Нийслэлийн Статистикийн газраас энэ долоо хоногт Улаанбаатар хотын худалдааны төвүүдэд хүнсний гол бүтээгдэхүүний үнэ ханш ямар байгааг судалжээ. Хонины махны үнэ өмнөх долоо хоногийнхоос 70 төгрөгөөр хямдарч, дунджаар 4800, үхрийнх 5900 төгрөгийн үнэтэй байгаа аж. Үхрийн нэг кг махыг “Хүчит шонхор” захад 5700 төгрөгөөр зарж байгаа нь жижиглэнгийн үнийн хувьд хамгийн хямд нь болж байна. Тэгвэл “Меркури”-д хамгийн үнэтэй буюу 7500 төгрөгөөр борлуулж байжээ. Хонины хамгийн хямд мах “Хархорин”-д 4500, хамгийн үнэтэй нь “Меркури”-д 6200 төгрөг байна.

Тэгвэл наймдугаар сард нэмэгдсэн гурилын үнэ энэ долоо хоногт хэлбэлзээгүй бөгөөд нэг кг-аар савласан дээд зэргийн “Алтан тариа”-г 1200-1500,1 зэргийнхийг 1000-1300, II зэргийнхийг 800-900 төгрөгөөр борлуулж буй аж. Харин шуудайлсан гурилын үнэ арай хямд буюу “Бөмбөгөр”, “Баянзүрх”, “Хархорин”, “Хүчит шонхор”, ‘Таван эрдэнэ”-д кг-ыг нь 1150-1300 төгрөгөөр зарж байгаа юм. Ногоочид ургацаа хурааж дуусаад буй энэ цаг үед өмнөх долоо хоногийнхоос төмс 20, лууван 145, байцаа 115 төгрөгөөр хямдарчээ.