МАХН-ын дарга Н.Энхбаярыг УИХ-д нэр дэвшихийг СЕХ-ноос бүртгэхээс татгалзаад буй. Учир нь Нийслэлийн прокурорын орлогч, улсын яллагч Е.Сагсай, Сүхбаатар дүүргийн шүүхийн ерөнхий шүүгч С.Соёмбо-Эрдэнэ нар СЕХ-нд Н.Энхбаярыг нэр дэвшүүлэхийг татгалзсан албан бичиг хүргүүлсэн юм. Гэвч тэдний эл үйлдлийг Н.Энхбаярын өмгөөлөгч О.Баасанхүү хууль бус үйлдэл хэмээн мэдэгдсэн. Тиймээс уг асуудлаар Нийслэлийн прокурорын орлогч, улсын яллагч Е.Сагсайгаас тодрууллаа. -Н.Энхбаярыг УИХ-д нэр дэвшүүлэхгүй хэмээн танайхаас СЕХ-нд албан бичиг хүргүүлсэн. Та бүхний эл үйлдлийг хууль зөрчсөн гээд байгаа. Энэ талаар тодруулахгүй юу?
-Н.Энхбаяр нарт холбогдох хэрэгт прокурорын байгууллагаас яллах дүгнэлт үйлдэн шүүхэд шилжүүлсэн. Сүхбаатар дүүргийн шүүх анхан шатны шүүх хуралдаанаар Н.Энхбаяр нарт холбогдох хэргийг хэлэлцэх гэсэн боловч шүүгдэгчээс өөрөөс нь шалтгаалан шүүх хурал хоёр удаа хойшлоод байна. Шүүн таслах ажиллагаа тасралтгүй явагдах, хүн бүр хууль шүүхийн өмнө эрх тэгш байх, хууль дээдлэх зарчмуудыг хэрэгжүүлэх үүднээс улсын яллагчийн хувьд албан үүргийнхээ дагуу шүүхэд хандсан болно. Сонгуулийн ажлын дундуур хуулийн байгууллага оролцоогүй. Харин шүүн таслах ажиллагаа үргэлжилж байх явцад сонгуульд нэр дэвшүүлэх ажиллагаа эхэлсэн шүү дээ.
-Түүнийг сонгуулиас өмнө яллах гээд байгаа хэмээн иргэд хардаж байна?
-Монгол Улсын Үндсэн хуулийн 56 дугаар зүйлд прокурор шүүх хуралдаанд төрийн нэрийн өмнөөс оролцоно, прокурорын байгууллагын тухай хуулийн хоёрдугаар зүйлд прокурорын байгууллага нь Монгол улсын нутаг дэвсгэрт эрүүгийн хууль тогтоомжийн хэрэгжилтийг нэг мөр хангуулах үндсэн чиг үүрэгтэй гэж заасан. Хуулиар хүлээсэн чиг үүргээ хэрэгжүүлэх зорилгоор эрүүгийн хэрэгт яллагдагчаар татагдаж шүүхэд хэрэг нь шилжиж, шүүгдэгч болсон Н.Энхбаярт эрүүгийн хариуцлага хүлээлгэх эсэх асуудлыг нэг мөр шийдвэрлэх үүднээс улсын яллагч шүүхэд хандсан юм.
Б.Чимэг
