Эрүүгийн цагдаагийн газрын Цахим гэмт хэрэгтэй тэмцэх тасгаас олон нийтийн сүлжээнд садар самуун сурталчилж буй зарын бүлгэм, цахим хуудсыг олж тогтоох ажиллагаа явуулжээ. Энэ хүрээнд цахим хуудсаар дамжуулан садар садар самуун сурталчилсан есөн этгээдийг илрүүлсэн байна. 

Тодруулбал, сэжигтэн Б, У, М, У, С,Ч, Ө нарын есөн этгээд хуурамч фэйсбүүк ашиглан нууц фэйсбүүк бүлгэмийг үүсгэн садар самуун агууламжтай дүрс бичлэг, зураг зэргийг нийтэлж, улмаар насанд хүрээгүй иргэдийг биеэ үнэлэлтэд уруу татсан байжээ. Тэдний дотроос сэжигтэн У нь хуурамч фэйсбүүк ашиглан насанд хүрээгүй хүүхдийг бэлгийн зүй бус үйлдэлд уруу татсан нь тогтоогдсон тул гэмт хэрэгт эрүүгийн хэрэг үүсгэн шалгаж байгаа аж. 

Мөн сэжигтэн 30 настай М гэгч хуурамч фэйсбүүк ашиглан бэлгийн гаж урсгалыг сурталчилан, садар самуун агууламжтай дүрс бичлэг зураг зэргийг нийтлэсэн байжээ. 

Түүнчлэн С нь фэйсбүүк орчинд хаалттай бүлгэм үүсгэж биеэ үнэлэх ажлыг зохион байгуулж байсан аж. Түүнийг Эрүүгийн хуулийн 124 зүйлээр эрүүгийн хэрэг үүсгэн шалгаж байгаа юм байна. 

Харин Ч гэгч нь фэйсбүүк орчинд биеэ үнэлэх ажлыг зохион байгуулсан, бусдыг залилан мэхэлсэн насанд хүрээгүй С, Б нарын биеийг үнэлүүлсэн нь тогтоожээ. Түүнээс гадна Ө гэгч фэйсбүүк орчинд охид, эмэгтэйчүүдтэй танилцаж зургийг нь авч дарамталж бэлгийн харьцаанд ордог байсан гэмт үйлдлийг нь баримтжуулан гэмт хэрэгт эрүүгийн хэрэг үүсгэн шалгаж байна.

Мөн садар самуун агууламжтай мэдээлэл байрлуулан бусдад тараан сурталчилж буй хэрэглэгч, хаалттай нууц бүлгэм, хуудас болон бусдыг биеэ үнэлэхэд зуучилж, улмаар татан оролцуулж байж болзошгүй 100 орчим цахим хуудас болон бүлгэмийг олж илрүүлжээ. Одоогоор шалгалтын ажиллагаа хийгдэж байгаа юм байна. 

Дээрх этгээдүүдийг Монгол улсын эрүүгийн хуулийн 123 дугаар зүйл садар самуунтай тэмцэх тухай хуулийн 5 дугаар зүйлүүдийг зөрчсөн гэх үндэслэлээр эрүүгийн хэрэг үүсгэн шалгаж байгаа аж.