Энэ сарын 18-нд АТГ-аас МАХН-ын дарга Н.Энхбаярын өмгөөлөгч О.Баасанхүүг дуудаж, Н.Энхбаярыг өмгөөлөх эрхгүй гэдгийг нь дуулгасан байна. Энэ талаар өмгөөлөгч О.Баасанхүүтэй ярилцлаа.
    Энэ сарын 18-нд АТГ-аас МАХН-ын дарга Н.Энхбаярын өмгөөлөгч О.Баасанхүүг дуудаж, Н.Энхбаярыг өмгөөлөх эрхгүй гэдгийг нь дуулгасан байна. Энэ талаар өмгөөлөгч О.Баасанхүүтэй ярилцлаа.

-Таныг Н.Энхбаярт өмгөөлөл үзүүлэх эрхгүй болсон гэсэн. Энэ талаар тодруулаач?

-Энэ сарын 18-нд АТГ-ын Мөрдөн шалгах албаны дарга Э.Амарбат намайг дуудсан. Тэгэхээр нь АТГ-т яваад очтол “Таны эрхзүйн туслалцаа үзүүлэх гэрээ Эрүүгийн байцаан шийтгэх хуулийг хэвийн үргэлжлүүлэхэд саад болж байгаа учир Эрүүгийн байцаан шийтгэх ажиллагаанд оролцохгүй байхыг албан ёсоор мэдэгдэж байна” гэсэн. Би хариуд нь “Тэгвэл энэ шаардлагаа надад албан ёсоор бичгээр өг” гэж хэлсэн. Гэтэл өнөөдрийг хүртэл энэ байр сууриа надад албан ёсоор бичгээр өгөөгүй байна. Энэ нь өмгөөллийн үйл ажиллагаанд хөндлөнгөөс хэн ч оролцох ёсгүй гэсэн үндсэн зарчмыг зөрчиж байна гэж үзэж байгаа.  

-Монголын өмгөөлөгчдийн холбоонд мэдэгдсэн үү?

-Одоогоор Монголын өмгөөлөгчдийн холбоонд албан ёсоор гомдол санал гаргаагүй байна. Яагаад гэхээр аливаа үйлдлийг баримтжуулахын тулд албан ёсоор бичгээр хариу авах ёстой. Гэвч өнөөдрийг хүртэл надад хариу ирээгүй байна. Би түрүүхэн АТГ ороод ирсэн.

-Тэгээд АТГ-аас юу гэж байна?

-Та хүсэлтээ албан ёсоор манай байгууллагад өг. Тэгэхээр бид албан ёсоор хариу өгье гэж байна. Би яагаад АТГ-т хүсэлт илэрхийлэх ёстойгоо сайн ойлгохгүй байна л даа. Учир нь би өмгөөллийн үйл ажиллагаа хэвийн явуулж байхад АТГ-ынхан өөрсдөө дундуур саад учруулсан.Тэгээд саад учруулсан үйлдлээ тодорхойл гэхээр та хүсэлтээ гарга гэж байгаа нь утгагүй үйлдэл.

-Тэгэхээр та цаашид Н.Энхбаярт өмгөөлөл үзүүлэх үү?

-Өмгөөлөгч, үйлчлүүлэгч хоёр хоорондоо гэрээ байгуулдаг. Тэр тусмаа өмгөөлөгчдийн холбооноос томилолт өгсөн бол мөрдөн байцаагч зөвшөөрсөн, зөвшөөрөөгүй хамаагүй хорих байгууллага руу нэвтрэх эрхтэй.

-Н.Энхбаярыг батлан даалтад гаргах хүсэлтэй байгаа. Энэ талаар?

-Энэ бол тодорхой. Учир нь Эрүүгийн байцаан шийтгэх хуулинд сэжигтнээр тооцсон тогтоол үйлдээд тэр тогтоолоо 48 цагийн дотор мэдэгдэх ёстой. Гэтэл Н.Энхбаяр даргад 48 цагийн дотор мэдэгдээгүй. Тиймээс бид сэжигтнээр тооцсон тохиолдолд хүчин төгөлдөр эсэхэд эргэлзэж байна. Мөн сэжигтнээр тооцсон тогтоолоо одоо хүртэл танилцуулаагүй байна. Байцаалт сэжигтнээр тооцсон тогтоолыг танилцуулснаар эхэлдэг. Түүнээс биш шууд байцаалт авах, албадах үйлдэл байж болохгүй. Тэгэхээр Н.Энхбаяр даргыг хоригдож байх хугацаанд байцаан шийтгэх ажиллагаа хийхгүй нь хий хорьж байгаа асуудал юм. Тиймээс Н.Энхбаяр даргыг нэн даруй суллах шаардлагатай.

