Өчигдөр МАХН-ын дарга Н.Энхбаярыг хоёр сар үргэлжлүүлэн хорих шийдвэр гарсан. Мөн түүний хоригдож буй камерт мөрдөн байцаагчид дайрч орон, мэдүүлэг авахыг хүчилсэн хэмээх мэдээлэл гарсан билээ. Энэ талаар болон түүний хоригдож буй нөхцөл байдлын талаар ШШГЕГ-ын дэд дарга, тогтоол гүйцэтгэх газрын дарга Т.Батболдтой ярилцлаа.
    Өчигдөр МАХН-ын дарга Н.Энхбаярыг хоёр сар үргэлжлүүлэн хорих шийдвэр гарсан. Мөн түүний хоригдож буй камерт мөрдөн байцаагчид дайрч орон, мэдүүлэг авахыг хүчилсэн хэмээх мэдээлэл гарсан билээ. Энэ талаар болон түүний хоригдож буй нөхцөл байдлын талаар ШШГЕГ-ын дэд дарга, тогтоол гүйцэтгэх газрын дарга Т.Батболдтой ярилцлаа.

-Өнөө өглөө /өчигдөр/ МАХН-ын дарга Н.Энхбаярын хоригдож байгаа камертай өрөөнд мөрдөн байцаагчид дайрч орсон хэмээн мэдээлэл гарсан. Хуулиндаа сэжигтний өрөөнд байцаагч нь орох эрхтэй юу?

-Хэрэг мөрдөн шалгаж байгаа байгууллага болон мөрдөн байцаагчид ямар ч тохиолдолд сэжигтний хоригдож байгаа өрөөнд орж нөхцөл байдалтай танилцах эрхтэй. Хуулиар хориглосон зүйл байхгүй. Цагдан хоригдож байгаа үеэс эхлэн бичлэг хийж байгаа. Манай байгууллага тэр хүний аюулгүй байдал талаас нь хангах үүрэгтэй байгууллага. Өнөөдөр гар утас орж болж байхад, юу ч орж болно шүү дээ. Тийм учраас манай байгууллага эрх үүргийнхээ дагуу тэр хүний хоригдож байгаа нөхцөл байдлыг байнга эргэж, харах ёстой. Төрийн тусгай хамгаалалт, прокурорын хяналт дор эрх нь зөрчигдсөн зүйл байхгүй.

-Гар утас оруулсан асуудлыг тодруулаач?

-Түүнийг хоригдож байх хугацаа бүрийг видео бичлэгт хурааж байгаа. Энэ нь хоригдож буй хүмүүсийн аюулгүй байдал, хэрэг зөрчлөөс урьдчилан хамгаалах зорилготой. Харин сэжигтэн Н.Энхбаяр хоригдож байх хугацаандаа шүүхийн шийдвэр гүйцэтгэх хуулинд заасан хэд хэдэн журмыг зөрчсөн. Өмгөөлөгчөөрөө дамжуулж нууцаар гар утас өрөөндөө оруулсан байсан. Гар утсыг хадгалсан, хэрэглэсэн тохиолдолд сахилгын шийтгэл оноох журамтай. Мөн хорих байгууллагын захиргаанд хянуулалгүй захидал гадагш гаргасан. Н.Энхбаяр ил захидал ард түмэндээ илгээх эрхтэй. Гэхдээ хорих байгууллагын албан тушаалтан, захиргаанд хянуулж үзүүлэх ёстой. Тэгээд хориглоогүй бол илгээх боломжтой. Шалгаж байгаа нөхцөл байдалтай холбоотой хамааралтай захидал байвал хэргийг шалгаж байгаа байгууллага руу шилжүүлдэг. Гэтэл хоёр захидал нь шүүхийн шийдвэр гүйцэтгэх ажиллагаа, цагдан хорих ажиллагаанд хянуулаагүй бөгөөд үзлэгээр илэрч гарч ирсэн тул хурааж авсан.

-Тэгээд сахилгын арга хэмжээ авсан уу?

