Франц, Герман улсууд Их Британийн адил Хятадын удирддаг Азийн хөгжлийн банкинд гишүүнээр элсэх болсон тухай “Guardian” агентлаг мэдээллээ. Дээрх хоёр орны Сангийн сайдууд “Азийн дэд бүтцийн хөрөнгө оруулалтын банк”-д гишүүнээр элсэх өргөдлөө өгсөн тухайгаа мягмар гарагт мэдээллээ.

Өнгөрсөн долоо хоногт Их Британи Азийн дэд бүтцийн хөрөнгө оруулалтын банкны гишүүн болох хүсэлт гаргасныг АНУ илт буруутгасан юм. АНУ тус банкийг барууныхны эзэлсэн Дэлхийн банкны “дайсан” хэмээн харж байгаа бөгөөд барууныхнаас анх удаа гишүүн болох хүсэлт гаргасан Их Британийг шүүмжилсэн аж. АНУ-ын ерөнхийлөгч Барак Обама болон Австралийн ерөнхий сайд Тони Эбботт нар Хятадын банкинд элсэх нь олон улсын бүлэглэл үүсгэх магадлалтай тул Дэлхийн банк олон Олон улсын валютын сангийн адил үйл ажиллагаа, тайлангаа ил тод байлгах ёстой хэмээн шаардаж байгаа юм.

Герман, Францаас гадна Итали ч бас дээрх банкинд нэгдэх тухай яригдаж байгаа юм.

Өнгөрсөн 10 дугаар сард үүсгэн байгуулагдсан Азийн дэд бүтцийн хөрөнгө оруулалтын банкийг БНХАУ удирддаг бөгөөд тус тивийн эрчим хүч, тээвэр, дэд бүтцийн төслүүдэд хөрөнгө оруулалт хийдэг юм. Уг банкинд одоогоор дэлхийн 21 орон гишүүнээр элссэн байна.