Манай улсын нийт хүн амын 40 гаруй хувь нь дундаж давхаргад хамрагддаг гэсэн судалгаа бий. Гэхдээ тэд амьдралын баталгаагаа биш боловсон царай, мэргэжлийн үнэмлэхээ харууж энэ үзүүлэлтэд тэнцдэг гэхэд хилсдэхгүй. Жилээс жилд өсөлттэй байсан энэ үзүүлэлт сүүлийн үед буурсан. Энэ нь жижиг дунд үйлдвэрлэлүүд буюу жинхэнэ баялаг бүтээгчид хаалгаа барих болсонтой холбоотой. Уг нь энэ хэсгийнхэнд чиглэсэн гадна, дотны төсөл хөтөлбөрүүд мундахгүй. Гэвч танил тал, эрх мэдэлтний ах дүүгийн хүрээнээс хальдаггүй. Танил талтай заримд нь хөнгөлттэй зээл олдохоос хэтэрдэггүй аж. Уг нь хүн ам цөөтэй, мал аж ахуй түшиглэсэн нөөц ихтэй манай улс Чех шиг болох ойрхон. Хэлдэггүй биш ярьдаг ч хийдэггүй эрх мэдэлтнүүд дэндүү олон. ХАА-н салбар, жижиг дунд үйлдвэрлэлээ дэмжинэ гэдэг ч нэгдсэн бодлого, зохицуулалтгүйгээс болж олон бизнес эрхлэгч банкны хүүнд боомилогдож, хүсэл мөрөөдлөө тас татуулдгийг хэн хүнгүй мэднэ. Бор зүрхээрээ яваа тэднийг бодлогоор дэмжиж чадвал тэд бүтээгдэхүүнээ дэлхий нийтэд биш юм аа гэхэд Азийн ойролцоох улсуудад борлуулах боломжтой. Ингэснээр эдийн засгийн өсөлт хангагдаж, тогтвортой орлого бас хэрэглээтэй дундаж давхаргын өсөлт Монголд биелэгдэнэ.

А.Сайхан

Эх сурвалж: Ардчилсан намын сонгуулийн штаб