Хип хопын урсгалыг Монголд бий болоход нөлөөлсөн анхдагчдын нэг  бол яах аргагүй “ICE TOP” хамтлаг. Тэгвэл тус хамтлагийн дуучин Хаагий буюу Хатанбаатар Японд эмчлүүлэх шаардлагатай болжээ. Тиймээс урлагийнхан тэр аяараа хөдөлж бүх оддын тоглолтыг зохион байгуулах болсон тухайгаа сэтгүүлчдэд мэдэгдлээ.

    Сэтгүүлч Ш.Гүрбазар:  Олон хүн өөрт нь тусалж сэтгэл гаргах тусам тухайн хүний бие илаарших нь илүү байдаг.
 "Ice Top" хамтлагийн Хаагийгийн хийж бүтээсэн зүйл урлагийн ертөнцөд их. Энэ хамтлаг Монголын рок попын урлагийг үүсгэн байгуулахад үнэтэй хувь нэмэр оруулсан. Өдийг хүртэл “ICE TOP” хамтлаг үзэгч сонсогч фенүүддээ уран бүтээлээ хүргэсээр байгаа. Миний монголчууд ухаантай. Ард түмэн олуулаа хичээж байгаад өвчтэй нэгнээ эдгээсэн түүх олон бий. Тиймээс  дуучин Хатанбаатар буюу Хаагийд бүгдээрээ зүрх сэтгэлээрээ тусалъя. Олон хүн өөрт нь тусалж сэтгэл гаргах тусам тухайн хүний бие илаарших нь илүү байдаг. Сайхан сэтгэл гэдэг үнэтэй юм.
     Хаагий маань нойр булчирхайн хорт хавдартай хэмээн оношлогдож одоогоор биеийн байдал нь хүнд байгаа. Хаагийгийн биед байгаа вирус нь өдөр ирэх тусам тархаж, өвчин нь улам даамжирсаар  байна. Уг хавдар нь артерийн судас дагасан хавдар гэж тогтоогдсон бөгөөд өдөр алдалгүй хурдан эмчилгээ, хяналтад орж, хагалгаа хийлгэх шаардлагатай юм. Энэ хагалгааг Монголд хийдэг ч 10-20 хувийн эдгэрэх магадлалтай. Харин Японд 80-90 хувь эдгэнэ гэсэн тул Япон улсад очиж хагалгаа хийлгэхээр болсон. Хагалгааны дараа хими болон физик эмчилгээ үр дүнтэй хийгдэж өвчин нь түргэн эдгэрдэг гэнэ. Хүний хийж бүтээсэн байгуулсан гэдэг тэр улсдаа үнэтэй байдаг. Япон, Монголын хүмүүнлэг байгууллагууд бидэнд туслаач ээ. Хүн бүрийн хүчин туслалцаа хэрэгтэй байна. Хаана л хандивын тоглолт болно тэр болгонд Хаагий оролцож байсан гэдгийг хэлмээр байна.  Мөн Японы ард түмэн бидэнд туслаач гэж хүсмээр байна" гэв.

    Харанга хамтлагийн дуучин Ц.Чулуунбат: Японд  эмчлүүлэхэд хямдрал үзүүлээч гэж л хүсмээр байна

 "Сүүлийн үед ийм олон сэтгүүлчидтэй уулзаагүй юм байна. Тэгэхээр Хаагийнхаа тухай олон  зүйл би ярихгүй. Хоёр зүйл хэлье. Аливаа нэг зовлон жаргал ирэхэд урлаг дуу, соёлыг хүмүүс их санадаг. Магадгүй ямар ч хүнд тохиолдсон зовлонд тус дэм болохоор урлагийнхан зүтгэдэг. Хандивын тоглолт хийдэг. Бид байнга хүмүүст тус дэм болохыг хичээж тайзан дээр дуулдаг. Өнөөдөр бидний дотроос ийм хүнд өвчин туссан нэгнийхээ төлөө дуугарах ёстой. Монголынхоо ард түмнийг энэхүү ажилд туслахыг уриалмаар байна. Гол нь бид зовлон жаргал тохиолдоход хамт байх хэрэгтэй. Дуучин Хаагийгийн эмчилгээний зардал 200 гаруй сая төгрөг болох тул халуун сэтгэлт ард түмнээсээ тусламж хүсч “Халуун сэтгэл” хандивын тоглолт зохиож байгаа юм. Хандивын тоглолт энэ сарын 6-9-ны өдрүүдэд UB Palace-ын концертын их танхимд болно.

“Халуун сэтгэл” тоглолт дөрөвдүгээр сарын 6-нд Рок попын одод, 7-нд Нийтийн дууны одод, 8-нд Хошин урлагийн одод, 9-нд Хип хоп одод тоглолтоо хийхээр нэгдсэн. Хамгийн шилдэг гэсэн, Монголын номер нэг дуучид байгаа. Үүнд бас оролцох юмсан гэсэн олон арван уран бүтээлчид бий.  Та бүхний худалдаж авсан нэг ширхэг тасалбар, мөн хандивын данс руу хийсэн 1000 төгрөг ч Хаагийд маань тус болох юм шүү.  Эрүүл мэндийн салбарт ажиллаж байгаа хүмүүст хандаж хэлэхэд бидний энэ ажил үйлсэд туслалцаа үзүүлж, Японд очоод эмчлүүлэхэд ямар нэг хямдрал үзүүлэхэд туслахыг хүсч байна" гэлээ.

    Ийнхүү дуучин Хаагийд чин сэтгэлээсээ туслахыг түүний гэр бүл  болон урлагийн хамт олон  хүслээ. Тэд “Нэг хүүгээ эрүүл саруул болгоод, эргээд бидэндээ ирэхэд нь элэг нэгт Монголчуудын минь халуун сэтгэлийн тус дэм хэрэгтэй юм шүү” хэмээн хурлын үеэр онцолж дэмжлэг хүссэн юм.

 Дуучин Хатанбаатарт туслах хандивын данс: ХААН-5034146252, Голомт-1805030800

Холбоо барих утас: 97119090,86009090. Мөн 151015 дугаарт мессеж илгээн Хаагийд сэтгэлийн үгээ хэлж болох юм байна.