Төсвийн байнгын хорооны дарга Ч.Улаан 2015 оны Төсвийн тодотгол, 2016 оны төсвийн төслийн талаар мэдээлэл хийлээ.
Өнөөдөр Төсвийн байнгын хороо хуралдаж дээрх хуулийн төслүүдийг хэлэлцэх эсэхийг хэлэлцэж шийдвэрлэсэн юм.
Энэ талаар тус байнгын хорооны дарга Ч.Улаан ярихдаа “Өнөөдөр 2015 оны төсвийн тодотгол, 2016 оны Төсвийн төслийг хэлэлцэх эсэхийг хэлэлцэж шийдвэрлэлээ. Ингэснээр ирэх оны төсвийг чуулганы хуралдаанаар хэлэлцэх нөхцөл бүрдэж байна. УИХ дахь нам, эвслийн бүлгүүд төсөвтэй холбогдуулж ажлын хэсэг гаргаж ажилласан. Засгийн газрын зүгээс хямралын нөхцөлд ажиллах бодлогод нийцсэн зардлын томоохон өөрчлөлттэй төслийн төслийг оруулж ирсэн. Байнгын хороогоор дээрх асуудлуудыг хэлэлцэх эсэхийг шийдээд ажлынхаа зохион байгуулалтыг хийлээ. УИХ дээр төсвийн бодлогыг тодорхойлох үр, дүнгийн шалгуур үзүүлэлтүүдийг тогтоох ажлын хэсэг гарч ажиллахаар боллоо. Энэ ажлын хэсэг 7 хүний бүрэлдэхүүнтэй байна. Байнгын хороо бүр ажлын хэсэг байгуулж төсвийг хэлэлцүүлэхээр санал, дүгнэлт гаргахаар шийдсэн. Тус хурлаар УИХ-ын гишүүд төсөв өөрөө тодорхой эзэнтэй, хариуцлага тооцох хүнтэй байхад анхаараач гэсэн саналыг их гаргасан. Тулгамдсан асуудлуудыг хэлэлцэх ёстой. Мөн хөрөнгө оруулалт, Засгийн газрын өр, зээлийн үйлчилгээний зардал, ЗГ-ын бүтэц бүрэлдэхүүнд өөрчлөлт оруулах, цалин хөлс, тэтгэвэр, тэтгэмж нэмэх, шатахууны үнэтэй холбоотой асуудлуудад гишүүд ихэвчлэн анхаарал хандууллаа" гэв
Үүний дараа сэтгүүлчдийн сонирхсон асуултад хариуллаа.
- Өрийн үйлчилгээний зардал улсын төсөвт хэр их хэмжээний ачаалал үүсгэхээр байгаа юм. Үүнээс ирэх жил хэдийг нь төлж дуусгах вэ?
- Засгийн газын өргөн мэдүүлснээр 930 гаруй тэрбум төгрөгийн зээлийн үйлчилгээ хийхээр байгаа юм. Гишүүдийн хувьд 930 тэрбумыг өндөр гэж байгаа юм. Үүнийг хэлэлцүүлгийн шатанд ярилцаж, цэгцэлнэ.
- Яам, агентлагийг нэгтгэх, бүтцийн өөрчлөлт хийнэ гэж байгаа. Үүнээс хэдэн төгрөгийн хэмнэлт хийнэ гэж тооцоолж байгаа вэ? Хэмнэлт хэзээ бодитойгоор мэдрэгдэх вэ?
- Бүтцийн өөрчлөлт хийсний ашиг 2016 онд мэдрэгдэхгүй. Учир нь бүтцийн өөрчлөлтийг дагасан тодорхой зардал гарна. Засгийн газрын танилцуулснаар 2017 онд л 2 тэрбум төгрөгийн хэмнэлт гарч бодитойгоор мэдрэгдэнэ гэсэн. Хэлэлцүүлгийн шатанд илүү дэлгэрэнгүй хэлэлцэнэ.
Т.Энхэлээ
Сэтгэгдэл (3)