Өнгөрсөн дөрвөн жилийн хугацаанд Ардчилсан намын хийж хэрэгжүүлсэн ажлуудын бас нэгэн онцлох ажил нь хөдөлмөр эрхлэлтийг дэмжих, ажлын байрыг нэмэгдүүлэх байлаа. Иргэд ч халамжийн мөнгө зүгээр тараах нь зөв бодлого биш, харин ажлын байр бий болгох, ажилтай болгох нь амьдралынхаа туршид илүү орлого олох болно гэдгийг ойлгосон жил байв. Тиймдээ ч Хөдөлмөрийн яамнаас хөдөлмөр эрхлэлтийг дэмжиж, ажлын байрыг нэмэгдүүлэх зорилтын хүрээнд “Хувиараа хөдөлмөр эрхлэгч, нөхөрлөл хоршоо байгуулах иргэнийг дэмжих”, “Хөдөлмөр эрхлэлтийн ур чадвар олгох, ажлын байрыг хадгалах”, “Залуучууд, мэргэжлийн боловсрол, сургалтын байгууллагын төгсөгчдийн хөдөлмөр эрхлэлтийг дэмжих”, “Хөгжлийн бэрхшээлтэй иргэний ажлын байрыг дэмжих”, “Малчдын хөдөлмөр эрхлэлтийг дэмжих” хөтөлбөрүүдийг улсын хэмжээнд хэрэгжүүлжээ.

Ардчилсан нам энэ ажлаа ирэх дөрвөн жилд дахин хэрэгжүүлж ажил эрхлэлт, хөдөлмөрийн бүтээмжийг нэмэгдүүлж, ажил эрхлэгчдийн ОРЛОГЫГ ХОЁР ДАХИН нэмэгдүүлэхээр “МОНГОЛ ХҮН 2020” мөрийн хөтөлбөртөө тусгажээ. Түүнчлэн сум, хороо бүрт 500-аас доошгүй хүний орлогыг нэмэгдүүлэх, залуусын ажлын байрыг дэмжсэн “Ажилтай төгсөгч” хөтөлбөрийг хэрэгжүүлэх аж. Мөн гэртээ хүүхдээ хардаг, удаан хугацаагаар ажил эрхлээгүй эмэгтэйчүүд, ганц бие эцэг, эхчүүдийг төрийн байгууллага, томоохон аж ахуйн нэгжүүдээс боломжит ажил үйлчилгээг туслан гүйцэтгүүлэх, нийгмийн идэвхтэй амьдралд татан оруулах, ажлын уян хатан нөхцөл бүхий “Цагийн ажил” хөтөлбөр, “Ахмад мэргэжилтний зөвлөх үйлчилгээ” төслийг тус тус үргэлжлүүлэн төслийн хамрах хүрээг хоёр дахин нэмэгдүүлэх юм байна.

Түүнчлэн Хөдөлмөрийн сайд Г.Баярсайхан “Оюутан залуус долоо хоногт 20 цагаас илүүгүй цагийн ажил хийх боломжтой гэдэг заалтыг Хөдөлмөрийн хуулийн шинэчилсэн найруулгад оруулж өгч байна.  Үүнийг УИХ-аар батлуулснаар оюутан залуусын ажиллах хууль эрх зүйн орчин бүрдэнэ” гэдгийг хэлж байсан билээ.

Н.ЖАРГАЛ

Ардчилсан намын сонгуулийн штаб