МАН-ынхан царцааны нүүдэл буюу тойргоос тойрогт хүмүүсийг олноор нь шилжүүлэх хууль бус аргыг ихээр хэрэглэх болсон талаар хэвлэлүүдээр гарч эхэллээ.

Тухайлбал, УИХ-ын сонгуульд Хөвсгөл аймагт МАН-аас нэр дэвшигч УИХ-ын гишүүн Л.Энх-Амгалангийн  тойрогт 2400 орчим сонгогч, Л.Мөнхбаатарын тойрогт 720 сонгогч, Архангай аймагт МАН-аас нэр дэвшигч Ж.Мөнхбатын тойрогт 603 сонгогч, Баянхонгор аймагт МАН-аас  нэр дэвшигч  Л.Элдэв-Очирын тойрогт 1900 сонгогч, Увс аймагт нэр дэвшигч УИХ-ын гишүүн Б.Чойжилсүрэнгийн тойрогт 2807 сонгогч саналд нөлөөлөх зорилгоор зохион байгуулалттайгаар шилжүүлэг хийлгэсэн байна.

Тодруулбал, Хөвсгөл аймгийн Улсын Бүртгэл, Статистикийн Газраас Хөвсгөл аймгийн Ардчилсан намд  хүргүүлсэн бичигт “2016 оны УИХ-ын сонгуулиар  Хөвсгөл аймагт Сонгуулийн тухай хуулийн 65.7 дугаар заалтын дагуу бусад аймаг хотоос  3145 сонгогч шилжиж ирсэн бүртгэлээ хийлгэсэн бөгөөд 283 сонгогч шилжин ирсэн тэмдэглэл нь өнөөдрийн байдлаар сонгуулийн хэсгийн хорооноос ирээгүй байна. Үүнээс 37 дугаар тойрогт 720 орчим, 38 дугаар тойрогт 43 орчим, 39 дүгээр тойрогт 2400 орчим сонгогч шилжиж ирсэн болно гэжээ. Үүнээс үзэхэд Л.Энх-Амгалангийн нэр дэвшиж буй 39 дүгээр тойрогт 2400 орчим сонгогч шилжиж иржээ.  2012 онд Хөвсгөл аймгийн нийт сонгогчийн сонгуулийн ирц 68,9 хувь байсан бол 2016 онд 2400 сонгогч шилжиж очсоноор сонгуулийн дүнд 13,1 хувиар нөлөөлөхөөр байгаа аж.

Харин Увс аймагт УИХ-ын гишүүн Б.Чойжилсүрэнгийн тойрогт 2807 сонгогч саналд нөлөөлөх зорилгоор зохион байгуулалттайгаар шилжүүлэг хийлгэсэн нь сонгуулийн дүнд 14 хувиар нөлөөлөхөөр байна.  Уг нь 2012 онд Увс аймагт 16348 сонгогч сонгуулийн ирцийн 70 хувийг бүрдүүлж байжээ. Энэ мэт “царцааны нүүдэл” орон нутагт үргэлжилж, сонгогчдын сонгох эрхэнд халсан үйлдэл гарч байгаад иргэд ихээхэн дургүйцлээ илэрхийлжээ.

Хөдөө орон нутгийн сонгогчийн тоо цөөхөн Сонгуулийн ирц 60 хувиас хэтрэхгүй болсон энэ үед мянга мянган сонгогч шилжүүлэх нь саналын дүнд шууд нөлөөлж хөдөө орон нутгийн сонгогчдын сонгох эрхэнд халдсан бохир арга болж байгаа гэдгийг Ардчилсан намын Ерөнхий нарийн бичгийн дарга Л.Эрхэмбаяр хэвлэлийн хурал хийх үеэрээ мэдэгдсэн билээ. Тэрээр “орон нутгийн сонгогчдын сонгох эрхэд зохион байгуулалттайгаар халдсан ийм башир аргатай Ардчилсан нам  эвлэрэхгүй, таслан зогсоох талаар бүхий л шийдвэртэй арга хэмжээ авч тэмцэх болно. Хэн нэг нэр дэвшигчийн бохир арга явуулагад автаж нүүдлийн сонгуульд оролцохгүй, ийм үйл ажиллагааг дэмжихгүй байхыг нийт сонгогчиддоо уриалж байна” гэсэн юм.

Н.ЦОГТ

Эх сурвалж: АН-ын сонгуулийн штаб