Хорих 407 дугаар анги шинэ оёдлын үйлдвэртэй болж эмэгтэйчүүддээ баярлууллаа.  Мөн энэ үеэр нярайн шинэ байр ашиглалтанд орж нээлтийн ёслолыг хийсэн юм.  Дэлгэрэнгүй сурвалжлагыг тун удахгүй хүргэх болно. Харин одоо  Ангийн дарга дэд хурандаа О.Хадбаатарын яриаг доор сийрүүлье.

-Оёдлын үйлдвэрийнхээ талаар танилцуулахгүй юу?

- Тус анги нь 1974 оны 9 дүгээр сарын 27-ны өдрийн БНМАУ-ын Сайд нарын 374-р тогтоолоор зөөлөн оёдол, модон хайрцаг сав хийх чиглэл бүхий бие даасан хорих анги болж оёдлын үйлдвэр барьж ашиглалтанд оруулсан. Энэхүү үйлдвэрт ШШГБ-ын хэмжээнд ял эдэлж буй ялтнуудын өвөл зуны нормын хувцас, ор дэрний цагаан хэрэгсэл, дотуур өмд цамц дагнан үйлдвэрлэж байсан ба сүүлийн жилүүдэд аж ахуйн нэгжтэй гэрээ хийж гэрийн бүрээс, ажлын хувцас, машины хучлага. суудлын бүрээс, үндэсний болон загварын дээл хувцасны захиалгыг авч оёдог.

-Чанга   дэглэмтэй хоригдогсод энэ үйлдвэрт ажилладаг уу?

-Ангийн оёдлын үйлдвэрт жирийн болон чанга дэглэмтэй хоригдогсдыг 2 ээлжээр ажиллуулж ирсэн.  2011 оны 9 дүгээр сард  20 сая төгрөгийн өртөгтэй иж бүрэн тоног төхөөрөмж бүхий чанга дэглэмтэй ялтнууд ажиллах оёдлын үйлдвэрийг шинээр байгуулж З0 ширхэг шулуун оёдлын машин, тусгай зориулалтын 2 машин суурилуулан үйлдвэрийн хүчин чадлыг нэмэгдүүлж чанга дэглэмтэй 35-40 хоригдогчийг ажлын байраар хангаж ажиллуулж байгаа аж.

Жирийн дэглэмтэй хоригдогчдын оёдлын үйлдвэр нь шулуун оёдлын 17 машин, уурын индүү 1, тусгай зориулалтын 8 машинтайгаар 40 гаруй хүнийг ажлын байраар хангаж ажиллаж байна.

-Цалин хөлсний хувьд хөдөлмөрийн хөлсний доод хэмжээгээр тооцогдох уу?

-Үйлдвэрт ажиллаж буй нийт хоригдогчдод хийж байгаа ажил хөдөлмөрт тохирсон цалин хөлс бодож хоригдогч тус бүрийн нэрийн дансанд байршуулдаг. 2010-2013 эхний улирлын байдлаар давхардсан тоогоор 2948 ялтанд 64,013,552 төгрөгийн цалин бодож улс иргэдэд учруулсан хохиролд 14,705,164 төгрөгийг шилжүүлэн 2672 хоригдогчиийн гар дээр 41.009.921 төгрөгийг олгосон байгаа.

-Үндэсний үйлдвэрүүдээ дэмжиж зарим нэг аж ахуй нэгжтэй гэрээ байгуулан ажилладаг байгаа. Одоогоор хэчнээн компанид бүтээгдэхүүн нийлүүлж байна?

-Үйлдвэрийн бүсэд гар урлалын хэсэг ажиллуулж хоригдогчийг мэргэшүүлэх тал дээр онцгой анхаарч “Мон Ланс” ХХК-тай гэрээгээр савхин табочик оёх, мэргэжпийн багшаар заалган сургалтанд хамруулан зүү ороох, зээгт наамал хийх, хэрээсэн хатгамал оёх чиглэлээр нийт 38-40 хоригдогчийг ажиллуулж байгаа.

-Хорих анги маань шинэ байранд нүүж ирснээр үйлдвэрийн байргүй байсан. Харин өнөөдөр оёдлын шинэ үйлдвэрийн нээлтийн ажиллагаа болж байна. Шинэ үйлдвэрийн давуу талыг дурдаач?

-Тус анги нь ЗГ-ын тогтоолоор шинэ байрлалд нүүн шилжиж ирж үйлдвэрийн байр байхгүй байсныг хуучин барилгын суурийг ашиглан 48*15м харьцаатай 720 м.кв талбайтай жирийн болон чанга дэглэмийн оёдлын үйлдвэрийн барилгыг нийт 104.6 сая төгрөгөөр БАӨЗ-ны ангиар 2013 оны 5 дугаар сарын 1-нээс 7 дугаар сарын 1-ний дотор бариулан ашиглалтанд оруулж байна.

Цаашид хоригдогчийг ажлын байраар хангах, мэргэшүүлэх сургалтанд тогтмол хамруулан чадваржуулах, тэднийг суллагдан гарахад бэлтгэх, хоригдогчийн бусдад учруулсан хохирлыг цалин хөлснөөс төлж барагдуулах зэрэг ажлыг тогтмол зохион байгуулж ажиллах зорилготой ажиллаж байна.