Кино найруулагч, Соёлын тэргүүний ажилтан Г.Бадамрагчааг төрийн эрхийг хууль бусаар авах, хуйвалдаан зохион байгуулсан гэх үндэслэлээр ТЕГ-ын Мөрдөн байцаах хэлтсээс Эрүүгийн хуулийн тусгай ангийн 82 дугаар зүйлд заасны дагуу эрүүгийн хэрэг үүсгэн шалгаж байгаа.
    Кино найруулагч, Соёлын тэргүүний ажилтан Г.Бадамрагчааг төрийн эрхийг хууль бусаар авах, хуйвалдаан зохион байгуулсан гэх үндэслэлээр ТЕГ-ын Мөрдөн байцаах хэлтсээс Эрүүгийн хуулийн тусгай ангийн 82 дугаар зүйлд заасны дагуу эрүүгийн хэрэг үүсгэн шалгаж байгаа. Түүнийг ШШГЕГ-ын харьяа цагдан хорих 461 дүгээр ангид саатуулаад сар гаруй хугацаа өнгөрч байгаа юм. Мөн уг хэрэгт түүнтэй хамтран ажилладаг арав гаруй хүнийг сэжигтнээр шалгаж байгаа. Харин сүүлийн үед түүний бие муудаад буй. Үүнтэй холбогдуулан Г.Бадамрагчаагийн ах Нороврагчаагаас зарим зүйлийг тодрууллаа.

-Дүүг тань төрийн эрхийг булаахаар завдсан хэмээн саатуулаад байгаа. Энэ талаар тодруулахгүй юу?
 
-Миний дүүг өнгөрсөн тавдугаар сарын 7-нд төрийн эрхийг хууль бусаар булаан авах гэмт хэргийг зохион байгуулсан хэмээн баривчилсан. Дараа нь Эрүүгийн хуулийн 82 дугаар зүйлд заасны дагуу эрүүгийн хэрэг үүсгэн шалгаж эхэлсэн. Баривчлахдаа 11.00  цагийн  гэрээс нь гарч ирэхэд хар хувцастай, бүрэн зэвсэглэсэн олон залуучууд толгойд нь уут углаж цагдан хорих 461 дүгээр анги руу авч явсан байгаа юм. Тэгээд намайг орой 19.00 цагийн үед очиход толгойд нь угласан уутыг аваагүй байсан. Харин өдөр нэг удаа авсан гэсэн. Уутыг нь авахад хоёр талд нь хоёр залуу буу тулгаад асуудлаа ярь гээд зогсож байсан гэсэн. Ямар нэг аюултай хэргийн золиосонд миний дүүг чихэх үйл ажиллагаагаа өргөн цар хүрээтэй бэлдээд ийм хэмжээнд хүргэж байна гэж ойлгож байна.

-ТЕГ-аас төрийн эрх мэдлийг хууль бусаар авах хэргийг санамсаргүй үйлдэнэ гэж байхгүй хэмээн мэдэгдсэн? 

-Аливаа хэргийг шүүхээр шийдээгүй байхад нотоллоо гэж хэлэх эрх байхгүй. Гэтэл ТЕГ хэвлэлийн төлөөлөгчөөрөө дамжуулан миний дүүг хэрэг хийсэн. Хийсэн хэргийг нь бид нотолсон хэмээн яриад байгаа. Дүүд маань хэрэг тулгаж, хүчээр байцаалт авснаа нотоллоо хэмээн ярьж байна.

-Хүчээр байцаалт авсан юм уу?

-Миний дүүгийн эрхэд ТЕГ-аас бүрэн халдаж байна. Байцаагдсан цагаас нь хойш өмгөөлөгч нь мөрдөн байцаалтын ажиллагаанд оролцоё гэхэд хаалт тавьж эхэлсэн. Гэвч бид хуулийнхаа дагуу шаардлага тавьсны эцэст уулздаг болсон. Мөн өмгөөлөгчид нь хэлэлгүйгээр хэд хэдэн удаа байцаалт авахаар оролдсон байсан. Дүү минь шоконд орж, сэтгэц нь жаахан өөрчлөгдсөн байгаа.

-Тэгээд өмгөөлөгчтэйгөө уулзаж байгаа юу. Өмгөөлөгч нь байцаалтын ажиллагаанд оролцсон уу?

-Өнгөрсөн мягмар гаригт өмгөөлөгч Н.Пүрэвбаатар нь уулзах гээд хоригдож буй 461 дүгээр анги дээр нь очсон гэсэн. Гэтэл дүүг маань аль хэдийнээ ТЕГ-т авчирсан байсан. Өмгөөлөгчид нь хэлэлгүйгээр байцаалт авсан байгаа юм. Тэгээд өмгөөлөгч нь ТЕГ-т очиж, байцаалтад ороход дүү маань ТЕГ-ын байцаагч Энхтөрийн үг бүрийг тоть шиг давтаад байсан гэсэн. Тэгээд өмгөөлөгч нар нь гайхаад ийм байцаалт байдаг юм уу, энэ байцаалт уу юу вэ гээд дүүгийн маань сэтгэцийг шалгуулах асуудал тавьсан байна лээ. Мөн хүчээр байцаалт авсан учраас байцаалт өгсөн гэх тэмдэглэлд гарын үсгээ зурахгүй гэхэд нь тэгвэл чамайг цаазаар авах асуудлыг ярина гэж хэлсэн байгаа юм. Иймэрхүү маягаар л дүүд маань хэрэг тулгаж байна.