Өглөөний 07 цагт эхэлсэн санал хураалтын үеэр санал тоолох машин гацсан тохиолдол олон гарлаа. Машин гацсанаас болж иргэд хэсгийн хороодын гадаа дугаарлан зогсож байгаа тухай мэдээлэл ирсээр байсан. Харин энэ талаар СЕХ-ны Ч.Содномцэрэн дараах тайлбарыг өглөө.

- Яагаад ийм олон хэсгийн хороодод санал тоолох машин гацаад байна вэ?
- Зарим хэсгийн хороодод санал тоолох машин гацах, кодыг нь буруу хийх, техникийн саатал үүсэх, асахгүй байх гэх зэрэг гэмтэл гарч байгаа нь үнэн. СЕХ-ноос санал толох машинд саатаол гарсан үед хэрхэн ажиллахаа талаар журмыг сонгуулийн хэсгийн хороо бүрд хүргүүлсэн байгаа. Хэсгийн хороодын ажилчид асааж унтраахдаа сандарсан, буруу угсарсан, кодоо буруу хийсэн тохиолдлууд гарч байна. Харин одоо бол мэргэжлийн хүмүүс засаж, янзлаад санал хураалт хэвийн явагдаж байгаа. Тухайлбал, Баянзүрх, Чингэлтэй, Сонгинохайрхан дүүрэг, Хэнтий, Сэлэнгэ зэрэг аймгуудад ийм зөрчил гарсан тухай гомдол ирсэн.

- Хөдөө орон нутагт гарсан техникийн саатлыг яах вэ?
- Сонгуулийн хэсгийн хороод бүрт нөөц санал тоолох машин байршуулсан байгаа. Аймгийн төвөөс мэргэжилтнүүд очоод засах бүрэн боломжтой байгаа. Бид анх удаа танихгүй ийм техник, хэрэгсэл ашиглаж байгааг ойлгоорой гэж хэлмээр байна.

- Саналын ялгаатай, өөр хуудас хэвлэгдсэн гэсэн мэдээлэл байна.Үүнийг шалгаж байгаа юу?
-Бид хуурамч гэсэн саналын хуудсыг шалгаж үзсэн. Бар код, усан хээ, индекс зэрэг нь таарч байгаа. Нэг мм-ийг хоёр гурав хуваасны хэмжээтэй зөрсөн ч санал тоолох машин алдаа гэж тооцдог. Саналын хуудсыг хэвлэх үйлдвэрүүд 24 цагийн турш хэвлэсэн болохоор шөнийн ээлжинд дээрх хуудсуудыг хэвлэсэн байж болзошгүй. Бид хэвлэсэн үйлдвэрээс нь тодруулга авна. Тэрнээс биш хуурамч саналын хуудас бол биш.