Монгол, Катар улсын Зэвсэгт хүчний хамтарсан “Шийдэмгий Шийдвэр” энхийг сахиулах ажиллагааны хамтарсан сургуулилт эхэллээ. Хагас сар үргэлжлэх энэхүү хоёр орны Зэвсэгт хүчний хамтарсан сургуульд хурандаа Д.Өлзийбаяр захирагчтай Зэвсэгт хүчний 350 дугаар ангийн цэргийн алба хаагчид үндсэн бүрэлдэхүүнээр оролцож байгаа бол Катар Улсын Зэвсэгт хүчнээс 160 цэргийн алба хаагчид оролцож байна.

Монгол Улсын Батлан хамгаалах салбарын гадаад хамтын ажиллагаа улам бүр өргөжин хөгжсөөр байгаагийн тодорхой нэг жишээ бол Монгол Улс, Катар Улсын Зэвсэгт хүчний харилцан тохиролцсон гэрээний дагуу 2008, 2009, 2013, 2014, 2015 онуудад “Шийдэмгий Шийдвэр” хамтарсан сургалт, дадлагыг зохион байгуулж явуулсан туршлагадаа тулгуурлан энэ удаагийн энхийг сахиулах ажиллагааны хамтарсан сургалт, дадлагыг зохион байгуулж байна. 2015 онд манай улсад болсон хамтарсан сургуулийн хаалтын ажиллагаанд Катар Улсын Батлан хамгаалахын сайд, хошууч генерал Хамад Бин Али Аль-Аттияа тэргүүтэй төлөөлөгчид айлчлан ирж оролцож байсан юм. Хоёр орны хамтарсан сургуулийн нээлтэд БХЯ, ЗХЖШ-ын удирдлагууд оролцов.