"Улсын нэр томъёоны комисс"-ыг дахин сэргээлээ. Энэхүү комиссыг сэргээснээр даяаршиж буй монгол хэлээ монголоор нь авч үлдэх, хүн бүр дураараа орчуулан хэрэглэж буй гадаад нэр томъёог нэг мөр болгон орчуулах боломж бүрдэх юм.
Анх 1924 оны гуравдугаар сарын 28-нд Судар бичгийн хүрээлэнгийн дэргэд “Нэр томьёоны комисс”-ыг 10 салбартайгаар байгуулж байсан түүхтэй. Тэрхүү комисс нь Монгол улсын дотор дагаж мөрдөх бүх нэр томьёог эрдэм шинжилгээний үндэстэйгээр боловсруулан баталж, түүнийг нийтээр журамлах ажлыг эрхлэн явуулдаг улсын байгууллага байжээ. Тус комисс “Нэр томьёоны комиссын мэдээ” сэтгүүл гаргаж, гадаад үгийг хэрэглэхдээ тэрхүү сэтгүүлийг эх сурвалж болгон ашигладаг байсан аж. Шинжлэх ухаан бүрээр нь гадаад үгийг орчуулан нийтэлсэн 147 цуврал сэтгүүл өдгөө ч хадгалаастай байдаг гэнэ. Харамсалтай нь энэ комисс зах зээлийн шуурганд өртөж, 1991 онд татан буугджээ.
Тэгвэл шинээр сэргээж буй "Улсын нэр томьёоны комисс" Хэлний бодлогын үндэсний зөвлөлийн дэргэд байгууллагдлаа. Тус комисс нь эрх бүхий судалгааны байгууллагаас боловсруулсан гадаад нэр томьёоны орчуулга, монгол хэлний үгийн санд оруулах шинэ нэр томьёог хэлэлцэн батлах юм байна. Комиссын бүрэлдэхүүнд тухайлсан хүнийг нэр зааж оруулах бус хамаарал бүхий бүх байгууллагыг багтааснаараа онцлог юм байна.
