Осама Бен Ладен 1997 оны 3 дугаар сард "СNN"-ий сурвалжлагч Петер Арнеттэй хийсэн ярилцлага түүний үзэл санааг бүх дэлхийд нээж, ХХ зууны шилдэг ярилцлага гэгдэх болсон юм. Түүний хувьд дэлхий ертөнц ислам ба түүнийг дагах ёстой орнууд гэж хуваагдах бөгөөд тэр дагалдагч байх ёстой орнууд нь тэсвэрлэшгүй АНУ ба бусад гэсэн 2 хэсэгт ангилагдана. Харин америкчуудыг тэрээр гэмтэй, гэмгүй гэж хуваахгүй. Тэд бүгд Аллахыг үгүйсгэдэг тул тэвчишгүй нүгэлтнүүд. Ноён Осама Бен Ладены энэ ярилцлагаас яг дөрвөн жил хагасын дараа юу болсныг дэлхий мэднэ. 2001 оны 9 сарын 11-ний аймшигт хэрэг явдал 3000 гаруй хүний амийг авч одсон билээ.
 
-Таныг өөрчлөлт хийхийг хүсч байгааг бид мэднэ. Хэрэв Арабын ертөнцөд таны хүсээд байгаа Исламын дэглэм тогтвол ямар нийгэм шинээр бий болох юм бэ? Куран судрын хориглогдоод байгаа дүрэм журмуудыг сэргээх үү?
-Бурхны зөвшөөрөл, түүний залбирлаар бид Арабын хойгт бурхны газар нутгийг бий болно гэдэгт итгэлтэй байна. Мухаммедийн үгийг дагавал бид бүгд энх тайван, аз жаргалтай амьдрах болно. Тийм гэж хариулъя.

-Тэр үед барууныхны талаарх таны хандлага өөрчлөгдөх үү? Газрын тос улам үнэтэй болох болов уу?
-Бид маш урт удаан жилийн, арвин түүхтэй үндэстэн. Тэртээх 15 дугаар зуунаас хойш бид бурхны өгсөн үүрэг даалгаврын дагуу ислам болон бусад үл итгэгч ертөнцийнхний хооронд болох ариун дайнд бэлдэж ирсэн. Өнгөрсөн түүхийг сөхөж харвал исламчууд тэдэнтэй эв эетэй байхын тулд олон гэрээ хэлэлцээр хийж байсан. Харин одоо тэдний хэн нь хэн бэ гэдгийг мэддэг болсон болохоор тийм гэрээ хэлэлцээр мэтийн юм хэрэггүй болсон. Тэд аль хэдийн бурхны ивээлд багтахаасаа өнгөрсөн. Газрын тосны хувьд гэвэл нэн шаардлагатай, хэрэгцээтэй салбар гэдэг нь үнэн. Үүнийг бид ч, тэд ч ойлгож байгаа. Одоогийн байгаа үнэ АНУ- ын оролцоотойгоор тогтож байгаа. Тэдний үзүүлж байгаа нөлөө газрын тосны үнэ хурдацтайгаар, огцом өсөхөд нөлөөлөөд байна. Бид бол үүнийг дангаараа зохицуулж чадна.