-Сэжигтнээр тооцох тогтоолыг танилцуулах гэсэн боловч Н.Энхбаяр гуай өөрөө танилцахгүй байгаа юм биш үү?

-Хуулинд 48 дотор цагийн дотор мэдэгдэх ёстой байдаг. Тэгэхээр одоо танилцуулах гэж үйлдэл хийж байгааг нь хууль бус хэмээн эсэргүүцэж байгаа.

-Тэгэхээр одоо хүртэл Н.Энхбаярыг сэжигтнээр тооцоогүй гэж ойлгож болох уу?

-Эрүүгийн байцаан шийтгэх хуулинд сэжигтнийг баривчлахдаа хуульд заасан үндэслэл журмын дагуу баривчилдаг. Гэтэл МАХН-ын дарга Н.Энхбаярыг сэжигтнээр тооцсон эсэх нь тодорхойгүй байна. Яагаад гэхээр өнөөдрийг хүртэл Н.Энхбаярт өөрт нь сэжигтнээр тооцсон тогтоол алга. Танилцуулаагүй байна.  

-Суллуулахаар ямар ажиллагаа хийх вэ?

-Мэдээж шүүхэд хандана. Суллах эсэхийг шүүх шийднэ. Эсвэл прокурорт хандана. Прокурор мөн шийдэх байх. Ямар ч байсан намын хүмүүс хүсэлт шаардлагаа албан ёсоор илэрхийлээд явж байгаа.

-Та Н.Энхбаяртай хамгийн сүүлд хэзээ уулзсан бэ?

-Уржигдар орой уулзсан. Гэхдээ маш богинохон хугацаанд уулзсан. Яагаад гэхээр байцаан шийтгэх ажиллагаад хэвийн оролцох бололцоогүй болсон. Гэхдээ Н.Энхбаяр даргад надаар өмгөөлүүлэх хүсэлтэй, хүсэлгүй асуудлаа тодорхойлж өгөөч ээ гэж хэлсэн. Тэгээд тодорхойлтоо аваад уулзалт дууссан байгаа.

-Н.Энхбаяр дарга тэгээд юу гэж байна?

-Н.Энхбаяр дарга албан ёсоор “Монголын өмгөөлөгчдийн холбооны өмгөөлөгч О.Баасанхүүг байлцуулж, АТГ болон хуулийн байгууллагынхантай харьцана” гэсэн. Тэгэхээр гэрээнд заасны дагуу үйлчлэгч маань надаар өмгөөлүүлнэ гэсэн учраас би өмгөөлөл үзүүлнэ.

-Ер нь өмгөөлөгч, үйлчлүүлэгч хоёрын хийсэн гэрээний голоор байцаагчид оролцох нь хуульзүйн үндэслэлтэй юу?

-Түүнд АТГ-ынхан тайлбар хийх ёстой гэж бодож байна. Миний хувьд аливаа эрхзүйн туслалцаа үзүүлэх гэрээ иргэний эрхзүйн туслалцаа үзүүлэх гэрээний ердийн нэг хэлбэр. Тэгэхээр гэрээ хэн байгуулах, яаж байгуулах нь гэрээ байгуулагч хоёр талын л асуудал. Энд хэн нэгэн хөндлөнгөөс оролцох ёсгүй.
 
-Н.Энхбаяраас байцаалт авч байгаа юу?

-Мөрдөн байцаагчийн зүгээс байцаалт аваагүй. Харин хоёр удаа сэжигтнээр тооцсон тогтоолыг танилцуулах гэж оролдсон.

-Хамгаалагч нь хамт хоригдож байгаа юу?

-Хамгаалагчийг нь хоёр удаа буулгах гэж оролдсон. Гэвч дээд газруудад хууль журмын дагуу гомдол гаргаснаар зөвхөн камерийн байдлаар хамгаалалт нь хийгдэж байгаа.  Хоол ундны хувьд шүүхийн шийдвэр гүйцэтгэх газрын журмын дагуу хоол ундаа идэж байгаа.

-Ярилцсанд баярлалаа                                                                               Б.Чимэг