Өмнөговь аймгийн Эрүүл мэндийн газрын дарга Ч.Баяржаргал:
Өмнөговь аймгийн Эрүүл мэндийн газрын дарга Ч.Баяржаргалтай уулзаж Улаанбурханы өвчлөл болон аймгийн хэмжээнд эрүүл мэндийн тусламж үйлчилгээг иргэдэд хэрхэн хүргэж байгаа талаар ярилцлаа.
-Өнөөдрийн байдлаар аймгийн хэмжээнд Улаанбурхан өвчний хэдэн тохиолдол бүртгэгдээд байна вэ. Энэ талаар яриагаа эхэлье?
-Манай аймагт Улаанбурхан өвчний 212 сэжигтэй тохиолдол бүртгэгдээд байна. Үүнээс 20 тохиолдол нь ХӨСҮТ-ийн Вирус судлалын лабораториар батлагдсан. Эдгээр хүмүүсээс өнөөдрийн байдлаар 24 хүн БОЭТ-д хэвтэн эмчлүүлж байна.
-Улаанбурхан өвчнөөр өвчилсөн хүмүүсийн насны хувьд аль насныхан илүү өвчилөөд байна бэ?
-Манай аймгийн хувьд энэ өвчнөөр өвчилсөн хүмүүсийн дийлэнх хувь нь насанд хүрсэн хүмүүс өвчилсөн. Харин энэ өвчнөөр өвчилсөн хүүхдүүдийг вакцинжуулалтад хамрагдсан эсэх талаар нь бүртгэл судалгааг хөтлөн явуулж байгаа. Ингэхэд өвчилсөн хүүхдүүдийн нэлээд хувийг товлолын вакцин хийлгэхээс өмнөх насны буюу есөн сар хүрээгүй, эсвэл хоёрдахь тунгаа авч бүрэн тархлаажаагүй хүүхдүүд өвдсөн байсан. Харин цөөн тохиолдолд хоёр тун вакциндаа хамрагдсан хүүхэд өвчилсөн. Тэдгээр хүүхдүүдэд вакцинд хаана, хэзээ хэрхэн хамрагдсан эсэх, ямар учраас өвчилсөн гэдгийг тандаж, судлах ажлыг зохион байгуулж байна.
-Улаанбурхан өвчнөөр өвчилсөн хүмүүсээс хүндэрсэн тохиолдол байгаа юу?
-Байгаа. Бид хүндэрсэн дөрвөн өвчтөнөө аймгийн бүсийн эмчилгээ оношилгооны төвийн халдвартын тасагт хэвтүүлэн эмчилж, шаардлагатай тохиолдолд ХӨСҮТ-өөс зөвлөгөө мэдээлэл авч, яаралтай түргэн тусламжийн үйлчилгээг үзүүлэн ажиллаж байна. Мөн шаардлагатай эм тариаг тасалдуулахгүй байх арга хэмжээг авсан.
-Сүүлийн жилүүдэд иргэд вакцинжуулалтад хүүхдүүдээ хамруулахаас татгалзах болсон гэх мэдээлэл байдаг. Танай аймгийн хувьд хүүхдүүд товлолын дагуу вакцинд хамрагдаж байна уу?
-Манай аймгийн хувьд товлолын дагуу вакцинжуулалт хамрагдах явдал 95-аас дээш хувьтай байдаг.
-Тэгвэл урьдчилан сэргийлэх вакцины хэмжээ хүрэлцээтэй байгаа болов уу?
-Товлолын дагуух вакцины хэмжээ бол хангалттай байгаа. Харин Улаанбурхан өвчний нэмэлт дархлаажуулалтыг ХӨСҮТ-тэй хамтран хийхээр хүүхдүүдийнхээ судалгааг авч байна. Харин яг хэзээнээс эхлэх талаарх мэдээлэл бидэнд ирээгүй байгаа.
-Танай аймгийн хэдэн суманд энэ өвчний шижигтэй тохиолдол бүрдгэгдээд байгаа вэ. Энэ талаар тодруулаач?
-Сүүлийн өдрүүдэд орон нутагт Улаанбурхан өвчний сэжигтэй тохиолдол бүртгэгдэх явдал нэлээд нэмэгдэж байна. Одоогоор найман суманд энэ өвчний сэжигтэй тохиолдол бүртгэгдсэн. Гэхдээ өвчин бүртгэгдсэн бүртгэгдээгүй сум болгонд энэ өвчний үед авч хэрэгжүүлэх арга зүйн зөвлөгөө зөвлөмж хүргэгдсэн байгаа. Ер нь Улаанбурхан өвчний үед хийгдэх эмчилгээ оношилгоонд стандарт байдаг. Бид тэр стандартынхаа дагуу ажиллаж байгаа гэдгийг хэлэх нь зүйтэй байх.
-Энэ өвчнөөс урьдчилан сэргийлэх талаар ямар арга хэмжээ авч ажиллаж байна вэ?
