ОХУ-ын Москва хотын ЦСКА буюу ОХУ-ын Армийн төв клубын спортын ордонд болсон Монголын оюутны спортын “Универсиад” III их наадмын Европын бүсийн тэмцээн 2013 оны 5-р сарын 01-нд хаалтаа хийлээ.

Европын бүсийн тэмцээнд Украин, Швед улсуудаас болон ОХУ-ын Москва, Санкт-Петербург, Эрхүү, Екатеринбург, Донын Ростов, Тамбов, Томск, Краснодар, Воронеж, Омск зэрэг хотуудаас 350 гаруй оюутан тамирчид хүрэлцэн ирж спортын 3 төрлөөр ур чадвар, авхаалж самбаагаа сорилоо.

Сагсан бөмбөгийн эрэгтэйчүүдийн багын тэмцээнд 18 баг тоглож Москва хотын баг алт, Екатеринбург хотын баг мөнгө, Москвагийн авто замын их сургуулийн баг хүрэл медаль тус тус хүртлээ.

Эмэгтэйчүүдийн сагсан бөмбөгийн тэмцээнд Санкт-Петербургын баг алт, Донын Ростовын баг мөнгө, Москвагийн төмөр замын их сургуулийн баг хүрэл медаль хүртлээ.

Наадмын шатрын төрөлд нийт 37 тамирчид оролцсоноос эмэгтэйчүүдээс алтан медалийг Москвагийн Биеийн тамир, спортын их сургуулийн оюутан, олон улсын хэмжээний мастер А.Энхтуул, мөнгөн медалийг Донын Ростов хотын Техникийн их сургуулийн оюутан А.Батцэцэг, хүрэл медалийг Улс түмний найрамдлын их сургуулийн оюутан Б.Төгөлдөр нар тус тус хүртэж мөнгөн шагнал, өргөмжлөлөө гардан авлаа.

Европын бүсийн наадмын ширээний теннисний төрөлд нийт 33 тамирчид оролцлоо. Ширээний теннисний эмэгтэйчүүдийн ганцаарчилсан төрөлд Томскийн багшийн их сургуулийн оюутан Б.Батчимэг, Москвагийн төмөр замын их сургуулийн оюутан Д.Мөнхтуяа, Д.Урангоо нар эхний 3-н байрт шалгарч их наадмын алт, мөнгө, хүрэл медаль, өргөмжлөл, мөнгөн шагналын эзэд болжээ. Оюутны их наадмыг хааж Монгол улсаас ОХУ-д суугаа ЭСЯ-ны элчин зөвлөх С.Банзрагч үг хэллээ. Тэмцээнд оролцогчид “Халуун элгэн нутаг” дуугаа нийтээрээ хүндэтгэлтэйгээр дууллаа.