-Та АНУ-ын эсрэг жихад /тэмцэл гэсэн утгатай үг.орч/ хийнэ гэж мэдэгдсэн. Яагаад ингэх болов оо? Энэ тэмцэл АНУ-ын засгийн газрын эсрэг байх уу эсвэл Араб дахь америк цэргүүдийн эсрэг байх уу?
-Би АНУ-ын засгийн газрын эсрэг ариун дайн зарласан. Яагаад гэвэл АНУ-ын засгийн газар бол шудрага бус, гэмт хэргээр дүүрсэн, дур зоргоороо хэрцгий авирлагчид. Америкчууд Палестин, Ирак болон Ливанд амь үрэгдсэн хүмүүсийн өмнөөс хариуцлага хүлээх ёстой. Куана / Ливан/- д болсон дэлбэрэлтийн дараа ямар ч гэмгүй хүүхдүүдийн тасарсан толгой, гар хөл энд тэнд байсныг санах болгондоо би тэднийг хариуцлагаа үүрэх ёстой, бүр хариуг нь сайн өгөх ёстой гэж боддог. Энэ аймшигт хэрцгий гэмт хэргээрээ АНУ-ын засгийн газар хүний мөс чанар, хүн байх ёс жаягаа хөсөрдүүлсэн. Тэд дэлхийн түүхэнд өмнө нь байгаагүйгээр хэрцгий, зэрлэг авирлаж байна. Исламын ертөнцийнхөн үүнийг яасан ч зүгээр орхиж болохгүй, тэгж чадах ч үгүй. Тэд жүүдүүдийг дээрэлхэж, тэрэндээ сэтгэл ханан бардамнаж байсан ч өнөөдөр дэлхий дээр тэрбумаас олон болсон арабуудыг тэгж дарлаж чадахгүй. Дээр хэлсэн болон өөр бусад олон шалтгаанаас болоод бид АНУ-ын эсрэг жихад зарлаж байна. Бурхны ертөнцийг цэвэрлэж ариун болгохын тулд Исламын орнуудаас америкчуудыг зайлуулах хэрэгтэй болж байна. Энэ бол бидний ариун үүрэг.

-Тэгвэл Арабад амьдарч байгаа америк иргэд, АНУ-д амьдарч байгаа арабууд яах болж байна?
-Ямартаа ч Саудын Арабын газар нутгаас бүх америкчуудыг гаргахыг хүсч байна. Хамгийн түрүүнд бидний энэ тэмцэл цэргүүд рүү, арми руу чиглэнэ. Манай шашинд Аллахад итгэдэггүй хүмүүсийг хүлээн зөвшөөрдөггүй. Бид америкийн энгийн иргэдийн талаар ямар нэг зүйл төлөвлөөгүй байгаа ч аюулгүй гэсэн баталгаа өгч чадахгүй гэдгээ шууд хэлье. Яагаад гэвэл бид тэрбумаас ч илүү ислам хүмүүсийн хувь заяаг шийдэх гэж байна. АНУ цэргийн харгислалаа энгийн ислам иргэд, иракийн 600 мянга гаруй хүүхдийн эсрэг хэрэгжүүлсэн. Тиймээс тэд хариуцлага хүлээх нь зайлшгүй. Америкийн иргэд ч гэсэн хариуцлагаас зүгээр ч нэг мултарчихаж чадахгүй. Тэд Палестин, Ливан, Иракийн эсрэг явуулж байгаа гэмт хэргийг нь мэдсээр байж өөрсдөө засгийн газраа сонгосон. Бурхан тэднийг харж байгаа.

-Америкчууд цэргээ татаж авбал таны зарласан тэмцэл яах вэ?
-Тэдний явуулж байгаа бодлого зөвхөн Арабын хойгийг онилоод байгаа хэрэг биш. Дэлхий даяар байгаа исламчуудын эсрэг бодлого явуулж байна. Хэрэв үүнийгээ зогсоох юм бол бид ч зогсоно.

-Та Афганистаны дайнд оролцсон амьд гэрч. Та тэр үед чухам юу хийж байсан бэ?
-Афганистанчуудад туслах боломж өгсөн тэнгэр бурхандаа баярлалаа. ЗХУ Исламын ертөнцийн нэг хэсэг рүү дайрсан. Энэ дайн Афганистаны ах дүү нартаа туслах ёстой гэсэн эрмэлзлийг минь төрүүлсэн. Афганистан дахь тэмцэл надад арав, бүр түүнээс олон жил болсон ч ойлгохооргүй тийм зүйл зааж сургасан. Бид тэнд бульдозер, өргөгч, том ачааны машин гээд хүнд техникүүд оруулж зарим газар нь орогнох байр, зоорь, зам, эмнэлэг барьсан. ЗХУ-тай тулалдаж, эцэж ядарсан, туйлдсан биднийг америкчууд хэвлэл мэдээллийн хэрэгслээр дамжуулж мохоож байлаа. Өнөөдөр бол тэр үеийнх шиг барууныхан, ялангуяа америкчууд манай нутаг, бидний орон зай руу зүгээр нэг хөл тавьчихаж чадахгүй болсон.

