Сонгуулийн сурталчилгаа эхлээд хэдхэн хонож байгаа хэдий ч сурталчилгаа самбаруудыг урах, сүйтгэх тохиолдол цөөнгүй гарч байна. Иймээс цагдаагийн байгууллагаас гомдлын дагуу шалгаж, дээрх үйлдлийг хийсэн этгээдүүдэд хариуцлага тооцно гэдгийг анхаарууллаа. Тодруулбал, нэг сарын хөдөлмөрийн хөлсний доод хэмжээг зургаагаас найм дахин нэмэгдүүлсэнтэй тэнцэх хэмжээний төгрөгөөр торгох аж.

УИХ-ын долоо дахь удаагийн сонгуулийн сурталчилгаа өнгөрсөн бямба гаригт эхэлсэн билээ. Сонгуулийн шинэчилсэн хуулиар нэр дэвшигчид сурталчилгаа явуулахдаа сурталчлан ухуулах самбарыг гудамж, гэрлийн шон, байрны хана зэргийг цавуулаг зүйл ашиглахгүйгээр тогтоох шаардлагатай болсон. Тиймээс нэр дэвшигчид хөлтэй самбар ашиглах эсвэл шонд төмөр хүрээтэй самбарт сурталчилгаагаа байршуулж байгаа юм.