Азийн хавдар судлалын үндэсний төвүүдийн холбооны VI хурал Улаанбаатар хотноо болж байна. Хоёр жил тутам зохион байгуулдаг тус хурлыг Хавдар судлалын үндэсний төвөөс энэ удаа зохион байгуулж байгаагаараа онцлог юм.
Хуралд Монгол, Малайз, Япон, Солонгос, Сингапур, Индонез, Вьетнам, Непал, Бангладиш зэрэг Азийн есөн орны хавдар судлалын үндэсний төвийн ерөнхийлөгч, захирал, төлөөлөгч нар оролцож байна. Хавдрын эрсдэлт хүчин зүйлс, өвчлөл, нас баралт дэлхий даяар тэр дундаа Азийн бүсэд нэмэгдэж байгаа бөгөөд Дэлхийн эрүүл мэндийн байгууллагаас 2025 он гэхэд дэлхий даяар хорт хавдартай хүний тоо 32.5 саяд хүрч, жилд 8.2 сая хүн уг өвчнөөр нас барах магадлалтай гэсэн тооцоо гаргасан байдаг. Иймээс хорт хавдартай тэмцэх нь зөвхөн манай улс төдийгүй Азийн бүс, дэлхийн хэмжээнд нэн чухал, тэргүүлэх чиглэлийн ажил болж байгаа юм.
Азийн хавдар судлалын үндэсний төвүүдийн холбооны VI хурал нь бүсийн улс орон хорт хавдрын хяналт, урьдчилан сэргийлэлт, эрт илрүүлэг, оношлогоо, эмчилгээний чиглэлээр өөрийн улс, орны хуримтлуулсан туршлагыг харилцан солилцох, цаашдын хамтын үйл ажиллагааг төлөвлөх томоохон ач холбогдолтой юм.
