Цагдаагийн экс дарга нарын шүүх хурал өнөөдөр болно. Тэд энэ удаад Нийслэлийн өмгөөлөгчдийн зөвлөлөөс /НӨЗ/-өөс өөрсдөд нь томилсон бус өөрсдөө саналаараа сонгосон өмгөөлөгчтэйгээр шүүх хуралд оролцохоор болоод байна. Харин тэдэнд хууль зүйн туслалцаа үзүүлэх өмгөөлөгч нар хавтаст хэрэгтэйгээ бүрэн танилцсан эсэх нь тодорхойгүй байна. Тэднийг хоригдож байх хугацаанд өөрсдөө өмгөөлөгчөө сонгохгүй байна гэдэг шалтгаанаар НӨЗ-өөс хоёр ч удаа өмгөөлөгч томилж байсан юм. Хамгийн сүүлийн томилгоогоор О.Зоригтын өмгөөлөгчөөр А.Ундрах, Ш.Батсүхийн өмгөөлөгчөөр М.Алтан-Өлзий, Г.Ганбаатарын өмгөөлөгчөөр Б.Баяр, Ч.Амарболдын өмгөөлөгчөөр Ж.Батхүү нарыг томилоод байсан. Харин хурандаа нарын зүгээс эл томилгоог хууль бус гэж үзэн томилогдсон өмгөөлөгчдөөр эрхээ хангуулахгүй гэдгээ илэрийлсэн. Үүний хариуд дээрх өмгөөлөгч нар ч бас эл хэрэгт оролцох боломжгүй гэдгээ илэрхийлээд буй. Өнөөдрийн шүүх хуралд Ч.Амарболдын өмгөөлөгчөөр С.Нарангэрэл, О.Зоригтын өмгөөлөгчөөр Ё.Өнөрбаяр, Г.Ганбаатарын өмгөөлөгчөөр С.Тэгшжаргал нар оролцох бол Ш.Батсүх ч мөн өөрийн хүсэлтээр шинэ өмгөөлөгч сонгоод байгаа ажээ. Ингээд Г.Ганбаатарт хууль зүйн туслалцаа үзүүлэхээр томилогдоод байсан өмгөөлөгч Б.Баяртай НӨЗ-ийн томилгоо болон өнөөдрийн шүүх хурлын талаар цөөн хором ярилцлаа.
-НӨЗ-өөс хурандаа нарт нэр бүхий дөрвөн өмгөөлөгч томилсны дунд таны нэр багтсан. Яагаад Г.Ганбаатар хурандаад эрх зүйн туслалцаа үзүүлэх боломжгүй гэсэн юм бэ?
-Одоогоос хоёр долоо хоногийн өмнө цагдаагийн экс дарга нарын хэрэгт өмгөөлөгчөөр томилсон, шүүх хуралд оролц гэж өмгөөлөгчдийн холбооноос утсаар залгаж, хэлсэн л дээ. Харин үүний дараа Сүхбаатар дүүргийн шүүхээс хэрэгтэйгээ танилц гэж хэлсэн. Тухайн үед “наад хэрэгтэй чинь танилцах шаардлага байхгүй, НӨЗ-өөс гаргасан томилгоог ч эсэргүүцэж байгаа гэдгээ шүүхэд хэлсэн. Ингээд өмгөөлөгчдийн холбоонд ч мөн албан ёсоор захиа бичсэн. Энэ хэрэг дээр оролцох боломжгүй, өөр өмгөөлөгч томилж өгөөч гэдэг хүсэлтээ гаргасан. Үүний хариуд нэгэнт таныг томилсон учраас та хэрэгтэйгээ танилц гэсэн хариу ирүүлсэн. Энэ бол шүүх хурал болохоос 4-5 хоногийн өмнө өрнөсөн үйл явдал шүү дээ. Гэхдээ цаг байсан ч надад энэ хэрэгт оролцохгүй байх хэд хэдэн шалтгаан бий.
-Ямар шалтгаанаар шүүх хуралдаанд оролцохгүй гэсэн шалтгаанаа тайлбарлаач?
-Анхнаасаа НӨЗ-өөс аль алинд нь мэдэгдэхгүйгээр шууд өмгөөлөгч томилж байгаа нь буруу л даа. Нийслэлийн хэмжээнд 800 гаруй өмгөөлөгч байгаа шүү дээ. Зүй нь эхлээд энэ хүмүүсээс санал авсны дараа боломжтой хүмүүсийг шүүгдэгчдэд уулзуулж байгаад томилж яагаад болоогүй юм. Үүний оронд шууд нэр зааж томилох нь хаана хаанаа ёс зүйгүй юм л даа. Хүний ёс жудаг гэж алга байна шүү дээ. Таныг энэ хэрэгт томиллоо, оролцох боломж байна уу гээд хүний ёсоор асууж болно биз дээ. Шууд тулгасан нь зохисгүй юм л даа.
-Хэрвээ таниас урьдчилан санал асуугаад, энэ хэрэгт оролцооч гэсэн бол танд ийм боломж байсан уу?
-Ямар ч байдлаар, хэн ч ийм санал тавьсан энэ хэрэгт оролцохгүй. Миний ойлгож байгаагаар энэ хэрэг улстөрийн нөлөө орсон гэж би үзэж байгаа. Энэ хэрэгт өмгөөлөгч хэчнээн бэлтгэж ороод, үйлчлүүлэгчдээ ял сонсгоод л гарах нь тодорхой юм шиг санагдаж байгаа. Харин ч энэ шүүн таслах ажиллагаанд нэмэр болж, өмгөөлөгч бүрдсэн гэдгээр шатрын хүү маягаар шүүх хуралд оролцох болчихоод байгаа юм. Тиймээс ямар ч тохиолдолд энэ хэрэгт оролцохгүй гэсэн байр суурьтай байгаа.
-Ер нь цагдаагийн экс дарга нарт хүчээр өмгөөлөгч томилоод, өвчтэй байгаа хүмүүсийг тэргэнцэр, дамнуургатай нь ачаад явж байгааг хуульч хүний хувьд хэрхэн харж байна вэ?
-Угаасаа энэ хүмүүс өвчтэй байгаа нь үнэн юм билээ. Гэтэл ийм байхад хүчээр шүүх хуралд авч явж байгаа нь үнэхээр хүний ёсноос гажууд үйлдэл юм л даа. Шүүхийн ажиллагааны явцад шүүгч мөрдөн байцаагч шиг шаардлагатай бол бодит байдалтай очиж танилцаж дүгнэлт гаргах үе ч байдаг. Тэр бүү хэл шүүх хурлын дундуур хэргийн газартай очиж танилцаад ирэх тохиолдол ч байдаг. Үүний адилаар тэр Ч.Хосбаяр тэр хүмүүсийг үнэхээр өвчтэй эсэхийг нүдээр хараад, эмчтэй нь уулзаад байр байдалтай танилцах боломж ч байсан. Гэтэл заавал энэ өдөр шүүх хурлыг хийнэ гэж улайрч байгаа нь хүн ёсыг л уландаа гишгээд байгаа хэрэг л дээ. Хамгийн гол нь таван хүний аминд хэн хүрсэн бэ гэдгийг нь тогтоогоогүй атлаа удирдлагуудыг нь яллах гээд байгаа нь ойлгомжгүй байгаа юм. Зүй нь эхлээд хэн хүний аминд хүрчихэв гэдгийг тогтоож байж, энэ хурандаа нарын асуудлыг ярих ёстой шүү дээ.
