Хөгжлийн бэрхшээлтэй хүүхдүүдийн 10 дугаар цэцэрлэг толгой хорогдох байргүй болжээ. Улсдаа ганц байдаг тус цэцэрлэгийн барилга өдгөөгөөс  гурван жилийн өмнө актлагдаж, үүдээ барьсан байна. Харин 10 дугаар цэцэрлэгт хүмүүжиж байсан хүүхдүүд багш нарын хамт 2014 оноос хойш  нийслэлийн 58 дугаар цэцэрлэг буюу “Өнөр бүл” гэх улсын асрамжийн төвийн зүүн жигүүрт толгой хорогдох болсон ч өдгөө байргүйн улмаас үүдээ барих дээрээ тулаад байгаа аж. Энэхүү мэдээллийн дагуу Баянзүрх дүүргийн гуравдугаар хороонд байрлах сувилалын цэцэрлэг яслийн 10 дугаар цогцолборыг зорив. Хэдийгээр хүүхдүүд нь 58 дугаар цэцэрлэгт байрлаж байгаа ч бид цэцэрлэгийн эрхлэгчтэй уулзахаар хуучин цэцэрлэгийн өртгөл хэсэгт очсон юм. Хүүхдийн инээд хөөр цалгисан орчин бус дутуу нураасан цэцэрлэгийн барилга биднийг угтах нь үнэхээр зүрх зүсэх шиг болж байсныг энд нуух юун.

Цэцэрлэгийн эрхлэгч Г.Буянжаргалтай уулзаж, зарим нэгэн зүйлийг тодрууллаа.

-Та цэцэрлэгийнхээ талаар танилцуулахгүй юу. Ямар учраас өнөөдөр цэцэрлэг үүдээ барих дээрээ тулаад байна бэ?

-Манай цэцэрлэг нь анх 1964 онд ЭМЯ-ны шийдвэрээр 0-3 хүртэлх насны хүүхдүүдийг асардаг 40 дугаар ясли нэртэйгээр байгуулагдаж 1992 оноос эхлэн тулгуур өвчний согогтой хүүхдүүдийн сувилалын ясли болсон түүхтэй. Улмаар 1997 онд Нийслэлийн засаг дарга бөгөөд ЭМЯ-ны шийдвэрээр боловсролын салбарт шилжин сувилалын цэцэрлэг-яслийн 10 дугаар цогцолбор болон өргөжсөн юм. Гэтэл цэцэрлэгийн барилга олон жилийн өмнө баригдсан учраас үйл ажиллагаа явуулах боломжгүй байна гэсэн мэргэжлийн хяналтын байцаагчийн дүгнэлт гарч улмаар 2013 онд үйл ажиллагаа явуулах боломжгүй гэсэн акт тавьсан. Тиймээс бид газар, яамандаа мэдээлж, улмаар манай цэцэрлэгт Нийслэлийн хөрөнгө оруулалтаар нэг жилийн хугацаатай шинэ барилга барьж өгөхөөр болсон. Энэ хугацаанд цэцэрлэг маань НХХЯ-ны харьяа “Өнөр бүл” төвийн 58 дугаар цэцэрлэгийн дөрвөн өрөөнд үйл ажиллагаагаа явуулж байхаар болсон ч өнөөдрийг хүртэл цэцэрлэгийн барилга баригдахгүй байсаар бид үүдээ барих дээрээ тулаад байгаа юм.

-Цэцэрлэгийн барилга ямар шалтгаанаар баригдахгүй ийм удсан юм бол?

-Уг нь цэцэрлэгийн барилгыг Нийслэлийн хөрөнгө оруулалтын газар нийт 5.3 тэрбум төгрөгөөр барихаар болж, улмаар ТЭЗҮ-ийг боловсруулах 130 сая төгрөгийг нийслэлийн төсөвт суулгаж, ажлаа эхлүүлээд байсан юм. Гэтэл БСШУЯ гэнэтхэн л цэцэрлэгийг концессийн гэрээгээр барих шийдвэр гаргаж, тендер зарласан боловч цэцэрлэгийн барилгыг концесоор барих нэг ч газар олоогүй. Ингээд л манай цэцэрлэгийн хувь заяа бүрхэг болсон доо.

-Та бүхэн цэцэрлэгийн удирлагуудын хувьд энэ бүхнийг эсэргүүцэж, яаралтай барих арга замыг хайгаагүй гэж үү?