-Америкчууд таныг одоо хүртэл арми цуглуулж бэлдэж байгаа, олон улсын чанартай алан хядах ажиллагаануудыг ивээн тэтгэж, дэмжиж байгаа гэдэг. Энэ үнэн үү?
-Афганистаны дайнд АНУ тийм ч их үүрэг гүйцэтгээгүй л дээ. Гэсэн ч үүний дараа АНУ өөрийгөө дэлхийн хамгийн хүчирхэг нь, захирагч нь хэмээн нэрлэж, тэгж харагдуулахыг хичээх болсон. Ингэж хүмүүсийн толгойг эргүүлж, төөрөгдүүлж чадвал дураараа дургиж, хүссэнээ хийж болно гэж бодсон байх. Би бол та нар том андуурч байна гэж чанга хэлмээр байна. Энэ өдөөн хатгалга нь бидний хор шарыг улам хөдөлгөсөн. Өт ч гэсэн биенд нь хүрэхээр атирдаг биз дээ?

-Та тэгэхээр хүлээн зөвшөөрч байна гэсэн үг үү?
-Манай газар нутгийг эзэлж, байгалийн баялагийг маань хулгайлж, бидний толгойг эргүүлэх гэж оролдож байгаа тэдний үйлдлийг бурхан хэзээ ч хүлээн зөвшөөрөхгүй. Хэрэв бид тэдэн шиг зүйл хийх юм бол алан хядагчид гэж нэрлэгдэх болно. Үгүй гэж үү? Америкчууд хөөрхий ядуу палестин хүүхдүүдээс эх орныг нь булааж авсан. Энэ бол америкчуудын хийсэн зэвүү хүрэм үйлдлүүдийн наад захын жишээ. Цаана нь өчнөөн олон бий. Хэрэв палестин жаалууд эх орныхоо төлөө Израиль руу чулуу шидвэл бас л террористуудын эгнээнд орно гэсэн үг. Израилын онгоцууд Ливан дахь НҮБ-ын байрыг бөмбөгдөж олон арван эмэгтэйчүүд, хүүхдүүдийг алсан байхад яагаад алан хядагч гэж дуудахгүй байгаа юм бэ? Шударга байна гэж үү? Эрхийнхээ төлөө тэмцэх нь гэмт хэрэг гэж үү? Ингээд бодохоор дэлхий дээрх хамгийн өөдгүй гэмт хэрэгтнүүд чинь АНУ-ын засгийн газар болж таарч байгаа биз? Тэд Японд хүүхэд, хөгшид, эмэгтэйчүүдийг ч хайхралгүй асар хортой атомын бөмбөг хаясан. Иракийн мянга мянган хөвгүүд охид хоол, эмийн гачигдлаас болж харамсалтайгаар хорвоог орхиж байгаа нь ч тэдэнд хамаагүй. Тэгэхээр бурхны өмнө бид бардмаар АНУ-г буруутгаж чадна.

