Хот руу чиглэх их нүүдлийг сааруулах, нутагтаа сайхан амьдрах боломжийг бүрдүүлэхийн тулд Ардчилсан нам “1000 айлын орон сууц” хөтөлбөрийг амжилттай хэрэгжүүлснээр 21 аймагт 26510 айл тохилог орон сууцанд ороод байна. Цаашид бүх аймгийн төв болон 15 мянгаас дээш хүн амтай суурин газрыг ХОТ-ын статустай болгох юм байна. Мөн “Шинэ сум-1:2:3” хөтөлбөрийг сум бүрт үргэлжлүүлэхээр мөрийн хөтөлбөртөө тусгалаа. Ингэснээр аймагтаа, сумандаа сайхан амьдрах боломжийг бүрдүүлэх юм. Монгол Улсын Засгийн газраас 2012-2016 онд хэрэгжүүлэх үйл ажиллагааны хөтөлбөрт тусгагдсан “Шинэ сум” хөтөлбөрийн хүрээнд Баянхонгор аймгийн Баянлиг, Бууцагаан сумдыг эхний ээлжинд сонгон авсан билээ. Шинэ сумын төвд хоёр давхар 20 ортой нэгдсэн эмнэлэг, 640 хүүхдийн багтаамжтай бүрэн дунд сургууль, 150 хүүхдийн цэцэрлэг, 180 хүүхдийн дотуур байр, сумын захиргааны байр, 250 хүний суудалтай спорт заал бүхий иж бүрэн цогцолбор барилга байгууламжтай жишиг сум болсон байна.

Эдгээр сумдад хэрэгжиж байгаа “Шинэ сум” төсөл нь нийт 8 га газрыг хамарсан бөгөөд 14300 ам.метр барилгажих талбайд захиргаа, эмнэлэг, сургууль гэх мэт обьектуудыг Канад технологиор барьжээ.

Мөн халаалтын зуух, хаалттай дэд станц, цэвэрлэх байгууламж, автозам, явган хүний зам талбай, гэрэлтүүлэг зэрэг инженерийн байгууламж, дэд бүтцийг цогцоор нь шийдсэн байна.

Н.Жаргал