Нийслэлийн Сүхбаатар дүүргийн Цагдаагийн нэгдүгээр хэлтэс энэ оны эхний хагас жилийн үйл ажиллагааны тайлангаа дүүргийн иргэддээ танилцууллаа.

Тодруулбал Хууль зүйн сайдын 2014 оны 06 дугаар сарын 06-ны өдрийн А/89 тоот тушаалын хавсралтаар “Иргэний зөвлөл, оршин суугчдад цагдаагийн байгууллагын тайлан тавих журам” батлагдсаны дагуу тус цагдаагийн хэлтсээс 2016 оны эхний хагас жилийн  хийсэн үйл ажиллагааны тайланг Дүүргийн оршин суугч иргэдэд танилцуулах ажлыг Сүхбаатар дүүргийн 8 дугаар хорооны нутаг дэвсгэрт байрлах Нийслэлийн иргэний танхимд 2016 оны 07 дүгээр сарын 06-ны өдрийн 16:00-18:30 минутын хооронд зохион байгуулсан байна.

Хурлыг нээж тус хэлтсийн дарга, цагдаагийн хурандаа С.Буянжаргал үг хэлэн хуралд оролцож  байгаа алба хаагчдыг танилцуулсан ба Төлөвлөлт зохион байгуулалтын тасгийн дарга цагдаагийн хошууч Д.Чимэдбавуу тус хэлтсээс 2016 оны эхний хагас жилд хийсэн үйл ажиллагааны тайланг иргэдэд танилцуулав.

Иргэдээс  асууж сонирхсон асуултуудад холбогдох албан тушаалтнууд тайлбар хийсэн ба 2016 оны сүүлийн хагас жилийн үйл ажиллагааны төлөвлөгөөнд иргэдийн гаргасан саналуудыг тусгахаар шийдвэрлэсэн байна. /нийт 7 иргэнээс санал хүсэлт гарсан./

Хурлын танхимын коридор хэсэгт тус цагдаагийн хэлтсийн  тасаг, дэд хэсэг, хороодын хэсгийн байцаагч нарын үйл ажиллагааг харуулсан танилцуулгуудыг самбар хэлбэрээр байршуулж,  алба хаагчдын үйл ажиллагаандаа ашигладаг нэг бүрийн тусгай хэрэгсэл, эд зүйл болон Олон нийтийн цагдаа, Оюутан цагдаа, Урамшилт эргүүлийн үйл ажиллагааг сурталчлан гэмт хэргээс урьдчилан сэргийлэх санамж сэрэмжлүүлгүүдийг тараах ажлыг тус тус зохион байгуулав.

Тайлангийн хурлын төгсгөлд иргэдэд мэдээлэл өгөх зорилгоор Олон нийтийн цагдаа, Оюутан цагдаа, Урамшилт эргүүлийн үйл ажиллагааны талаар ахлах байцаагч, цагдаагийн ахмад Г.Ганбаяр, Гэр бүлийн хүчирхийлэл, хүүхдийн эсрэг гэмт хэрэгтэй холбоотой мэдээллийг ахлах байцаагч, цагдаагийн хошууч Д.Ариунжаргал, Хар тамхи, мансуурах бодисыг таньж мэдэх, хор уршиг, ахуйн хэрэглээний газын хор уршигийн талаар эрүүгийн төлөөлөгч, цагдаагийн дэслэгч Э.Мишээл нар дэлгэц дээр Повер пойнт хэлбэрээр танилцуулсан юм.