Германы олон улсын хамтын ажиллагааны нийгэмлэг (GIZ)-ийн "Эрдэс баялаг, түүхий эдийн иж бүрэн санаачлага  (ЭТИС) хөтөлбөр,  Герман-Монголын бизнес эрхлэгчдийн холбоо хамтран Герман-Монголын бизнес өдрүүдийг “Made in Germany” сэдвийн дор зохион байгуулах байна. Тус арга хэмжээний зорилго нь хоёр талт хамтын ажиллагааг дэмжихийн зэрэгцээ Герман-Монгол орнуудын хооронд технологи, ноу-хауг дамжуулах юм.

2016 оны 10 сарын 11, 12-нд болох бизнесийн өдрүүдэд Герман, Монголын 50 гаруй компани оролцон хамгийн сүүлийн үеийн технологи, орчин үеийн удирдлагын аргуудын тухай мэдээлэл хүргэж, өөрийн түншүүдтэйгээ туршлагаа солилцох аж.

Тус арга хэмжээний нээлтийн ёслолын хүндэт зочноор Монгол Улсын Үндэсний Хөгжлийн Газрын дэд дарга Н.Нацагням, Холбооны Бүгд Найрамдах Герман Улсаас Монгол Улсад суугаа Элчин сайд Штефан Дуппел болон бусад төр, хувийн хэвшлийн төлөөлөгчид оролцоно.

Үндсэн илтгэлийг “Компанийн сайн засаглал” сэдвээр Германы компанийн засаглалын зарчим, кодексийг боловсруулан олон улсад танигдсан судлаач Проф. Др. Кристиан Штренер тавих аж. Нээлтийн дараагаар  Монгол, ХБНГУ, АНУ, БНХАУ, Австралийн бизнес эдийн засаг, эрдэм шинжилгээний салбарт нэр хүндтэй төлөөлөгчид илтгэл, танилцуулга, “Master Class” семинарыг зохион байгуулна.   

Энэ жилийн үндсэн чиглэлүүд нь компанийн удирдлагын менежмент, газар тариалан, текстил–бэлэн хувцасны технологи, эрчим хүч байх ба эдгээр чиглэлээр төлөвлөсөн мэргэжлийн арга хэмжээнүүд чуулганы бүрэлдэхүүнд багтаж, өнгөрсөн жилүүдийн адил өргөн хүрээний оролцогчдод сонирхолтой ярилцлага, шинэлэг мэдээлэлийг хүргэхийг зорьж байна.

Герман-Монголын бизнесийн өдрүүдийг GIZ-ийн ЭТИС хөтөлбөрөөс санаачлан зургаа дахь удаагаа зохион байгуулж байгаа ба энэ жилийн 2 өдрийн арга хэмжээ “Шангри-Ла” зочид буудалд олон нийтэд нээлттэй, үнэ төлбөргүй болох аж.