Өнөөдөр “Хүүхдийн хөдөлмөрийн эсрэг дэлхийн өдөр” тохиож байна.

Манай улсад ямар нэгэн байдлаар хөдөлмөр эрхэлж байгаа 94000 орчим хүүхэд бий. Тэгвэл 2025 он гэхэд хүүхдийн хөдөлмөр эрхлэлтийг таслан зогсоох зорилготой ажиллаж байгаа аж. Энэ нь ажил олгогчдын хандлагыг өөрчилснөөр биелэх боломжтой юм байна. 

Харин ажил олгогч хүүхдийн нас, хүйсэнд тохироогүй хүнд хүчир ажил хийлгэсэн тохиолдолд тооцох хуулийн хариуцлага өндөрссөн байна. Энэ бол зөвхөн хүүхдийн эрхийг хамгаалах  байгууллага мянга ажиллаад цэгцрэх асуудал биш. Бараа нийлүүлэлтийн сүлжээнд байгаа хүүхдийн хөдөлмөрийг устгах нь хүн бүрийн санаа тавих хэрэг бөгөөд Засгийн газар, ажил олгогч эздийн өөрдийнх нь хүчин чармайлт шаардсан асуудал гэдгийг ч албаныхан онцолж байгаа юм.

Харин Монгол Улсад хүүхдийн хөдөлмөр эрхлэлтийг бууруулах, устгах чиглэлд тодорхой алхмууд хийж, тэр дундаа хууль эрх зүйн шинэчлэлүүд хийсэн. 2016 онд Монгол улс Хүүхдийн эрхийн тухай, Хүүхэд хамгааллын тухай хоёр хуулийг УИХ-аар баталснаар Хүүхдийн эрхийг хамгаалах, гэр бүлд суурилсан хүүхэд хамгааллын тогтолцоог бүрдүүлж, бэхжүүлэх хууль эрх зүйн орчин бүрджээ. Насанд хүрээгүй хүнийг ажиллуулахыг хориглосон ажлын байрны жагсаалт”-ыг ч шинэчлэн баталсан бөгөөд Хуулийн хэрэгжилт  энэ оны 9 дүгээр сарын 1-нээс мөрдөгдөнө.

Дашрамд өгүүлэхэд дэлхий нийтийн хэмжээнд газар тариалан, уул уурхай, барилга, загасчлал, үйлдвэрлэл, үйлчилгээ, гэх мэт бүс нутаг, улс орон, салбаруудыг хэрсэн нарийн төвөгтэй сүлжээнд 168 сая хүүхэд хөдөлмөр эрхэлсээр байна.