Швейцарийн нийслэл Женев хотод болж байгаа эмэгтэйчүүдийн шатрын Гран-при тэмцээнд Монголын шатарчин олны анхаарал өртөөд байна. Монголын шатрын холбооны 2011 оны шилдэг шатарчин “Мончесс” клуб, ШШГЕГ-ын харьяа “Сүлд” спорт хорооны тамирчин Т.Батчимэг өнөөдөр Шатрын спортын дэлхийн аварга Hou Yifan-тай тоглож ялжээ. Тус тэмцээний албан ёсны сайтад энэ тоглолтыг "хамгийн санаандгүй өрөг" гэж тодорхойлжээ. Тэрбээр "Би зөвхөн логик аргаар нүүдэл хийхийг хичээсэн" хэмээн ярилцлага өгсөн байна.

   Т.Батчимэг нь 2002 онд анх 16 настайдаа шатрын олимпод оролцож дөрөвдүгээр байр эзэлж, тухайн ондоо эмэгтэй олон улсын мастерын болзол хангасан. Мөн 2011 оны дөрөвдүгээр сард болсон улсын аварга шалгаруулах тэмцээнд анх удаа түрүүлж, . түүнээс хойш рапид, блиц, оюутны гээд дөрвөн улсын аварга шалгаруулах тэмцээний түрүүг авсан юм. Хамгийн сүүлд Чин ван Ханддоржийн нэрэмжит дэлхийн монголчуудын анхдугаар олон улсын тэмцээнд амжилттай оролцож эрэгтэй олон улсын мастерын болзол хангажээ.