Авлигатай тэмцэх газраас 2016 оны долоодугаар сарын 26-ны өдөр Эрүүгийн байцаан шийтгэх хуулийн 40 дүгээр зүйлийн 40.2-т “...сэжигтэн, яллагдагч, шүүгчдэгч... өмгөөлөгч сонгон аваагүй бол хэрэг бүртгэгч, мөрдөн байцаагч, прокурор, шүүх уг хэрэгт өмгөөлөгч оролцуулах явдлыг хангах үүрэгтэй” гэж заасны дагуу иргэн Н.Энхбаярт өмгөөлөгч томилж өгөхийг хүссэн албан бичгийг Монголын Хуульчдын холбоонд хүргүүлсэн билээ.

Энэ дагуу долоодугаар сарын 27-ны өдөр Хуульчдын холбооны Өмгөөлөгчдийн хорооноос Н.Энхбаярыг өмгөөлөх хүсэлтэй өмгөөлөгчдийг хоёр өдрийн дотор саналаа ирүүлэхийг мэдэгдээд байсан.

Тэгвэл МАХН-ын дарга Н.Энхбаярын өмгөөлөгчөөр ажиллах хүсэл сонирхлоо нэр бүхий 4 өмгөөллийн нөхөрлөл, өмгөөлөгч илэрхийлжээ. Ингэснээр иргэн Н.Энхбаярт холбогдох эрүүгийн хэргийн мөрдөн байцаалтын ажиллагаанд өмгөөлөгч оролцох боломжтой болсон байна.

МАХН-ын дарга Н.Энхбаярыг яллагдагчаар татах, ял сонсгох, мэдүүлэг авах зорилгоор АТГ-аас долоодугаар сарын 25-ны өдөр зургаа дахь удаагийн зарлан дуудахаа хүргүүлсэн. Гэвч Н.Энхбаяр товлосон цагт очоогүй. Тэрээр энэ тухайгаа “АТГ-т очиж би өөрөө өөрийгөө буруутгаж, өөрийнхөө эсрэг мэдүүлэг өгөхгүй. Үндсэн хуульд заасан энэ эрхээ эдэлнэ. Хоёрдугаарт, өөрийгөө өмгөөлүүлэх эрхээ эдэлнэ. Тиймээс өмгөөлөгчтэй болсон цагтаа мөрдөн байцаах үйл ажиллагаанд оролцоход бэлэн байгаа. Өмгөөлөгч олдох байх гэж найдаж байна. Түүний дараа АТГ-т мэдүүлэг өгч болно” гэж тайлбарласан.

Өөрөөр хэлбэл, Н.Энхбаяр өмгөөлөгчгүйгээр АТГ-т очихгүй. Өмгөөлөгчдийн холбооноос чадварлаг, шударга өмгөөлөгч авах хүсэлт гаргасан ч өмгөөлөгч олдоогүй хэмээгээд байсан юм.