-Сахилгын шийтгэлээр 15 хоног сахилгын байранд хорьдог хуулийн заалт бий. Гэтэл өнөөдөр бодит байдлыг хэрэгжүүлээгүй, сахилгын акт үйлдсэн ч шийтгэл оногдуулаагүй байна. Шийтгэл оногдуулаагүй шалтгаан нь нэгдүгээрт сахилгын шийтгэлийг оногдуулснаар олон нийтэд ойлгомжгүй асуудал үүсчих вий. ШШГБ- хуулиар хүлээсэн үүргийн хэмжээнд үүрэг чиглэл явуулж байхад шал өөр өнцгөөс худлаа гуйвуулж ярьж байна. Н.Энхбаярыг шахаж дарамтлаж байна гэх мэдээлэл хэвлэл мэдээллийн хэрэгслээр цацагдаж байгаа. Тийм учраас  гаргасан сахилгын зөрчлийг нь дурдьдахгүй байх нь зөв. Хоёрдугаарт өөрийнх нь эрхэлж байсан ажил албан тушаалтай нь холбогдуулж хүндэтгэлтэй хандсан. Хэрвээ шаардлагатай бол хуулийг биелүүлээгүй гэдэг үндэслэлээр хариуцлага тооцно. Одоогоор албан ёсоор асуултаа тавиагүй байна.

-Хоёр захидал нь хаана хэнд хаягласан байсан юм бол?

-Үзлэгээр хурааж авсан захидлын нэг нь өөрийнхөө нь шалгагдаж байгаа эрүүгийн хэрэгтэй холбоотой захидал байсан. Түүнийг нь холбогдох байгууллага буюу аймгийн прокурорт нь шилжүүлсэн. Эрх бүхий  байгууллагад нь шилжүүлэх байх. Нөгөө нэг нь УИХ гишүүд, намын дэмжигчиддээ бичсэн байна билээ. Энэ захидлыг хориглоогүй. Гагцхүү шалгуулж байж гаргах ёстой. Гэтэл тэгээгүй. Олон нийтэд танигдсан хүн сахилгын шийдвэр хүлээдэггүй юм байна.

-ХЗДХЯ-ны сайд Ц.Нямдоржийг Н.Энхбаярыг эргэсэн гэх яриа бий?

-Хэвлэл мэдээллийн хэрэгслээр ХЗДХЯ-ны сайд Ц.Нямдорж очиж уулзсан. Цагдан хорихын ажилчдад үүрэг өгч, дарамт  шахалт үзүүлсэн гээд яриад бичээд байна. Тийм зүйл ерөөсөө болоогүй, худлаа мэдээлэл цацаад байна. Цагдан хорих байрны хором бүр бичлэгтэй хяналттай байгаа. Бодит бус мэдээлэл цацаж, шүүхийн шийдвэр гүйцэтгэх байгууллагын  хуулиар хүлээсэн үүргийн хүрээнд ямар нэгэн хүндрэл учруулж болохгүй.

-Ер нь хамгаалалт нь хэрхэн хийгдэж байгаа вэ?

-Иргэн Н.Энхбаярыг хоригдож байх хугацаанд Төрийн тусгай хамгаалалтын газраас байнгын буюу өдөр тутам, цаг минут тутамд хяналт тавьж байгаа. Манай байгууллагын зүгээс тэднийг хяналт тавих боломж нөхцөлийг бүрдүүлж өгсөн.

-Хоол хүнсийг нь хэрхэн зохицуулж байна?

-Хоол хүнсний хувьд төрийн тусгай хамгаалалтын шугамаар хоол хүнсний материал нь ирж байгаа. Мөн эмч, төрийн тусгай хамгаалалтын ажилтны хяналтан доор хоолыг бэлдэж, тэдний хяналтан дор сэжигтэнд хоолыг нь хүлээлгэн өгч байгаа. Мөн өдөрт хоёр удаа эрүүл мэндийн үзлэгт хамруулж байна.

-Өдөр бүр хоёр удаа эмчийн үзлэгт оруулдаг гэлээ. Зөвхөн МАХН-ын дарга Н.Энхбаярт тэгэж үйлчилдэг үү. Эсвэл хоригдож байгаа бүх сэжигтэнд үү?

-Өөрөө хүсэлт тавьсан тохиолдолд мөн өмгөөлөгч хүсэлт тавибал биеийг нь үзнэ. Ер нь өөрт нь хүндэтгэлтэй хандах үүднээс өдөрт хоёр удаа үзлэг хийж байна.

-Төв аймгийн хорих ангийг тамлан зовоодог газар хэмээн шүүмжилсэн?

-Цагдан хорих байрны талаар өөрийн байр сууринаас хорих байрыг харлуулж байгаа шүү. Тус хорих хүний эрхийг хөндөж, тамлаж зовоодог газар биш. Хүний эрхийн үндэсний комиссын дарга очоод шалгалт хийсэн. Байх ёстой стандарттай газар гэж үзсэн. Гэтэл хэвлэлийн хэрэгслээр буруу талаас нь тайлбарлаж байна.

-Ярилцсанд баярлалаа                                                                                              Б.Чимэг