Онцгой байдлын ерөнхий газраас гаргасан мэдээгээр зогсоогоод байсан эрлийн ажиллагааг ар гэрийнх нь хүсэлтээр дахин эхлүүлжээ.

Тодруулбал, Булган аймгийн Хангал сумын Сөрт багийн Эргэлийн-Ар гэдэг газар Сэлэнгэ мөрний усанд иргэн Т /38 настай, эрэгтэй/ осолдсон тухай дуудлага өнгөрсөн тавдугаар сарын 29-нд өдрийн 18:05 цагт ирж, аймгийн Онцгой байдлын газраас эрэн хайх ажиллагааг эхлүүлсэн байжээ. Эрлийн ажиллагааг өнгөрсөн зургадугаар сарын 26-ны өдөр хүртэл хийсэн аж. Эрлийн ажиллагааг ар гэрийнх нь хүсэлтээр зогсоосон ч усанд осолдсон Т-гийн эцэг Д-н хүсэлтээр өчигдрөөс эрлийг дахин үргэлжлүүлж буй юм байна.

Сүхбаатар аймгийн Түмэнцогт сумын Баянцагаан багийн Шар хад гэдэг газар үйл ажиллагаа явуулдаг “Монгол жуонли” жоншны уурхайн тогтоол усанд 2 хүүхэд осолдсон дуудлага өчигдөр 00:40 цагт аймгийн Онцгой байдлын газарт ирж, 7 албан хаагч, 1 техник хэрэгсэлтэйгээр ажиллагааг эхлүүлж, Г /16 настай, эрэгтэй/, А /15 настай, эрэгтэй/ нарын цогцсыг гаргажээ.

Хөвсгөл аймгийн Арбулаг сумын Бор гол багийн Хүүшийн булан гэдэг газар Дэлгэр мөрөн голын усанд нэр, хаяг, нас, хүйс нь тодорхой бус хүний цогцос байна гэсэн дуудлага өчигдөр 14:20 цагт ирж, тус аймгийн Онцгой байдлын газрын 4 албан хаагч, 1 техник хэрэгсэлтэйгээр  ажиллаж Дэлгэрмөрөн голын уснаас цогцсыг гаргаж аймгийн Цагдаагийн байгууллагад тус тус шилжүүлэн өгсөн байна.