Саяхан “Би ээж болмоор байна” киноны дуу болох “Зүрхний” хэмээх уран бүтээлээрээ удаан хүлээсэн сонсогчиддоо бэлэг барьсан хамтлаг бол “Take off”. Тэдний олон сайхан хайрын дуу одоо ч хүмүүсийн аманд аялагдсаар байдаг билээ. Хэсэг хугацаанд уран бүтээлээсээ завсарлага авсан залуус маань тун удахгүй “Зүрхний” нэртэй томоохон тоглолт хийх гэж байна. Урлагтаа эргэн ирж, сонсогч фенүүдээ баярлуулж буй “Take off” хамтлагийнхантай уулзаж ярилцлаа.

-“Take off” хамтлаг байгуулагдаад 12 жил болчихсон байна.  Анх хамтлагаа байгуулж байсан түүхээ дурсахгүй юу?

Э.Сүхжаргал: -Юуны өмнө “Ардын эрх” сонины уншигчдад энэ өдрийн мэнд хүргэе. Удаан хугацаанд уулзсангүй. Манай хамтлаг анх 2000 онд байгуулагдаж байсан. Тэгэхдээ таван ги­шүүн­тэй байсан юм. Баагий бид хоёр “Мюзикл” театр хөгжмийн дээд сур­гуульд сурдаг байсан юм. Нэг өдөр Батука ирээд хамтлагтаа орох санал тавьсан. Анх энд тэндхийн пабуудад “Back street boys”, “Westlife” хамтлагуудын дууг дуулдаг бай­лаа. Одоогийнхоор бол коверлож шүү дээ.  Ингэж явсаар хуучин бүрэлдэхүүнээрээ 2004 оны гуравдугаар сарын 1-нд албан ёсоор “Take off” нэртэйгээр “УБ палас”-ын дэргэдэх хамтлаг гэж байгуулагдсан. Одоо ингээд харахад хамтлаг маань ч “эрийн цээнд хүрсэн” байна. 30 гаруй клиптэй боллоо. 

-Байгуулагдаад ганцхан жилийн дотор маш олон хит дуунууд гаргаж, шинэ цомог, тоглолт гээд олон ажил амжуулсан байдаг. Тухайн үед хэн та бүхнийг чиглүүлж байв?

Э.Сүхжаргал: -Бид анх “УБ палас”-д байрлаж бэлтгэлээ хийдэг байсан. “УБ палас”-ын менежер Чинзо гэдэг залуу бидэнд  уран бүтээлийн гараагаа эхлэхэд их тус болсон. Дараа нь  “Десофт” студийн захирал М.Эрхэмбаяр бидний продюсерээр ажиллаж, анхны таван клип, анхны цомог маань гарч байлаа. Хоёр дахь цомгоосоо эхлээд өөрсдөө бие дааж  уран бүтээлээ хийж эхэлсэн.

-Уран бүтээлийнхээ ид үедээ жил да­раа­лан цомог гаргаж байсан юм билээ?

Д.Баясгалан: -Тийм ээ. Эхний дөрвөн жил маш эрчтэй ажилласан. Олон ч хит дуу гаргасан. 2005 онд “Уучлаач хайрт минь”, “Цасан дээр” зэрэг дуунаас бүрдсэн “Гурван цаг” анхны цомгоо өлгийдөн авч байлаа. Мөн тэр жилдээ “Гурван цаг” тоглолтоо хийсэн. Энэ бол бидний  хамгийн анхны томоохон шоу тоглолт байсан юм. 2006 онд “Мартахгүй” цомог маань гарсан. Бидний хамгийн хайртай дуунууд энэ цомогт багтсан. “Надаас өөр хэнд ч ирээгүй дурлал”, “Мартахгүй”, “Буцаад л хоёулаа” гээд одоо ч хүмүүсийн  сэтгэлд  мартагдаагүй, хуучраагүй дуунууд бий. Бас хоёр дахь тоглолтоо цом­гийнхоо дараа хийсэн. 2008 онд “Хайрын нислэг” гурав дахь бие даасан цомгоо гаргасан. Энэ хэдэн жил бидний уран бүтээлийн  хамгийн оргил үе юм даа.

-Ийм амжилттай байсан хэрнээ яагаад гэнэт уран бүтээлээ завсарласан юм бэ?

Э.Сүхжаргал: -Эхний таван жил бид бүх бие сэтгэлээ  зөвхөн уран бүтээлдээ  л зориул­сан. Тиймдээ ч амжилттай явсан байх. Дараа нь хувийн  амьдралдаа жаахан анхаарал хандуулъя гэж шийдэцгээсэн.  Хоёр юм уу гурван жил түр завсарлая гэж ярилцсан. Ингэхдээ бид ганцаарчилсан уран бүтээлүүд хийж байсан. Гадаад, дотоодын хамтлагууд ер нь тэгдэг ш дээ. Тэр жишгээр л явсан. Наагий маань “Эрхэс” гэдэг энтертэйнмент байгуулсан. Миний хувьд Ирланд улсад дөрвөн жил амьдарч байгаад ирсэн.

Д.Баясгалан: -Хүмүүс “Take off” тарлаа л гэж байсан. Үнэндээ тийм биш. Хэдийгээр бид шинэ уран  бүтээл хийхгүй нэлээд удсан ч  урлагаасаа бүр мөсөн  хөндийрөөгүй ш дээ. Аливаа арга  хэмжээнд очиж дуулж л байсан. 2013 онд хамтлагийнхаа 10 жилийн ойг тохиолдуулж “Уучлаач хайрт минь” дуугаа шинэчилж, клипжүүлсэн. “Take off 10 жил” тоглолтоо хийсэн. Энэ мэтээр жил бүр л их бага хэмжээгээр уран бүтээл хийж байсан. Би ая зохиох  гэж оролддог, түүндээ их сонир­холтой. Зохиосон нэлээд хэдэн дуутай. Хоёр ч соло цомог гаргасан. 