-Бид чинь хүүхдүүдийнхээ төлөө л гэсэн чинхүү сэтгэлтэй хүмүүс шүү дээ. Тийм байхад яаж зүгээр хараад суух билээ. Бид шат шатны байгууллага, яам, газруудад нь мэдээлж, хөөцөлдсний эцэст 2016 оны гуравдугаар сард Нийгмийн бодлогын байнгын хороо, Төсвийн байнгын хорооноос манай цэцэрлэгийг төсвийн хөрөнгөөр барих нь зөв гэсэн чиг үүргийг Засгийн газарт хүргүүлсэн. Ингээд 2016 оны төсвийн тодотголд тусгуулахаар ажиллаж байтал УИХ завсарлага авч энэ асуудлыг шийвдэрлэлгүй хаалганы гадна үлдсэн. Гэтэл энэ удаа ч мөн төсвийн тодотголд концессийн гэрээгээр барих жагсаалтад орсон байгаа юм.

-Өмнө нь концессоор барих гээд барих газар олоогүй цэцэрлэгийг эдийн засаг хүнд байгаа энэ үед аль нэг хувийн компани барих нь эргэлзээтэй л байх даа?

-Тийм ээ. Өмнө нь концессоор бариулах гээд барих газар олдоогүй 2 жил гаруй болсон байтал одоо дахин энэ жагсаалтад оруулж байгаа ёстой л нэг айлын шоовдор хүүхэд шиг бидэнд хандаж байгаагийн илрэл болж байх шиг санагдаад үнэхээр их бухимдаж, басхүү гомдож сууна даа. Бид төрийн мөнгөөр хувьдаа барилга бариулах гээгүй, хөгжлийн бэрхшээлтэй хүүхдүүдийнхээ төлөө тэдний ирээдүйн гэрэл гэгээний төлөө л энэ бүхнийг хэлж, гуйгаад байгаа юм шүү дээ.

-Тэгэлгүй яах вэ. Нэг ч гэсэн бяцхан үрс маань эрүүл болж, бусдын л адил эрхээ эдлээсэй гэж хүсэхгүй хүн хэн байхав. Харин одоо энэ байгаа байрнаасаа ямар учраас хөөгдөх гээд байгаа юм бол?

-Хүүхдийн төлөө Үндэсний төв энэ байрнаас биднийг хөөгөөд гудамжинд гаргах гээд байгаа зүйл байхгүй. Үнэхээр л эдний зөв шүү дээ. Манай цэцэрлэг анх ганцхан жил болоод л нүүнэ гэж орчихоод бүтэн 3 жил болчихлоо. Тэгэхээр аргагүй биз дээ.

-"Өнөр бүл" төвийн 58 дугаар цэцэрлэг НХХЯ-ны харьяа байгууллага биз дээ. 108 төвийг энд байгуулах гэж байгаа гэх мэдээлэл байсан?

-Тийм ээ. НХХЯ бол бидэнд үнэхээр энэрэнгүй хандаж байгаа. Мэдээж чиг үүрэг бодлогын дагуу л өөрсдийн үйл ажиллагаагаа өргөжүүлэн хөгжүүлэх нь тэдний ажил болохоор эрхийнхээ хүрээнд байраа авъя гэж байгаа нь буруу биш. Тиймээс л манай цэцэрлэгийн барилгыг концессоор биш улсын хөрөнгөөр яаралтай барьж өгөөч ээ гэдэг зүйлийг хүсээд байгаа юм.

-Танай цэцэрлэг энэ барилгыг ашигласан төлбөр төлдөг юм уу?

-Үгүй ээ. Бид хэрэглэсэн ус цахилгаанааны төлбөрөө л тушаадаг. Түүнээс өөр ямар ч мөнгө төгрөгний асуудал байхгүй. Би энэ цэцэрлэгийн эрхлэгчийн хувьд манай цэцэрлэгийг хаяандаа байрлуулж байгаа энэ байгууллагад үнэхээр их баярлаж байгаа. Манай хүүхдүүд хөгжлийн бэрхшээлтэй гэлээ удахгүй эрүүл саруул болж эх орныхоо хөгжил цэцэглэлтэд хувь нэмэр оруулах Монгол Улсын иргэн хүн шүү дээ л гэдгийг хэлмээр байна даа.

24tsag.mn