-Бид анх энэ өвчний сэжигтэй тохиолдол бүртгэгдсэн үеэс иргэдийн дунд энэ өвчнөөс сэргийлэх мэдээлэл сурталчилгааг хийж, эрүүл мэндийн ажилтнууддаа өвчний талаарх шуурхай мэдээллийг өгч ажиллахыг үүрэг даалгавар болгосон. Түүнчлэн аймгийн Засаг даргын захирамж гарсан байгаа. Захирамжинд олон нийтийг хамарсан арга хэмжээнүүдийг хязгаарлах, сумдын Засаг дарга нар болон иргэд, байгууллага, аж ахуйн нэгжүүдэд энэ өвчний дэгдэлт нэмэгдсэн үед ямар арга хэмжээ авч ажиллах, тэндэнд ямар үүрэг хүлээлгэх зэрэг заалтуудыг тусгасан. Ер нь аймгийн Эрүүл мэндийн газар, Онцгой байдлын хэлтэс, Засаг даргын Тамгын газар шуурхай арга хэмжээ авч ажиллаж байна. Сумдын Засаг дарга, эрүүл мэндийн салбарын удирдлагуудтай энэ өвчний талаарх мэдээллийг шуурхай хүргэх зорилгоор теле хурал зохион байгуулж байна.
-Танай аймгийн хувьд ямар өвчлөл илүү зонхилж байна вэ. Энэ талаар тодруулаач?
-Статистик мэдээллээс харахад Өмнөговь аймгийн хүн амын дунд амьсгалын замын өвчлөл зонхилдог.
-Танай аймгийн хувьд сүүлийн жилүүдэд хүн амын өсөлт огцом нэмэгдсэн гэдгийг холбогдох албаны хүмүүс хэлдэг. Тэгвэл хүн амд эрүүл мэндийн үйлчилгээг түргэн шуурхай хүргэхэд техник тоног төхөөрөмж, ажлын байр хэр хангалттай, хүрэлцээтэй байдаг вэ?
-Эмнэлгийн тусламж үйлчилгээг иргэдэд хүргэхэд эрүүл мэндийн салбарын дэд бүтэц харилцан адилгүй сул хөгжсөн байдаг. Гэхдээ манай аймагт өнгөрсөн жил аймгийн төв Даланзадгад суманд Бүсийн оношилгоо эмчилгээний төвийн дэргэд 50 ортой амаржих газар ашиглалтад орсон. Энэ онд Ханбогд, Цогтцэций суманд 50 ортой эмнэлгийн шинэ барилгыг ашиглалтад оруулахаар ажиллаж байгаа.
-Дээрх сумдын эмнэлгийн барилгын ажил хэдэн хувьтай явагдаж байгаа бол. Санхүүжилт нь хаанаас орж ирж байгаа юм бол?
-Эдгээр сумдын эмнэлгийн барилгыг улсын төсвөөс санхүүжүүлж байгаа. Ханбогд сумын эмнэлгийн барилгын ажлыг улсын комисс хүлээж авахаар ажиллаж байгаа. Харин Цогтцэций сумын эмнэлгийн барилгын ажил нэлээд удааширч болзошгүй байна. Учир нь дээрх барилгын сүүлийн санхүүжилт аравдугаар сард орж ирэхээр төсөвт батлагдсан нь барилгын ажил удаашрахад нөлөөлнө гэдгийг гүйцэтгэгч компани хэлээд байгаа.
-Тэгвэл орон нутгийн төсвөөр эрүүл мэндийн салбарт ямар бүтээн байгуулалт хийж байна вэ?
-Өнгөрсөн онд Хүрмэн сумын эрүүл мэндийн төвийн өргөтгөлийн барилгыг барьж эхлээд одоо улсын комисс хүлээж авахад бэлэн болоод байгаа.
-Аймгийн хэмжээнд эмнэлгийн барилгын тал дээр хүндрэлтэй сум байгаа юу. Ер нь эрүүл мэндийн тусламж үйлчилгээг иргэдэд хүргэхэд тулгарч байгаа хүндрэл бэрхшээл юу байна вэ?
-Баян-Овоо сумын эрүүл мэндийн төв нэлээд олон жилийн өмнө баригдсан хуучин барилгатай болохоор шинэчлэх шаардлагатай байгаа. Бусад сумдын хувьд энэ асуудал харьцангуй шийдэгдсэн. Харин сүүлийн жилүүдэд уул уурхайг дагаад хүн амын өсөлт нэмэгдсэн, янз бүрийн өвчлөл ихэссэн учраас эм, тарианы хүрэлцээ жаахан муу байгаад байна. Түүнчлэн түргэн тусламж үзүүлэх шаарлагатай дуудлага олноор ирдэг болохоор шатахууны хүрэлцээ ч тааруу байдаг даа.
Ярилцсанд баярлалаа
24tsag.mn Б.Батчимэг