30 мянга гаруй айл, өрхийг цахилгаанаар хангадаг станц нурж унахад бэлэн болоод байна

 Долоон буудал, Чингэлтэй, Бэлх болон хойд чиглэлийн зуслангийн 30 мянга гаруй айл, өрхийг цахилгаанаар хангадаг Хайлааст 110 дэд станцыг намган дээр барьснаас үүдэлтэйгээр тулгуур баганууд нь хазайж нурж унахдаа тулаад байгаа юм. Анх 2009 онд угсралтын ажлыг хийх явцад газрын маргаанаас болж, намган дээр барьсан байдаг. Үүнээс хойш гурван жилийн хугацаанд хөрсний цэвдгээс болж, суулт өгсөн талаар холбогдох албаныхан тайлбарласан юм.

Одоогоор нөхцөл байдал маш хүнд, аваарын онцгой хэмжээнд хүрчээ

Одоогийн байдлаар тус станцын нөхцөл байдал хүнд, аваарын онцгой хэмжээнд хүрчихээд байгаа аж. Бүх тоноглолууд нь сууриараа өргөгдсөн байдалтай болсон буюу ашиглалтад орсноос хойш хөрсний хөдөлгөөнөөс үүдэн таван метрт өргөгдсөн байна. Мөн утаснууд нь таталтад орсон аж. Ямартаа ч “Цахилгаан дамжуулах үндэсний сүлжээ” ТӨХК-иас энэ асуудлыг холбогдох яам, Онцгой байдлын газар, Нийслэлийн Засаг даргад тавиад байгаа юм байна.

Станцыг нүүлгэн шилжүүлнэ

Долдугаар сарын 1-н буюу нөгөөдрөөс долдугаар сарын 10-ны хороонд шинэ талбайг нь засах, хөрсний суултыг нь зогсоох суурин ажлуудыг нь эхлүүлэх аж. Ингээд долдугаар сарын 15-наас наймдугаар сарын 25-ны хооронд нүүлгэн шилжүүлэх гэнэ. Өөрөөр хэлбэл Станцыг зөөнө гэсэн үг юм. Хойд талд нь буюу одоо байгаагаас нь арваад метрийн цаана шилжүүлэн суурилуулахаар бэлтгэж байгаа аж.

100-гаад мянган хэрэглэгчдийн цахилгааны хязгаарлана

Нүүлгэн шилжилт хийх үеэр зуслангийн айлуудын цахилгааныг 1-3 удаа хязгаарлах юм байна. Зуслангийн хэрэглэгчдээс гадна Дамбадаржаа, Бэлх, Чингэлтэй, Долоон буудлын айлуудын цахилгааныг ч таслах аж. Нийтдээ 100-гаад мянган хэрэглэгч байдаг ч дэд станцаа шилжүүлэн суурилуулахын тулд тэдний цахилгааныг хязгаарлахаас өөр аргагүйд хүрээд байгаа юм байна. 

Хайлааст 110 дэд станцыг анх Хайлаастад барихаар зураг төслийг нь хийсэн байсан ч Дамбадаржаагийн намган дээр барьсан гэдэг. Тухайн үед уг станцыг барих тендерт “Авир” ХХК ялж байсан түүхтэй. Ингээд 2009 оны 12 сарын 19-нд цахилгаан залгаж, хэрэглэгчдэд түгээж эхэлсэн байдаг. Гэхдээ улсын комисс болоод ЦДҮС ХК-ийнхан хүлээж аваагүй аж. Өөрөөр хэлбэл, нэгэнт хөрөнгө мөнгө зарчихсан учраас хүчээр л ашиглалтад оруулсан гэж ойлгож болохоор байгаа юм. Нийтдээ 2.4 тэрбум төгрөгийн өртгөөр баригдсан энэхүү дэд станц өнөөдөр ийнхүү аваарын онцгой хэмжээнд хүрчээ. Ямартаа ч 100-гаад мянган хэрэглэгч, 30 мянга гаруй айлууд тог цахилгаангүй болох дээрээ тулаад байгааг холбогдох албаныхан нь анхааралдаа авах шаардлагатай байна.