Өчигдөр буюу энэ сарын 2-ны өдөр Улаанбаатар хотын Замын цагдаагийн газрын ЖШУХ дээр нийт 272 дуудлага, мэдээ мэдээлэл хүлээн авснаас зам тээврийн ослын 193 дуудлага бүртгэгдсэн байна.
Үүнээс гэмт хэргийн шинжтэй гомдол мэдээлэл 7 бүртгэгдэж, 9 хүн хүнд, хөнгөн гэмтсэн. Зам тээврийн осолд сургуулийн өмнөх насны 1, сургуулийн насны 2 хүүхэд өртсөн. Согтууруулах ундааны зүйл хэрэглэсэн үедээ хөдөлгөөнд оролцсон хоёр жолооч, согтуугаар тээврийн хэрэгсэл жолоодсон 43 жолоочийг журамлан гарч болзошгүй осол хэргээс урьдчилан сэргийлж ажилласан байна.
Тухайлбал, Баянгол дүүргийн нутаг Шар хадны зам, Тэнгис авто угаалгын урд замд “Приус” маркийн авто машины жолооч М нь согтууруулах ундааны зүйл хэрэглэсэн үедээ тээврийн хэрэгсэл жолоодон “Витз” маркийн П, “Спринтер” маркийн И жолоочтой авто машинуудтай мөргөлдөж зорчигч 36 настай эмэгтэй Б нарын 2 хүн гэмтсэн.
Баянгол дүүргийн нутаг Хасбаатарын гудамж Хорооллын 24-р байрны урд замд T.Prius маркийн авто машины жолооч О нь явган зорчигч 5 настай эмэгтэй Х-г мөргөж гэмтээсэн.
Хүүхдийг зам тээврийн осол гэмтлээс урьдчилан сэргийлэх, аюулгүй байдлыг нь хангах, хамгаалах суудал, хамгаалалтын бүсийг хэрэглэж хэвшүүлэх зорилгоор “Хамгаалах бүс, хамгаалалтын суудал” нэгдсэн арга хэмжээг Замын цагдаагийн газраас зохион байгуулан явуулж байна.
Зам тээврийн осолд өртсөн хүүхдийн 60 гаруй нь хувь нь тээврийн хэрэгслээр зорчиж явах үедээ амь нас эрүүл мэндээрээ хохирсон байдаг. Та анзаарсан бол гудамжинд гараад хаашаа ч харсан хамгаалах бүсээ зүүсэн олон жолооч байгаа. хэдий ч хажуудаа сууж яваа зорчигч болон үр хүүхэддээ хамгаалах бүс, хамгаалалтын суудлыг хэрэглэж хэвшүүлсэн зүйл дутмаг байгааг анзаарсан байх. Эцэг эхчүүд бид нар хүүхдийнхээ хэрэглээ, мэдлэг боловсролд анхаарлаа хандуулдаг нь нууц биш. Харин та хүүхдийнхээ аюулгүй байдалд хир анхаарал хайр халамж тавьсан билээ гэдгийг бодож үзэх цаг нь болсон.
Осолд орж амь нас, эрүүл мэндээр нь хохироосны дараа харамсаж ухаарч байсанаас хүүхдээ тээврийн хэрэгсэл дотор зөв тээвэрлэж аюулгүй байдлыг нь хангаж хөдөлгөөнд оролцох нь эцэг эхчүүд та биднээс ихээхэн шалтгаалж байгааг замын цагдаагийн газраас санууллаа.
