Шарын гол хувьцаат компани нийслэлчүүдийг чанартай, тортоггүй, хямд үнэтэй нүүрсээр хангахаар болсон билээ. Энэ асуудлаар тус компанийн Борлуулалт, маркетингийн хэлтсийн дарга М.Цэнгэлтэй ярилцлаа.
-Танай компани нүүрсээ анх удаа нийслэлчүүдэд худалдаалах гэж байна уу. Өмнө нь ийм борлуулалт хийж байв уу?
-Манай Шарын голын нүүрсний уурхай нь 50 жил тасралтгүй үйл ажиллагаагаа явуулж, төвийн эрчим хүчний салбарыг нүүрсээр хангаж ирсэн билээ. Манай компани үйл ажиллагаагаа тэлж, шинэлэг технологи ашиглан нэмүү өртөг шингэсэн бүтээгдэхүүн бий болгохоор хэд хэдэн төсөл хэрэгжүүлж байна.
Тухайлбал, хагас коксжуулах, утаагүй шахмал түлшний үйлдвэрийг Дархан хотод, мөн нүүрс баяжуулах үйлдвэрээ амжилттайгаар ашиглалтанд оруулаад байна. Нүүрсний чанараа сайжруулснаар бид өмнө орж байгаагүй гуравдагч зах зээл рүү ханцуй шамлан орж байна.
Бид Дарханд өнгөрсөн жил нүүрсний жижиглэнгийн худалдаа хийсэн. 20 болон 40 кг-ын шуудайтайгаар, тогтвортой үнээр худалдаалж эхэлсэн. Энэхүү туршлагадаа үндэслэн бид энэ жилээс Улаанбаатар хот, Дархан хотод нүүрсээ жижиглэнгээр худалдаалах төслөө эхлүүлээд явж байна. Өнөөдрөөс эхлэн манай нүүрс Улаанбаатар хотод бууж байна. Манай компани энэ жил анх удаа нийслэл хотдоо Шарын голын нүүрсийг албан ёсоор борлуулах төсөл ийг хэрэгжүүлж эхлээд байна.
-Нийслэлчүүдэд жижиглэнгээр худалдаалах нүүрсний чанарын хувьд ямар байна вэ?
-Өнгөрсөн хоёрдугаар сард бид Монголын залуучуудын холбоотой хамтран нийслэлийн зургаан дүүргийн нэн ядуу 60 өрхөд нүүрс хандивлан, тусламж үзүүлсэн. Өнгөрсөн жил бид Дархан хотод ч тэр жижиглэнгийн борлуулалт хийж үзсэн бөгөөд нүүрсний чанарт иргэд өндөр үнэлгээ өгсөнд бид маш их сэтгэл хангалуун байснаар төслийг цаашид Улаанбаатар хотод хэрэгжүүлэх итгэл олж авсан юм. Манай нүүрсний хувьд 4500-4800 ккал чанартай, ахуйн болон үйлдвэр, уурын зууханд ч ашиглах боломжтой юм.
Дашрамд хэлэхэд, бид энэ жил Улаанбаатарт нүүрсээ жижиглэнгээр худалдаалахдаа зузаан, чанартай, өнгө үзэмжтэй, цагаан өнгөтэй шуудайг ашиглана. Ингэхдээ манай компанийн лого, галын аюулаас сэрэмжлүүлсэн санамж бичигтэй, холбогдох утасны дугаар гэх зэргийг бичсэн шуудайнд нүүрсээ савласан байна.
-Улаанбаатарын 200 гаруй цэгт худалдаална гэсэн. Шарын голын нүүрс худалдаалж байна гэсэн таних тэмдэг бий юу?
-Манайх өөрийн цэг бүрт таних тэмдэгтэй. Манай залуус дүүргүүдийн цэгүүдэд очиж борлуулах хүмүүстэйгээ уулзаж, ерөнхийдөө гэрээгээ байгуулсан. Улаанбаатар дахь төв нь Амгалан болон Толгойтод байрлаж байгаа. Тухайн цэгүүдээс худалдаж авах, гэрийнхээ ойролцоох цэгээс худалдаж авах нь үнийн хувьд ялгаа байхгүй адилхан.
Бид нүүрсээ 20 кг, 40 кг-ын савлагаатай болон “Портер” машинтай гэрт нь хүргэж өгнө. Үнийн хувьд 20 кг нь 2500, 40 кг нь 4000 төгрөгийн үнэтэйгээр худалдаалагдана. Мөн “Портер” нүүрс хүргэлттэйгээ 140 мянган төгрөгийн үнэтэй байна. Бид нийслэлчүүддээ үнийн хөөрөгдөлгүй, чанартай, тортоггүй, хямд нүүрсээр хангахыг эрмэлзэж байна.
-Нүүрсний ченжүүд илчлэг сайтай нүүрсийг илчлэг муу нүүрстэй нь хольж зарах явдал гардаг шүү дээ. Та бүх энэ явдлаас хэрхэн сэргийлж байгаа вэ?
-Эхний ээлжинд бид нүүрснийхээ савалгаанд анхаарал тавьж байна. Манай компанийн лого бичигтэй сайн чанарын, амархан урагдаж задрахгүй, зузаан материалтай ийм шуудай хэрэглэж байна. Түүнээс гадна бид борлуулагч иргэдтэй хатуу нөхцөл бүхий гэрээ байгуулан хамтран ажиллаж , гэрээний хэрэгжилтэнд ч хяналт тавин ажиллах болно.
-Ярилцсанд баярлалаа.
