Цагаандавааны хогийн цэгт амьдардаг иргэн болон хоёрдогч түүхий эдийн ченжтэй хэсэгхэн хугацаанд ярилцсанаа хүргэе.

-Та хэзээнээс энд ирж хоёрдогч түүхий эд түүж байна вэ?

-Манайх өнгөрсөн жил хөдөөнөөс орж ирээд цагаандавааны хогийн цэг дээр ирж буусан. Одоо эндээ амьдарч байна. 

-Манайх гэхээр гэр бүлээрээ байдаг гэсэн үг үү. Хэн хэнтэйгээ байдаг юм бэ?

-Нөхөр, гуч гарсан хүүтэй гуравуулаа л ажиллаж, амьдарч байна.

-Энд бага насны хүүхэд нэлээд харагдаж байна. Ойролцоогоор хэдэн хүүхэд байдаг бол?

-Яг тоолж бол үзээгүй. Гэхдээ 30-40 хүүхэд л лав байгаа. Бас амралтын өдрүүд, сургуулийн амралт зэргээр хүүхдүүд маш ихээрээ ирдэг. Эгч нь үүнд л их харамсах юм даа. Цэцэг цэврүү шиг насандаа эцэг эхийн хайранд умбаж юугаар ч тутахгүй өсөх ёстой балчирхан амьтад энэ хогийн цэг дээр өсч байгаа нь үнэхээр аймшигтай. Бид ч нас дээр гарсан хүмүүс болохоор дуусч.  

-Өглөө хэдэнд цагаас ажилдаа гарч хэдэд буудаг вэ?

-Үүр цайж гэгээ орохоос эхлээд л харанхуй болтол ажилладаг. 

-Нууц биш бол өдөрт хэдэн төгрөгийн орлоготой байдаг вэ?

-Бид гурав сайн түүсэн өдөртөө бараг 100 мянган төгрөгтэй буудаг.

Хоёрдогч түүхий эдийн ченж Б.Гантулга: Өдөрт 2-5 портер хоёрдогч түүхий эд авдаг

-Та түүхий эдийн бизнес эрхлээд хэдэн жил болж байна?

-Цагаандавааны хогийн цэгийг нээгдсэн үеэс эхлэсэн. Өглөө эрт уутыг нь тарааж өгчихөөд орой гурван цагт ирж түүхий эдээ худалдаж авдаг.

-Та яг ямар төрлийн дахивар бүтээгдэхүүнийг хэдэн төгрөгөөр худалдан авдаг вэ?

-Хуванцар савыг нэг кг-ыг нь 200-350, Хайлш-500, зузаан гялгар уут 200, зэс гууль 2500-3000 төгрөөр авдаг. Харин нэг ширхэг архи, пивоны шил 60-100 төгрөгийн үнэ ханштай байдаг. 

-Түүхий эдийн үнэ хямдарсан. Зарим нэгэн түүхий эдийг авахаа больсон гэж сонслоо. Энэ талаар яриач?

-Тийм ээ. Сүүлийн үед цаасан хайрцаг, огурцы, алаг салатны шил зэргийг авахаа больсон. Эндээс авсан түүхий эдээ Орбитод аваачиж тушаадаг. Тэндэхийн хятадууд авахгүй болохоор бид хаанаа тушаах билээ. Тэгээд л авахаа больсон. Үнийн хувьд ч гэсэн адилхан. Ер нь хоёрдогч түүхий эдийн зах зээл, ханшийг таван хятад хүн л барьж байна шүү дээ. Гэхдээ эндээс түүхий эд авдаг манай нөгөө ченж бид хоёр харицангуй өндөр үнээр авдаг.

-Энэ дээр байгаа хүмүүс ч гэсэн та хоёрт ам сайтай байдаг юм билээ. Эдгээр хүмүүсийн итгэлийг яаж олов?

-Эд нар ч гэсэн бидэнтэй адилхан хүмүүс. Амьдрахын эрхээр ингэж яваа тэднийг буруутгах аргагүй. Худлаа хэлж хулгай хийлгүй өөрсдийн хүч хөдөлмөрөөрөө амьдарч байгаа хүнд хэн дургүй байх билээ дээ.

-Өдөрт хэдэн портер хоёрдогч түүхий эд авдаг вэ?

-Өдөр болгон адилхан байдаггүй. Бүх зүйл л түүгч нараас шалгаалдаг. Зарим өдөр  хоёр портерыг гаргаж байхад зарим үед таван портерыг ч авах өдөр тохиолддог.

-Та нараас бас мөнгө зээлдэг гэж сонссон. Мөнгөө өгөхгүй тохиолдол гарах уу?

-Үгүй ээ. Харин ч яг хэлсэндээ өгдөг шүү.

Б.Батчимэг