Энэ оны эхний найман сарын байдлаар 78 мянга гаруй нохойг 700 гаруй сая төгрөг зарцуулан устгасан бөгөөд ирэх сараас уг ажлыг улам эрчимжүүлэхээр бэлтгэж байна.

“Нийслэлийн нутаг дэвсгэрт нохой, муур тэжээх, эзэнтэй нохойны албан татварыг төвлөрүүлэх, эзэнгүй нохой, муурны тоог бууруулах, устгах үйл ажиллагаанд дагаж мөрдөх журмын төсөл”-ийг өнөөдөр Хотын Ерөнхий менежер бөгөөд Захирагчийн ажлын албаны даргын үүргийг түр орлон гүйцэтгэгч Т.Гантөмөр хороодын засаг дарга нарт танилцууллаа.

Энэхүү журам нь 2002 онд баталсан Нийслэлийн нутаг дэвсгэрт нохой, муур тэжээх, арчлах, золбин нохой, муур устгахад мөрдөх журмын шинэ найруулга бөгөөд эзэнтэй нохой, муурыг бүртгэж, үнэмлэхжүүлэх, нохой, мууранд үржил зогсоох мэс ажилбар хийх, нохойн албан татвар ноогдуулах зэрэг шинэ заалтуудыг нэмж оруулах гэж байгаа юм.

Зоонозын өвчин судлалынүндэсний төвөөс Улаанбаатар хотод 320 мянга гаруй золбин нохой бий гэсэн судалгааг өнгөрөгч онд гаргажээ. Золбин нохой устгалын ажлыг ирэх 10 дугаар сарын 1-нээс эрчимжүүлж, оны эцэст 32 мянган нохойг нэмж устгахаар төлөвлөж байна.