“Амгалан” дулааны станц ашиглалтад орсноор 1.3 сая гаруй хүн амтай Улаанбаатар хотын зүүн бүсийн айл өрх, аж ахуйн нэгжүүд найдвартай дулааны эх үүсвэрт холбогдсон. Дулааны эх үүсвэр хангагдсанаар 50 мянган айлын орон сууц шинээр барих боломж бүрдэж байгаа юм. Ирэх дөрвөн жилд төвлөрсөн дулаан хангамж, шөнийн бага ачаалалтай үеийн хямд цахилгааныг ашигладаг хэсэгчилсэн дулаан хангамжийн шинэ эх үүсвэрийг бий болгох замаар Улаанбаатар, Дархан, Эрдэнэт зэрэг томоохон хотуудын дулааны хэрэгцээг хангах юм. Ингэснээр байрандаа дулаан амьдрах боломж бүрдэнэ.

Түүнчлэн инженерийн дэд бүтэц шугам сүлжээний төслүүд амжилттай хэрэгжсэнээр нийслэлийн барилгажих боломжтой талбайг 20 хувь буюу 1500 орчим га газраар нэмэгдүүлжээ. Тодруулбал, 1500 га талбайд 54.549 айлын орон сууц, 8020 хүүхдийн 50 гаруй цэцэрлэг, 18.890 хүүхдийн 30 орчим сургууль зэргийг барих боломж нээгдсэн юм.

Баталгаат ундны усаар хангагдсан хүн амын эзлэх хувийг 80 хувьд хүргэж, хүн амын 40 хувийг сайжруулсан ариун цэврийн байгууламжтай болгоно. Хотуудын усан хангамж, бохир ус, цэвэрлэх байгууламжид технологийн шинэчлэл хийж, хангамжийн бие даасан системийг дэмжинэ.

Н.ЖАРГАЛ