-Танай гэр бүл Саудын Арабын хүчирхэг, баян гэр бүлүүдийн нэгт ордог. Тэд, эсвэл Саудын Арабын засгийн газар таныг зогсоохыг, болиулахыг оролдохгүй байна уу?
-Тэд маш олон удаа оролдож үзсэн. Тэд манай компанийн үйл ажиллагаа /Саудын Арабын барилгын том констракшн "Бен Ладен Групп"-ийг хэлж байна. орч/ гээд олон зүйлд мөнгөөр дарамт шахалт үзүүлж байсан. Над руу ээж, ах дүү, авга ахыг маань явуулж Араб руу эргэж ирээд, Фаад хаанаас уучлал хүс гэж ятгаж ч байсан. Би гэрийнхнээсээ эелдэгхэн уучлалт гуйгаад, надтай уулзахаар ирсэнд баярлалаа л гэдэг дээ. Мэдээж тэд намайг гэр бүлийнхэнтэй маань муудалцуулах гэсэн санаа давхар агуулж байгаа нь гарцаагүй шүү дээ. Энэ бүхэн Аллахын тааллаар л зогсох байх. Үгүй гэсэн хариулт аваад тэд миний иргэний үнэмлэх гээд бүх бичиг баримтыг хүчингүй болгож Саудын Арабын хэвлэлээр миний зургийг тараасан. Тэд исламчууд шашнаа худалдана гэж бодож байгаа байх. Гэхдээ хэзээ ч тийм зүйл болохгүй. Биднийг ийм сайхан мод, уул устай газар амьдрахыг зөвшөөрсөн Аллахад талархдаг. Түүний өгсөн газар нутгийг бид амиараа боловч хамгаалах нь зүй ёсны хэрэг. Аллахаас илүү хүч гэж байхгүй.

-Ноён Бен Ладен, Саудын Арабынхан таныг алах гэж оролдохгүй байна уу? АНУ-ын засгийн газар ч бас таныг онилчихсон байгаа шүү дээ. Таныг хүлээж буй эрсдэл ихтэй, аюултай амьдралаас айхгүй байна уу?
-АНУ-ын засгийн газрын дарамт шахалт нууц биш шүү дээ. Саудынхан бол америкчуудаас шалтгаална. Долоо, найман жилийн өмнөөс л тэд намайг баривчилж, алахыг оролддог байсан. Гэхдээ Аллахын авралаар нэг нь ч бүтээгүй. Амьдралаас айгаад, эсвэл юунд ч итгэхгүй байх юм бол яаж өөрийнхөөрөө сэтгэж, зорилгынхоо төлөө явах юм бэ? Аллахын ивээл зарлиггүйгээр та нар нэг ч амьсгалж чадахгүй. Түүний төлөө өөр хэн нэгний амийг хороох, эсвэл амиа алдах нь хэд дахин амьдрахаас ч илүү гэдэгт бид итгэдэг. Бидэнд айх зүйл байхгүй.

-Цаашид юу хийхээр төлөвлөж байна даа?
-Бурхны гэрээслэсэн тэр зүйлийг та нар дараа нь зурагт, сониноос харах болно.

-Хэрэв та АНУ-ын ерөнхийлөгч Клинтонд ямар нэг зүйл хэлэхийг хүсч байгаа бол юу гэж дамжуулах вэ?
-Клинтон бас Америкийн засгийн газрын нэрийг дурсах болгонд миний дургүй хүрч, зэвүүцэл төрдөг. Нээрээ шүү. Яагаад гэвэл тэдний нэр бидэнд нэг нас ч хүрээгүй бяцхан хүүхдийн гар хөл, толгой нь тасарсан биеийг өөрийн эрхгүй санагдуулдаг. Гартаа зэвсэг бариад хүүхдүүдийг алж байгаа израильчуудын дүр нүдэнд харагддаг. Тэр аймшигтайгаар алагдсан хүүхдүүдэд хэн ч урьдчилж сануулаагүй, нэг ч үг хэлээгүй. Тиймээс Клинтонд бид юу ч хэлэхгүй. Харин өөрсдийн хүүгээ буу бариулаад наашаа явуулсан америк эхчүүдэд хэлье. Хүүхдүүдийнхээ Саудын Арабын террористуудад алуулж, үхсэн биеийг нь буцааж авахыг хүсэхгүй байгаа бол тэднийгээ зогсоо. Израильчуудыг өдөөн хатгасан ч Аллахын авралаар та нар исламчуудыг хагалан бутаргаж чадахгүй.