Үзэгчдэдээ хүрэхэд бэлэн болоод буй “Их хотын залуус” киноны ерөнхий продюсер Н.Отгонбаттай ярилцлаа. Их хотын залуусын амьдралын хэв маяг, хайр дурлал, алдаа онооны тухай тун сонирхолтой, хөгжилтэйгөөр өгүүлэх тус кино өнөөдрөөс эхлэн дэлгэцнээ гарах юм.
-“Боловсрол суваг” телевизийн шинэ уран бүтээл “Их хотын залуус” кино дэлгэцнээ гарахад бэлэн болсон байна. Кинонд юун тухай өгүүлэх вэ?
-“Их хотын залуус” бол манай телевизээс гаргаж буй долоо дахь олон ангит кино. Өмнө нь “Хайрын эрэлд”, “Наран мандах нутаг”, “Хувь тавилангийн ээдрээ”, “Гурван найз”, “Мөрдөгч”, “Хөгжилтэй гэр бүл” зэрэг бүтээлийг үзэгчдэдээ өргөн барьсан. Шинэ уран бүтээлд маань 30 орчим настай гурван эмэгтэй, гурван эрэгтэйн амьдралын тухай өгүүлнэ. Тэдний хайр дурлал, алдаа оноо болон өнөөгийн нийгмийн бодит байдлыг хөгжөөнтэйгөөр харуулна. Кино маань даваагаас баасан гариг бүр 22:10 цагаас “Боловсрол суваг” телевизээр гарах юм. Зураг авалт дөрвөн сарын хугацаанд үргэлжилсэн. Ингэхдээ 60 орчим хувийг нь павильонд хийлээ. KFC, “Мобиком” компанийн салбаруудыг бодит мэтээр павильонд хийж, зураг авсан. Яг бодит газар дээр зураг авахад бага зэрэг хүндрэл гардаг байсан бол павильон ашигласнаар ямар ч асуудалгүй болсон. Энэ бол том давуу тал.
-Яагаад инээдмийн төрлөөр кино хийх болов?
-Телевизийн хамгийн олон үзэгчтэй контент бол олон ангит кино. Манай телевиз энтертайнмент чиглэлийн уран бүтээл туурвидаг. Аливаа хар бараан зүйл байдаггүй. Бухимдал ихтэй, хар бараан нь давамгайлаад байгаа энэ нийгмээс түр ч гэсэн холдож, эерэг зүйл үзэх, оюунаа амраах мөн танин мэдэхүйн шинэ мэдээ мэдээллийг авах боломжийг үзэгчдэдээ олгохыг зорьдог. Иймээс инээдмийн чиглэлээр, тэр дундаа ситком (sitcom) чиглэлээр хийж байна.
-Ситком гэдгийг тайлбарлаж өгөхгүй юү. Энэ нь инээдмийн кино дундаа ямар онцлогтой юм бэ?
-Анги бүр нь сонирхолтой, дэд сэдэвтэй байдаг. Ситком төрлийн киноны онцлог нь тэр л дээ. Тухайлбал, “Их хотын залуус” кинон дээр гурван залуу болон гурван бүсгүйд анги бүрт өөр өөр адал явдал, шийдэх асуудал гарах юм. Ерөнхий нэг зохиолын дагуу явах ч дэд сэдвүүдтэй болсноор зөвхөн нэг үйл явдал үргэлжлээд байх биш шинэ өнцгүүд гарч ирж байгаа. Нэг ангид хоёр сэдэв гэхээр дөчин ангийн турш наян өөр үйл явдал өрнөнө гэсэн үг. Тэгэхээр тун сонирхолтой байх болно.
-Кино багт ямар уран бүтээлчид ажиллав?
-Өмнө нь “Гурван найз”, “Хөгжилтэй гэр бүл” кинонуудад ажиллаж байсан хүмүүстэйгээ дахин хамтарсан. Маш сайн гар нийлдэг. Ерөнхий найруулагчаар С.Баттулга, гол дүрүүдэд “Эмоци” продакшны жүжигчин О.Тэмүүжин, Г.Нарансолонго, Д.Түвшинтөр, Б.Ариунцэцэг, Г.Эзэнмөнх нар тоглосон. Мөн “Шинэ үе” продакшны жүжигчин Ц.Ганбаяр, жүжигчин Д.Оюунтуул, Д.Ганцэцэг, СТА Г.Ундармаа нарын уран бүтээлчид тоглосон. Монгол Улсын ардын жүжигчин Г.Мягмарнаран, Ж.Лхамхүү нар тоглосон нь бидний хувьд нэр хүндийн хэрэг байлаа. Түүнчлэн “Мөрөөдлийн театр” продакшны жүжигчин Д.Баттөмөр, Г.Алтаншагай, жүжигчин Б.Анхбаяр, “Шинэ үе”, “Х-ТҮЦ” продакшны залуу уран бүтээлчид гээд нэлээд олон урлаг соёлын алдартан оролцон тоглосон.
-“Их хотын залуус” кинонд тоглож байгаа жүжигчид болон ерөнхий агуулга нь “Гурван найз”-тай төстэй санагдаж байна.
-“Гурван найз” кино бол 30 хүрэх гэж байгаа найзуудын нөхөрлөлийн үнэ цэнийн тухай өгүүлсэн. Тэд бол амьдрал ахуй нь хараахан тогтоогүй залуучууд, мөн хайраа хайж байгаа хүмүүс шүү дээ. Харин энэ кинонд нийгэмд аль хэдийнэ байр сууриа олсон, амжилттай яваа, гэр бүл зохиох насан дээрээ ирсэн зургаан залуугийн тухай өгүүлж байгаа. Ер нь үзэгчид киногоо үзээд үнэлэлт дүгнэлтээ өгч, ялгааг мэдэж авна.
-Цаашид олон ангит киноны төслүүд үргэлжлэх үү?
-Сүүлийн үед телевизийн олон ангит киноны хөгжил эрчимжиж байна. Дээр дурдсанчлан манайх хэд хэдэн уран бүтээл хийсэн нь үзэгчдээс өндөр үнэлгээ аваад байгаа. Иймээс энэ амжилтаа бататгах, цаашид ахиулахын төлөө илүү чанартай, сайн уран бүтээл хийхийг зорьж байна. Цаашид телевизийнхээ бодлоготой уялдуулан олон сайн уран бүтээл гаргана. Одоогоор манайх жилд олон ангит хоёр кино хийж байгаа. Үүнийхээ тоог нэмэгдүүлэх боломж бий. Тиймээс хүч бололцоогоо дайчлан ажиллана.
-Ямар байгууллагуудтай хамтран ажилласан бэ. Аливаа уран бүтээлд ивээн тэтгэгчид тун чухал байдаг?
-Кино бол хамтын уран бүтээл шүү дээ. Тэр утгаараа хамтран ажиллагч байгууллага, ивээн тэтгэгч нартаа маш их талархаж байгаагаа хэлмээр байна.
Киноны ерөнхий ивээн тэтгэгчээр “Мобиком” корпораци, ивээн тэтгэгчээр “Таванбогд Трейд” ХХК KFC брэндээр, “Таванбогд Интерэйшнл” ХХК “Мами поко” брэндээр, “Некст Электроникс” ХХК Samsung брэндээр ивээн тэтгэсэн. Мөн “Ай энд Эр Монголиа” ХХК зэрэг байгууллага хамтран ажилласан. Эдгээр хамт олон урлаг соёлыг тууштай дэмжиж, кино урлагийн онцлог, түүний үр нөлөөг ойлгодог.
Б.БАДАМГАРАВ