-Баагий яагаад хамтлагаасаа гарчих­сан юм бэ? 

Д.Баясгалан: -Урлагт маш их цаг зарцуулж байж уран бүтээл төрдөг. Баагий ажил, бизнес гээд маш их завгүй ажиллаж байгаа. Өөрөөр хэлбэл хамтлагийн цаашдын уран бүтээлд оролцох завгүй гэсэн үг л дээ. Энэ жилээс манай хамтлаг эрчимтэй ажиллая гэж шийдээд ойрын хоёр жилдээ хийх ажлуудаа төлөвлөсөн. Харин Баагий энэ бүгдэд оролцох боломжгүй гэсэн. Тиймээс хамтлагаасаа гарахаас өөр аргагүй болсон. Бидний төлөвлөсөн  ажлыг  цалгардуулахгүйн тулд Баагий өөрөө ингэж шийдсэн л дээ. Иймэрхүү асуудал хамтлагуудад байж л байдаг. Ингээд 100 хувь байсан хамтлаг маань 75 хувь болчихлоо. Үлдсэн орон зайгаа нөхөхийн тулд шинэ гишүүн авсан.

-Шинэ гишүүнтэй танилцъя. “Take off” хамтлагийн гишүүн болсон сэтгэгдэл ямар байна?

Б.Батзолбоо: -Намайг Батзолбоо гэдэг. Өмнө нь би шоу бизнес хийдэг байсан юм. Нэлээд дээр үеэс “Take off”-ынхантай хөдөө орон  нутгаар  явж хамтран  ажилладаг байсан. Тэгж яваад бие биесээ улам таньж, дотнын найзууд болсон. Баагий маань хамтлагаасаа гарах болсон учраас шинэ гишүүн хэрэгтэй байгаа гэж байсан л даа. Тэгээд нэг өдөр намайг дуулахыг сонсож л дээ, манай хэд. Би мэргэжлийн бус хүн  учраас эхлээд санаа зовж л байлаа. Учир нь Баагий бол энэ хамтлагт маш том орон зай эзэлж байсан хүн. Хүмүүс хэлдэг. Хамгийн царайлаг, сайн хоолойтой  нь Баагий гэж. Тэгэхээр надад маш их хариуцлага ирж байна. 12 жилийн түүхтэй “Take off” хамтлагийн нэр хүндийг доош нь татахгүйн тулд их хичээх болно. Манай  хэд ч  надад итгэж, урамшуулж  байгаа. Нө­гөөтэйгүүр энэ хамтлагт орсондоо маш их баяртай байна. Энэ залуустай танилцаагүй байхдаа ч би “Take off”-ыг сондог байсан. 

-Мэргэжлийн бус гэлээ?

Б.Батзолбоо: -Тийм ээ. Би дуучин биш. Хөдөө аж ахуйн дээд сургууль төгссөн. 

-“Зүрхний” тоглолтон дээр “Take off”-ын хит дуунуудыг  таны дуулсанаар сонсох нь ээ?

Б.Батзолбоо: -Тийм. Түрүүн хэлсэнчлэн надад их л хариуцлага ногдож байна. Хү­мүүст аль хэдийнээ хүрч, хит болсон дуунуудыг  дуулна гэдэг  надад жаахан хэцүү л байна. Тоглолт амьд хөгжимтэй, бүх дуугаа амьдаар дуулна. Тийм болохоор хувийн бэлтгэлээ маш сайн базааж байгаа. Хүмүүст бас сонирхолтой байна гэж бодож байна. 

-Хамтлагийн ахлагчийн хувьд шинэ гишүүндээ хэр зэрэг найдвар тавьж байгаа вэ?

Д.Баясгалан: -Хэдийгээр мэргэжлийн дуучин биш ч гэлээ авьяастай мэдрэмжтэй залуу байгаа юм. Урлагийн салбарт мэргэж­лийн бус хүн зөндөө л байдаг ш дээ. Ямар ч юм төгс байдаггүй. Яваандаа суралцана. Золбоогоос маш их зүйл гарна гэж бид харсан  учраас хамтлагт орооч гэж санал тавьсан. Цаашдаа энэ бүрэлдэхүүнээрээ сайхан уран бүтээлүүд гаргах  болно.

 
-Хийхээр төлөвлөсөн олон ажил байгаа гэж дээр дурдсан. Жаахан дэлгэрүүлж болох уу?

Д.Сүхжаргал: -Тун удахгүй олон улсын эмэгтэйчүүдийн баярын өдөр хамтлагийнхаа 12 жилийн ойг тохиолдуулж “Зүрхний” тог­лолтоо хийх гэж байна. Энэхүү тоглолтод ма­най хамтлагийн хуучны болон цоо шинэ­хэн  уран  бүтээлүүд дуулагдана. Тог­лолт гуравдугаар сарын 8-нд “Crocus event hall”-д болно.

Цаашлаад  дөрөвдүгээр сард цоо шинэхэн цомог маань гарна. Энэ цомогт багтсан “Зүрхний”, “Хөшгөө нээ” дуунуудаа дүрс­жүүлэн үзэгч, сонсогчиддоо саяхан хүргэлээ. Мөн Солонгос улсад дөрөвдүгээр сарын сүүлээр ирж тоглолтоо хийгээч гэсэн санал ирсэн. Ирэх арваннэгдүгээр сард Европын орнуудаар аялан тоглох хүсэлт ирсэний дагуу явахаар төлөвлөж байна.

М.Мөнхсанаа