УИХ-ын гишүүн, Хамуг Монгол, хөдөлмөрийн намын тэргүүн Ц.Шинэбаяртай ярилцлаа.

-    Монгол Улсын гадаад өрийн тухай таны мэдээллийг  Засгийн газар үгүйсгэсэн. Та яг ямар баримтад тулгуурлаж 9.6 тэрбум гэдэг тоог хэлсэн юм бэ?
- Энэ нь Монгол банкны албан ёсны вэб сайт дээр байгаа мэдээлэл. Монгол улсын гадаад өр 9.6 тэрбум  хүрчихсэн. Сү.Батболдын Засгийн газар үүнээс зөвхөн өөрийнхөө тавьсан өрийг салгаж яриад байгаа юм. Улсын гадаад өр гэдэгт Засгийн газар, аж  ахуйн нэгж, хувь хүн, хувийн хэвшлийн өр давхар ордог. 2009 оны эдийн засгийн  хямралаар Исланд улс гадаад өр зээлэндээ идэгдэж, сүйрсэн түүх бий. Үүнтэй адил явдал Монголд болохгүй гэх баталгаа алга

- Таныг төдийгүй ХМХН-ыг Н.Энхбаяраас шууд хараат гэх юм?
- Хараат гэж ярих юм бол эрх баригч нам өөрөө гадаадын хараат байдалд орсон ш дээ. МАН одоо шийдчихсэн эдийн засгийн алуурчдын гарт байгаа. Тухайлбал, Сү.Батболд “South gobi sands”-тэй холбоотойгоор Төрийн эзэмшлийн хувь хэмжээг тогтоож чадахгүй дүлэгнэсээр байгаа нь тэр өөрөө эдийн засгийн алуурчин, урд зүгээс хараат гэдгийг л нотолж байгаа биз дээ. Моннис гэж компани Овоот толгойн ордод хувь эзэмшиж байгаагийн ард тэр л байгаа ш дээ. Төсвийн хөрөнгөөр 24 км замыг Моннисээр тавиулж, “South gobi sands”-ийн хувьцааны үнэлгээг өсгөх боломжийг нээсэн энэ тэр гээд олон асуудлаар Сү.Батболд Чалкотой холбогдож байгаа.

 - Ц.Нямдоржийг огцруулах асуудлыг МАН-ы гишүүд тавьсан нь цагийн гарз болж хувирлаа?
 - МАН Ц.Нямдоржоосоо авахуулаад өнгөрсөн дөрвөн жилд бүгд огт ажил хийгээгүй. Ц.Нямдоржийг авч үлдсэн нь гэм нэгтэй учраас үхсэн ч хамтдаа гэсэн л үг. Стратегийн орд газраас олдог ашгаа хувааж иддэгээ нуухын тулд хийж байгаа ажил.  Цахим үнэмлэхийг ийм бүтэлгүй хүнд даалгасан юм чинь үр дүн нь ямар гарах нь мэдээж  байсан.

 - Ц.Нямдоржийг авч үлдэх нь МАН-д намынх нь нэр хүндээс илүү байна,  тийм үү?
 - Гэмт хэрэгтнүүдтэй намын нэр хүнд ярина гэж юу байх юм бэ. МАН бол гэмт хэрэгтнүүдийн нам гэдгийг би олон удаа хэлж байгаа шүү.  Тавантолгойн хувьцаа үлгэр  болох нь тодорхой боллоо. Ярихдаа том Тавантолгой гэж ярьчихаад өгөх болохоороо 1 толгойных нь 10 хувийг ард түмэнд тараана гээд байгааг зөвшөөрөх боломжгүй. Цэвэр хууран мэхлэлт. Одоо гаргаад тавьж байгаа мөрийн хөтөлбөрийг нь харахаар бүх амлалт нь үргэлж ирээдүй цаг дээр байна лээ. Өнгөрсөн цаг дээр ярих юм бол бөөн хулгай луйвраа илчлэх юм болж хувирна. Одоо цаг дээр яръя гэхээр хийсэн юм түй ч байхгүй. 2030 он гээд л ирээдүй цаг дээр ярина. 1,3 сая төгрөгийн цалинтай болгоно гэдэг бол бүр ч бүтэхгүй амлалт шүү. Улсынхаа төсвийн 70 хувиар цалин тавьчихаар 30 хувиар нь юугаа хийх болж байна аа? Төсвийн тухай хуульд байгаа ш дээ. Төсөвт цалингийн эзлэх хэмжээ 11 хувиас хэтрэхгүй гээд. Гэтэл ялах ямар ч боломжгүйгээ мэдэхээрээ үхэхдээ үхэр буугаа тавина гэдэг болж ийм бүтэхгүй амлалтаар сонгогчдыг хуурах гэж байна. За, тэр 100 мянган айлын сууц нь баригдаагүй байхад 200 мянган  айлын орон сууц гээд ярих нь хууран мэхлэлт л биз дээ. Миний хувьд энэ дүүрчихсэн гэмт хэрэгтнүүдээс эрт салчихсан хүн. Тийм гэмт хэрэгтнүүдийн бүлэг дотор байж хам хэрэг үйлдэхийг хүсэхгүй л байна шүү.

-    Ирэх сонгуулийн дүнг таамаглаж байна уу?
-    Судлагааны дүнгүүдийг харж л байна. Ардчилсан нам ялах нь тодорхой болчихож. ХМХН-ын хувьд 2-3 суудал авна гэсэн зориттой байгаа. Ардчилсан нам ялсан ч дийлэнх олонхи болж чадахгүй дүр зураг байна. Ийм болохоор бидэнтэй хамтрах талаар эртнээс бодож байхад гэмгүй шүү гэдгийг л хэлье.