МАХН-ын дарга Н.Энхбаяр Төв аймгийн урьдчилан хорих төвд саатуулагдаад 20 гаруй хонож байна. Тэрээр суллагдах хүртлээ өлсгөлөн зарлахаа мэдэгдээд буй.МАХН-ын дарга Н.Энхбаяр Төв аймгийн урьдчилан хорих төвд саатуулагдаад 20 гаруй хонож байна. Тэрээр суллагдах хүртлээ өлсгөлөн зарлахаа мэдэгдээд буй. Мөн тус хорихын алба хаагчид Н.Энхбаярын биед ухаан самууруулах тариа хийхийг завдсан гэх мэдээлэл ч гарсан. Энэ талаар ШШГЕГ-ын Тогтоол гүйцэтгэх газрын дэд дарга, хурандаа Л.Хосбаяртай ярилцлаа. -Н.Энхбаяр ухаан самууруулах тариа хийхийг завдсан гэх мэдээлэл гарсан. Энэ талаар тодруулахгүй юу?
-Тийм мэдээлэл гарсныг зарим нэг сайтаас олж уншсан. Н.Энхбаярыг хууль бусаар баривчлаад, эрүүдэн шүүгээд, ухаан санааг нь самууруулах тариа хийж байна гэх олон нийтийг төөрөгдүүлсэн мэдээлэл гарч байгаад бид эмзэглэж байна. Бид түүний хоригдож байгаа нөхцөл байдал дээр нь их анхаарч байгаа. Төрийн тусгай хамгаалалтын хамгаалагч нар нь ч Н.Энхбаярыг камераар хамгаалж байна. Ямаршуу байдалтай яаж хоригдож байгааг хамгаалагч нар нь хянаж байгаа шүү дээ. Тэгэхээр ийм мэдээлэл гарч байгаа нь нотлох баримтгүй, ард иргэдийн санаа бодлыг төөрөгдүүлэх санаа бодол агуулаад байна уу гэж бодож байна. Түүний биед эм тариа хийхийг завдсан асуудал гараагүй гэдгийг хариуцлагатайгаар мэдэгдэж байна.
-Мөн өлсгөлөн зарлахаа мэдэгдээд байгаа?
-Н.Энхбаярын өмгөөлөгч О.Баасанхүү өчигдөр өглөө 07.00 цагийн үед утасдаж, өлсгөлөн зарлах болсныг нь дуулгасан. Тэгээд 10.45 цагийн үед цагдан хорих төвийн байрны даргад өлсгөлөн зарлах хүсэлтээ албан ёсоор тавьсан байна лээ. Шаардлагаа тавиад өлсгөлөн зарлах нь тухайн хоригдож буй иргэний эрх. Хамгийн гол нь бүх зүйл хууль журмын дагуу явагдах ёстой байдаг.
-Ямар журмын дагуу?
-Хууль дүрмийнхээ дагуу өлсгөлөн зарлах хүсэлтийг манай байгууллага хүлээн аваад гурван цагийн дотор холбогдох байгууллагад нь мэдэгдэх ёстой байдаг. Хэрэг шалгаж байгаа байцаагч, өмгөөлөгч, прокурорт нь мэдэгддэг. Мөн өлсгөлөн зарлахад комисс гардаг. Комисст нь төрөл бүрийн эмч нар нь оролцоод, өлсгөлөн зарлах гэж буй иргэнд шинжилгээ хийж, өвчний түүхтэй нь танилцана. Түүний дараа өлсгөлөн зарлах эсэх нь шийдэгдэнэ.
-Н.Энхбаяр шинжилгээндээ хамрагдсан уу?
-Манай хорих төвийн мэргэжлийн эмч нарын комисс томилогдсон. Харин Н.Энхбаярын хувьд Төрийн тусгай хамгаалалтын газрын эмч нарыг оролцуулан, хяналтад байсан эмч нартаа үзүүлнэ гэсэн хүсэлт тавьсан байгаа. Хэрвээ эмч нь ирэхгүй бол бид өөрсдийнхөө комиссыг оруулж, шинжилгээнд хамруулж, өлсгөлөн тавих асуудлыг нь шийднэ. Өлсгөлөн зарлаж болох бол бид хяналтаа тавин ажиллана.
-Ямар төрлийн өлсгөлөн зарласан бэ?
-Одоогоор бүтэн /хар өлсгөлөн/ гэсэн бичгэн хүсэлт тавиад байгаа.
-Өлсгөлөнгөө зогсоохгүй бие нь муудвал яах вэ?
-Ер нь өлсгөлөн зарласан иргэн хоол цай идэж, уусан тэр үеэс өлсгөлөнг зогссонд тооцно. Харин өлсгөлөнгөө зогсоохгүй бие нь муудаад байвал албадан эмчилгээ хийгдэж эхэлнэ.
-Н.Энхбаярын өмгөөлөгч О.Баасанхүү ШШГЕГ-ыг хууль бус үйлдэл гаргадаг гэж удаа дараа мэдэгддэг?
-Төв аймгийн хорих ангийн алба хаагчид хуулийг зөрчиж байна, ёсзүйгүй хүнлэг бус харьцаж байна, миний биед үзлэг нэгжлэг хийлээ гэх асуудал ярьж байна лээ. Өмгөөлөгчийн биед үзлэг нэгжлэг хийж, хармааг нь ухаж, бие хааг нь тэмтэрсэн асуудал нэг ч байхгүйг албан ёсоор мэдэгдэж байна. О.Баасанхүү өмгөөлөгчийн хувьд өдөрт очих болгондоо хэн нэгэн улс төрийн албан тушаалтны нэрийг дурьдаж, шүүхийн шийдвэр гүйцэтгэх байгууллагын цагдан хорих үйл ажиллагаанд хүндрэл учруулахыг оролдож байгаа.
-Улс төрчдийн нэрийг дурьддаг гэдгээ тодруулбал?
-Хэн нэгэн улс төрчийн нэрийг хэлж, та нар тэрний даалгавраар ажиллаж байгаа гэх мэт зүйл ярьдаг. ШШГЕГ хэн нэгэн улстөрчийн үгээр ажилладаг байгууллага биш. Хуулийн дагуу хуульд захирагдан ажиллаж байна. О.Баасанхүү өмгөөлөгч бодит байдлаас хөндий, нийгмийн сэтгэл зүйг хийсвэр байдал руу оруулаад ёс зүйгүй үйлдэл гаргаад байгаа. Тиймээс тус өмгөөлөгчийн ёсзүйтэй холбоотой асуудлаар Нийслэлийн өмгөөлөгчдийн холбоонд хандахаар шийдээд байна.
-Ярилцсанд баярлалаа Б.Чимэг
