. Судлаачид урт хугацааны нөлөөллийг цаашид үргэлжлүүлэн судлах шаардлагатай гэж онцолсон. Гэхдээ өнөөдрийн хамгийн том асуулт бол “цахилгаан тамхи төгс үү?” гэхээсээ илүү “янжуур тамхиас дээр үү?” гэдэг дээр төвлөрч байна. Харин одоогийн хамгийн хүчтэй нотолгоонуудын хариулт маш тодорхой болж эхэлжээ.
Тамхи татдаг хүнийг никотиноос салгах нь нэг асуудал. Харин хамгийн түрүүнд утаат янжуураас салгах нь амь насыг аврах бодит алхам байж болохыг дэлхийн хамгийн том судалгаанууд улам бүр нотолсоор байна.
