Засгийн газрын зарим сайд нарыг томилох ажил улс төрийн хүрээнд ид өрнөж байна. Засагт хамтрах  АН болон “Шударга ёс” эвслийнхэн аль яамыг хэнд өгөх асуудлаар дотооддоо ярилцаж шийдвэрлэсэн ч ихээхэн нууцалж байгаа юм. Яг одоо хоёр бүлгийн Засагт хамтрах асуудлаар зөвшилцөх ажлын хэсгийнхэн уулзаж байна. АН-ынхан дөрвөн сайдын суудлыг авна гэж байгаа бол “Шударга ёс” эвсэл гурван сайдын суудлыг авна гэсэн саналыг гаргаад байгаа аж. Одоо эцсийн шийдвэр яаж гарахыг л хүлээх үлдээд байна. Ийнхүү янз бүрийн мэдээлэл Төрийн ордонд яригдаж байх үеэр МҮАН-ын дарга М.Энхсайханаас цаг үеийн асуудлаар зарим зүйлийг тодрууллаа.

- Таны одоогийн эрхэлж буй Монгол улсын сайдын албан тушаалыг татан буулгана гэсэн мэдээлэл байна. Энэ үнэн үү?

- Миний ажлыг Ерөнхий сайд дүгнэнэ. Тийм учраас Ерөнхий сайдын өгсөн үүрэг чиглэлийн дагуу би ажлаа хийгээд явж байна.

- Засгийн газарт хамтрах асуудлаар улс төрийн намуудын хооронд зөвшилцөл, хэлэлцээр хийгдэж байгаа. Хэлэлцээр одоогоор ямар түвшинд явж байна вэ?

- Хэлэлцээр яг одоо хийгдэх гэж байна. Эцсийн үр дүнг нь хүлээе.

- Танай намын хувьд ямар байр сууринаас хандаж байгаа вэ?

- Намаас илүү УИХ дахь бүлгүүдийн хоорон дахь асуудал.

- “Шударга ёс” эвслийн бүлгийн шийдвэрийг хүлээж байна гэж АН мэдэгдсэн?

- Манай бүлгээс хамаарч байгаа асуудал огт байхгүй.

- Эвслийг бүрдүүлж буй хоёр нам нэгдмэл байр суурьтай байгаа юм уу?

- Нэгдмэл байгаа.

- Танай бүлэг сайд нарыг томилох асуудлаар ямар тодорхой саналтай байна вэ?

- Тодорхой саналыг ажлын хэсэг нь хэлэлцээрийн үеэр ярих байх.

- Танай бүлэг хэдэн сайдын суудал авна гэсэн төлөвлөгөөтэй байгаа вэ?

- Манайх хэдийг авна гэхээсээ илүү АН-ын саналыг хүлээж авч байгаа. АН анхнаасаа гурван сайдын суудлыг санал болгосон.

- Яамдуудын тухайд?

Яамдын хувьд бид элдвээр ялгаварлаж, ангилсан зүйл байхгүй.

- Хэлэлцээр яагаад удаашрах болов?

-Том намын дотоодын том зовлон л байгаа байлгүй дээ.

Т.Хулан