НИТХ-ын долоо дахь анхдугаар хуралдаан өнөөдөр болсон бөгөөд НИТХ-ын хурлыг Э.Бат-Үүл даргалав. Тэрбээр энэ үеэрээ үнэмлэхүй ялалт байгуулсан МАН-ынханд хандан хатуухан үг чулуудав. 

Э.Бат-Үүл “Та нар үнэмлэхүй ялалт байгуулсан. Та нар хөөрөөд юу болсныг ойлгоогүй. Би өнөөдрийг хүртэл нийгмийн хамгийн түвэгтэй амьдрал болох улс төрд явсаар ирсэн. Энэ улс орон аюулын ирмэг рүү, хагарал сүйрэлд хүрэх гэж байхад аварсан. Энэ туршлагаар та нарын хэн нь ч надтай эн зэрэгцэхгүй. Энэ улс төр эвгүйдвэл юу болдгийг би сайн мэднэ. Биднийг ялагдсанд харамссан харуусал олон нийтийн дунд их байгаа. Нийгмийн эсэргүүцлийн цуглааныг зохион байгуулах туршлага, нэр нөлөөтэй хүмүүс гудамжинд гарсан. Үүнийг битгий мартаарай. Та нарын овлигогүй зан эсэргүүцлийг улам өдөөнө шүү” хэмээн хатуухан сануулга өгсөн юм.