Нийслэлийн захиргааны харьяа агентлаг, төсөвт үйлдвэрийн газруудад бүтцийн өөрчлөлт хийх гэнэ. Ингэхдээ зарим агентлагийг салгаж буй бол заримыг нь нэгтгэж шинэ газар байгуулах аж. Тухайлбал, нийслэлийн Орон сууцны корпораци, Гэр хорооллын хөгжлийн газар, Гэр хорооллыг орон сууцжуулах төсөл гэх гурван байгууллагыг нэгтгэж, Гэр хорооллын дэд бүтцийн газар шинээр байгуулах гэнэ. Эх сурвалжийн мэдээлснээр нийслэлийн Засаг дарга бөгөөд Улаанбаатар хотын захирагч С.Батболд харьяа газруудаараа явж, бүтэц, үйл ажиллагаатай нь танилцах үеэр уг гурван газрыг нэгтгэн шинэ агентлаг байгуулах тухай ярьсан байна. Ирэх есдүгээр сарын 1-нээс өмнө бүтцэд нь өөрчлөлт оруулж, удирдлагуудыг нь томилох гэнэ. Үүнээс гадна нийслэлийн Эдийн засгийн хөгжлийн газрыг татан буулгаж, чиг үүрэг ойролцоо Хөрөнгө оруулалтын газартай нэгтгэх яриа гарчээ. Мөн Нийтийн үйлчилгээний "Улаанбаатар” нэгтгэлийн үйл ажиллагааг дүүргүүдийн Дэд бүтэц, тохижилтын хэлтсүүдэд хариуцуулах бололтой.

24tsag.mn