МАХН-ын дарга Н.Энхбаярын хэргийг Нийслэлийн прокурорын газраас харьяалал тогтоолгохоор Улсын дээд шүүхэд шилжүүлсэн.МАХН-ын дарга Н.Энхбаярын хэргийг Нийслэлийн прокурорын газраас харьяалал тогтоолгохоор Улсын дээд шүүхэд шилжүүлсэн. Уг хэргийг маш хурдан шилжүүллээ гэх хүн олон байв. Түүнчлэн Н.Энхбаяр өөрийг нь батлан даалтад гаргах хүртэл өлсгөлөнгөө зогсоохгүй хэмээн мэдэгдээд байгаа юм. Энэ талаар Нийслэлийн прокурорын газрын орлогч Е.Сагсайтай ярилцлаа.-МАХН-ын дарга Н.Энхбаярын хэргийг Улсын дээд шүүх рүү шилжүүлсэн гэсэн?
-Энэ сарын 10-ны өдөр Эрүүгийн хуулийн тусгай ангийн 150 дугаар зүйлийн 150.3, 263 дугаар зүйлийн 263.2 дахь хэсэгт зааснаар яллах дүгнэлт үйлдэж, хэргийг хянан шийдвэрлэх шүүхийн харъяалал тогтоолгохоор Улсын дээд шүүхэд хүргүүлсэн байгаа.
-Ер нь хэргийг хэзээнээс шалгаад ийм хурдан шүүх рүү шилжчихэв ээ?
-Н.Энхбаярыг өнгөрсөн оны арваннгэдүгээр сарын 19-ны өдрөөс эхлэн сэжигтнээр тооцон, долоон сар гаруй шалгасан. Тэгээд энэ оны өнгөрсөн нэгдүгээр сарын 20-ны өдөр Эрүүгийн хуулийн тусгай ангийн 150 дугаар зүйлийн 150.3 дахь хэсэгт зааснаар эрүүгийн хэрэг үүсгэсэн.
-Хэргийг АТГ-аас шалгасан уу?
-Түүний хэрэгт Улсын мөрдөн байцаах газар болон Авлигатай тэмцэх газрын хамтарсан ажлын хэсэг мөрдөн байцаалтын ажиллагаа явуулсан. Тэгээд тус ажлын хэсэг зохих шалгалтыг хийж дуусган яллах дүгнэлт үйлдүүлэх саналтай прокурорт ирүүлсэн.
-Тэрээр өөрийг нь хууль бусаар хорьсон хэмээн өлсгөлөн зарлаад байгаа?
-Мөрдөн байцаах ажиллагаа хуульд заасан үндэслэл журмын дагуу явагдсан. Мөн мөрдөн байцаагчийн саналыг үндэслэн прокурор шүүхэд танилцуулж, шүүхийн шийдвэрээр Н.Энхбаярыг цагдан хорьсон. Н.Энхбаяр энэ сарын 4-ны өдөр хуурай өлсгөлөн зарлаад бие нь муудсан учраас Эрүүл мэндийн яамны төрийн нарийн бичгийн даргын 2012 оны 05 дугаар сарын 04-ний өдрийн 144 тоот тушаалаар томилогдсон мэргэжлийн эмч нарын баг 2012 оны 05 дугаар сарын 05-ны өдөр зөвлөлдөж, Н.Энхбаярт холбогдох шинжилгээг яаралтай хийлгэх дүгнэлт гаргасны дагуу Улаанбаатар хот дахь Цагдан хорих төвийн эмнэлэгт шилжүүлж авчирсан юм. Мөн 2012 оны 05 дугаар сарын 07-ны өдөр дээрх эмч нарын хамтарсан үзлэгээр Н.Энхбаярыг дараагийн шатлалын эмнэлэгт шилжүүлэх тухай гаргасан зөвлөмж болон түүний гэр бүл, өмгөөлөгчийн хүсэлтийг үндэслэн 2012 оны 05 дугаар сарын 09-ний өдөр Улсын клиникийн нэгдсэн хоёрдугаар эмнэлэгт хүргэсэн байна.
-Эмч нарын зүгээс албадан эмчилгээ хийх хэцүү байна гэх мэдээлэл хийсэн. Ер нь албадан эмчилгээг ямар байгууллага хариуцан хийх үүрэгтэй юм бэ?
-Сэжигтэн, яллагдагчийг баривчлах, цагдан хорих шийдвэрийг биелүүлэх тухай хууль болон баривчлах цагдан хорих байрны дотоод журамд өлсгөлөн зарласан этгээдийн амь насанд аюул учирч болох тохиолдолд эмчийн дүгнэлтийг үндэслэн албадлагын арга хэмжээ авч болохыг тодорхой заасан байгаа. Эрүүл мэнд нийгмийн хамгааллын сайд, Хууль зүйн сайдын 1999 оны А/26, 10 тоот хамтарсан тушаалаар баталсан “Өлсгөлөн зарласан үед эмнэлгийн үйлчилгээ үзүүлэх заавар”-т зааснаар өлсгөлөн зарлагчийн өвчин эмгэг хүндрэх тохиолдолд албадан эмчилгээнд оруулах үүргийг Шүүхийн шийдвэр гүйцэтгэх байгууллага хүлээдэг.
